41
1 Bab-Jehová weyob sogdebalid:
“¿Sunna be ibdula-Leviatánʼye-nugadi, achwergi be sosale?
¿We-ibdula-e-gwabin sunna dubgi be edichale?
2 ¿Sunna e-asumurgi dub be nasiksale?
¿E-aku sunna esgoro-swiswidikidgi be boodo imaksale?
3 Ar we-ibdula-Leviatánʼde, ¿nuedgi bese ibmar-egisosi?
Ar bega sogosi, wile be an-dakye.
4 Ar be-maiga-guega,
¿bebo igar-mesosi?
5 ¿Sikwibo-dodolegeyob be we-ibdulabo dodosale?
¿Be-bunamala egi dodogega, ega be dubgi edichale?
6 ¿Sunna dule-ibmar-ukmaladi we-ibdula uksamalale?
¿Sunna dule-ibmar-ukmaladi ibdula-Leviatán-goamakar uksamalale?
7 ¿Sunna we-ibdula-e-uka esgi-siksar be itoge?
¿Sunna arbon-suargi-makar e-nono bayosar be itoge?
8 Ese be achaena, ebo be urwena.
Ar bar be ese achaedgi binsassuliled, mer bar deyob guena gadinye be binsasaled.
9 Mer be binsao, an we-ibdula baisursunna gaoye, unnila e-daklegedbi unnid.
Ar unnila be dakdele, bato be negoedbinneled.
10 We-ibdula-Leviatánʼse dule gege achaed.
Degite, ¿doa an-abindi nabir gwisguosunna?
11 Ar bela napneggi-ibmar-bukwadi angadbiid.
Degisoggu, doa anga sogosunna, be angi ibmar ganiye.
12 ”Ibdula-Leviatán-e-malimargi an sunmakergebed,
e-gargangued-dutusulidgi, e-dakleged-yeerdunguedgi an sunmakergebed.
13 ¿Doa e-ibe e-uka edarisale?
¿Doa ese warmaksale?
¿Doa e-ibe e-gaya edichabalile?
14 Ibdula-Leviatán-e-nugarmar-swiswimakaled-dakegala,
¿doa e-ibe e-gaya-mee imakoe?
15 Ibdula-Leviatán-e-yargan, sigu-abgaed-senigana-daklegeyob madar-madar nanaid,
akwayob dachak-dachak nanaid.
16 Bela e-ukamar-madar-madar-nanaidgi ollor naisulid,
degine, burwabela egi geg doged.
17 Bela e-ukamar-abingunanaid, ise achamakar nanaid.
Gege dule e-ibe ollo-ollo imaked.
18 We-ibdula-Leviatán asmidele, mar-ibyeyob asmied.
E-ibya-gaedi, dad-ibelergaeyob gaed.
19 E-gayabali, soo gwabunyeardaed,
ditismakar soo ainiardaed.
20 E-asa-yabali, waa bupurmakardaed,
dii-gwakwarmaknaid-birgi waa-bupurmaknaidyobi bupurmakardaed.
21 E-bunnogedgi soo ogaed,
e-gaya-yabali, soo mied.
22 Ibdula-Leviatán-e-gargangued e-dukargi siid,
e-abinni bela dulemar niga argwatedamalad.
23 E-san-nikadi sommereged, egi geg ibmar doged.
E-sanmar-bur-dutugwadbela, amba selelleged.
24 Ibdula-Leviatán-e-binasgar akwayob dutusulid,
ibmar-gwag-naged-akwayob gangued.
25 Ibdula gwisgudele, ese gwakiddamalad.
Binnasurgualile, bela idu duurmakdedamalad.
26 Es-suid egi gwisgunonikile, gege bayoged.
Arbon-suarmarbela, sigubela, degi, ibmar-swiswidikidbela, gwen bayosulid.
27 Ibdula-Leviatán esgoro-suar gaganyobi ibigwensur daked
esgoro-gordikidbela urgo-nunudyob daked.
28 We-ibdula-Leviatán sigumar dobsulid,
akwamied-dubgi-akwa-milegedbela ibmar-dutukwayob daked.
29 Mardo-dummadgi sarsolenaile, baisur-itoged,
egi gagan iir-iir-gunaiyob itoged,
eswar-suid-goled yeer-itodaed.
30 Ibdula-Leviatán-e-dikarmar nugaryobi swichwi-swichwi dakleged.
Unimakdedibele, gwala-esgorobiidgi neg-durwilesayob e-gannarmar megisdaed.
31 Ibdula dii-urba-burdidele, dii-gwakwarmaknaiyob neg-imaked,
ina-wawad butegi-sik-sik-imaklenaidyob neg-imaked.
32 E-sorbali, e-igar dagudik diigi megisdaed,
sailagia-sibudikidyob e-igar makumakar megisdaed.
33 We-ibdula-Leviatán gwen ibmar dobsulid,
ibdulamar we-ibdulayob-dakleged gwen nikasulid.
34 We-ibdula-Leviatán, dule-bulegan-sogdimalad-mesagwar imaked,
degine, bela ibdula-ursilimalad-e-reyga maid.”