6
Emar-anar-mani-bennukedgi mer be binsao
1 Machi, dule-mani-gasad-anar, be bennukoye sogsale,
igidibe, dule-baidga, be bennukoye igar mesisale,
2 na be imakoye sogsadgi,
na be dukin yardaklesdo.
3 Degisoggu, machi, emidi be-aise be yardaklesad.
Ar agi be ollorgubiele, weyob be imaksunna:
Ese be nae, egi be wilenae, ega be sognae,
an-bega-bennukoye-sogsadi, be anga osuloye.
4 Melle be ogabe,
melle be banega saboge.
5 Igi goe-sapur, dule-e-makbied-idu wakinne,
deyobi, dule-be-yardakbiedgi be wakinmoga.
Igi nuu dule e-gabied-idu wakinne,
deyobi, dule-be-yardakbiedgi be wakinmoga.
Melle dule-wiegalaga guo
6 Dule-wiegala, nue be igli dake,
e-ibmar-imaked nue be dake,
binsaed-nikaguega eba be durdake.
7 Igli, ega-igar-uked sated,
e-dummad sated, e-idued satebalid.
8 Degi-inigwele, dii-wisulidgine na e-mas onmaked,
ibmar-durba-weleged-ibagine na e-mas onmakdaed.
9 Dule-wiegala, be meremaidi, ¿sanadse gwisguoye be soge?
¿Sanadse gabmaid be atakoe?
10 Be gabsiile, nono-yakumaksiile, sikwas napi-gabele,
sakwa-bipirmakar wis obunnosiile,
11 ukiarmakale, dule-atursaeyobi, begi wileged nonikoed.
Ukiarmakale, dule-negsuligudiidyobi, begi ibmarsuligued yolenonikoed.
Dule-isganamar-e-odurdaklegoed
12 Dule-isgana, dule-galagwensuli-nanaed,
dule-gakansaedginbi-gudiid,
13 dule-yardakega, ibya-biri-emar-daked,
dule-yardakega googi sunmaked, naggi sunmaked.
14 We-dulemar unnila ibmar-isgana-imakedginbi binsadidaed,
aimar-ourwed yeer-itodaed.
15 A-ulale, ukiagwar egi bonigan yolenonikoed,
ukiagwar berguoed.
Bab-Dummad ibmar-sogagugle (7) isdar-daked
16 Bab-Jehová ibmar soganergwa (6) sae-daked,
napi-ibmar-sogagwenad-baid bur-bela-bela isdar daked.
We-ibmarmar-sogagugled (7) isdar daked:
17 Dule-na-san-dummarba-imaked,
dule-gadi-gakansaed,
dule-binsarsunna-aimar-gindaked,
18 dule-galagwensuli-dule-baidgi-binsaed,
dule-ibmar-isganabi-imakdidaed,
19 dule-ibmar-daksad-gakansaar-ibmar-soged,
gwenadgan-gwenadgan-ourwed-dule.
We-ibmarmar, Bab-Jehová isdar daked.
Be-sergan-bega-sunmakedba be ibsae
20 Machi, be-bab-be-odurdakedba be ibsae.
Be-nan-be-unaedba, be dae.
21 Be-gwagegi-sedigu, be imake,
ordub-be-dukargi-naiyob, be imake.
22 We-binsaed-nuegan, be bia nadele, be-idumai guoed.
Be gabidele, be-edarboed.
We-binsaed-nuegan, be atakar-sogele, bega sunmaknai guoed.
23 Igarmar-Mamaidi, gwalluyobi gued,
ibmar-odurdakleged neg-meegwadyobi gued.
Igar-nuegan-mamaidba-nanalegedi, be-odurdakoed igi be nanaergebe.
Abirgunagwarsuli-nanalegedgi bangued
24 We-binsaed-nuegan, melle be ome-isganabo galagwensuli nanadiguega be-imakoed.
Melle be ome-sui-dikarba-galagwensuli-gudiidbo nanaega be-imakoed.
Melle we-ome-e-ibmar-nued-sogedgi be binsaed-galediguega be-imakoed.
25 Melle ome-isgana-e-yeerdaklegedbina be sogo.
Ome-isgana be-dakedgi, melle ese be-binsaed galego.
26 Ar ome-gambanuchu-imaked unnila masbina gudiid.
Ome-sui-dikarba-yolegeddi, bela be-sanbina sogdiid.
27 Ar dule na e-nukugi soo-sisale,
¿ei mor gummaksasulir be insae?
28 Ar dule soo-birgi nanaele, ¿ei nag gummaksasulir be insae? Ei gummaksale.
29 Dule, dule-baid-ome-ebo negsichigi nanaedi, soogi-gummakeyob boni-amiedsemogad.
30 Dule-atursaed ukudmaada-itogedba ibmar-atursasale,
¿isdar dakdamarsursi?
31 Dule-atursaed daklesardi, ilagugle (7) ibmar-atursasad bennukoed.
Sulirdi, bela e-neggi-ibmar-nikad ukoed.
32 Dule ome-baidbo negsichidgi nanaele, we-dule, binsaed-satedid.
Dule deyob-daedi, na dukin san-wioged.
33 Unnila binged-amiedid, na dukin naibid-amiedid.
E-nug-gagalesad gwen ega alliosulid.
34 Ar we-ome-e-sui nobedba uludele, na san gwen bargaosulid,
igi-barsaye gwen sogosulid.
35 Dule amba ome-e-suiga ibmar-ukye sogele,
gwen abingaosulid.
Ar amba ega ibmar-dummarba-ukye sogele,
igi-barsaye gwen sogosulid.