6. REY-EZEQUÍAS, SALOMÓN-BINSAED-NUEGAN-SOGSAD NUE-ILEMAKAR NARMAKSAD
25
(25:1–29:27)
1 We-binsaed-nuegana Salomón onosbalid. Judá-rey-Ezequíasʼga dule-garda-narmakmaladi we-binsaedmar nue-ilemakar narmaksad.
2 Ibmar-dukuar-mamaidi, Bab-Dummad-e-gandikid-e-wilub oyoged.
Reymar, igar-dukuar-mamaid-balamiedi, dule-gandikmaladga gued.
3 Dule, nagase nibneg-nibgued balamiosulid,
degi, nagase napneg-e-ulub-naid balamiosulid.
Amba deyobi, reymar-binsaedi gege ulubse balamilemogad.
4 Mani-dulenaidgi-durgan-welegoed be mie.
Geb a-manigine, dule-mani-sobedi, nog soboed.
5 Rey-asabin dule-isgana be onoge.
Geb rey igar-innikigwadba yar-seoed.
6 Melle rey-asabin dule-nug-nikadga be san-imako.
Melle dule-dummagan-imbagi yogasaar sigis be imako,
7 rey bur bega soged nabirid: “Wese be sigda”
adi, melle dule-dummagan-abin rey be-obingegsaegar.
Be-sunnagwad be ibmar-daksale,
8 melle gwae-gwae dummaganse-odonao.
Ar dule yamo be-abin osulosale, igi be saoe.
Aka dukin be bingeguoed.
9 Bebogwa igar-gwatirisad be nudako.
Degi-inigwele, melle dule-bega-ibmar-sogedi, dule-baidga sogmogo.
10 Ar be dule-baidga ibmar-sogele, we-dule, sunna be-nug oichoged.
Degidbali, bar be, nug-nued-nika guosulid.
11 Iba-sogedba ibmar-soglegedi,
galimbaba dutumar-oyapateyobi gued.
12 Dule-binsaed-ibedi, nuedgi dulega gannabasaar-ibmar-sogsiile, dulega olargan-dummaganba bur bule ibnuedid,
ega ormadaremaladba bur bule sunsogedid.
13 Igi-neg-diopisulidgi, neg-diopigwad yeer-itoledae,
debayobi, dule-garda-berbeged-innikigwadi, e-dummadga niga-gandikid ukmogad.
14 Igi-dii-wioeyobi neg-ainakwis sii dakledae,
debayobi, dule ibmar-ukoye-sogdidaedi, gege ibmar-ukdaed.
15 Gwae-gwaesuli, binnasdikigwadgi, dule-nuga-nikad-e-binsaed ogwaleged.
Nuedgi, urwedginsuli-sunmaklegedi, bela igar-bulegangi obilleged.
16 Be achanis amisale, melle dogdar-mao.
Ar doggus be masale, be agdoed.
17 Melle bali-bali dule-baid-negse nanao.
Ichakwagwad, bali-bali-nanaer, abakalegi budar-be-dakedba, isdar be-dakalile.
18 Dule, e-aigi gakansaar-sunmakedi, akwa-mamaredyob gued.
Es-suidyobi, degi, es-swiswidikidyob gubalid. Emar-wioged.
19 Dule, suli-suli-itogedgine, dule-isganagi bensuli gunonikile, nugar-nunmakedyob gued.
Degi, nailik-mali-bisgar-gudiidyobi gued. Binsaedsuli daed.
20 Dule-bukib-binsaedba-wile-itodiidgala namaklemaladgi-namakedi, nuedsulid.
Ega ukagi-yaa-siidgi balu-eogeyobid.
Degi, neg-dambipigwadgi mor-esuedyobid.
Gwen gadi-gadi imakosulid.
21 Be-isdarad ukudmaada-itogele, masgi ogunno,
uku-uku-itogele, ogobo.
22 Deyob be a-dule-imakele, be nue-obingegsaoed,
Bab-Jehováʼdi bega ibmar-buged ukoed.
23 Dii-burwa-goledbali dii-wied danidaed.
Gaya-isgana-sunmakedbali, neg-urwed noardaed.
24 Ome-ursili-ebo neg-dummadgi-megedbali, bur nabirsursi,
neg-sukungwaba-meremair.
25 Igi-uku-uku-itolegedgi dii-dambipigwad gobledae,
deyobi, gayaburba-nuegan dikasur-danikir, itoledaed.
26 Dule-innikidaedi, dule-isgana-abin sikirmakele, dii-isgumaidaeyobi gued.
Diagi-ib-isgana-mileddaeyobi gued.
27 Achanis-gadi-maele, ichakwagwad.
Dukin-san-dummarba-imaked-amiedi, ichakwabalid.
28 Dule-san-bargaed-wissulidi,
neggwebur-galu-matusulid-sateyobi gued.