5. ELIÚ-SUNMAKSAD
32
(32:1–37:24)
Eliú sunmakdemogad
1 Job-e-aimar-warbaagwadi magar-itosmargua, Job na ibmar-oakalodisurye-sognaidi, bar abin-imaksasurmalad. 2 Degine, sapin-gwensak Eliúʼye-nugadi, Job-sunmaked-itosgua, Jobʼde inniki-gudiiye, degine, Bab-Dummad egi ichakwa-binsamaye sogsad-itosgua, Jobʼse sabsur-uluded. Eliúʼde Baraquel-machid, Buz-e-wagwad, dad-dummad-Ramʼgi danikidid. 3 Deginbali, Eliú, Job-e-aimar-warbaagwad nue-Job-abin-imaksasurmaladba, degi, Jobʼgi-ataknaigusmaladba amargi uludbalid. 4 Eliú iduar sunmakbigusanad. Ar Eliúʼdi bur sapingwasoggu, e-aimar-eba-selegan-inse Jobʼga sunmaked edarbisgweled, adi, a-sorba sunmakegar. 5 Ar Eliú dakdegua, e-warbaagwadi, gwen bar sunmaksurmala, degidbali, na san bargassuli, nue-ulude gusad.
6 Geb Buz-e-wagwa Baraquel-machi-Eliú sunmakded. Weyob sogded:
“Andi amba bemar-imbagi sapingwagwad, bemardi bato uka-sele-selebagusad.
A-ulale, an bemar-abin-sunmakegala, dobe sunmakdaed.
7 ‘Bur ibmar-wismalad-inse sunmakmaloye, an binsasad.
Uka-selebamalad-binsaed-nikamalad-inse, neg-dakdiidba sunmakmaloye an sogsad.’
8 Bab-Dummad-Bela-Gangued-Nikad-e-burba,
dulegi-maidi magar neg-ito emar-imaked.
9 Dule-serganbi binsaed-ibegan gusulid,
dule-birga-seleganbi magar-ibmar-ito gusulid.
10 ”Degisoggu, bemar, nue be an-itomalo,
an ibmar-soggwen-soged nikamogad.
11 Bemar sunmaknaigua, boo an bemar-itosad.
Bemar-binsamalad, degine, bemar binsaed-akar-akar-sognanaigusmalad, an nue itosad.
12 Nue an bemar-itosii gusad, bemar gwen oyossulid, Jobʼde nue-nodii gusye.
Deginbali, Job-sunmaksad bemar nue-abin-imaksasurbalid.
13 Mer be anga sogmalo:
‘Anmar binsaed-nikaa gumarye.
Bab-Dummadbi Job-abin-imakye,
dulemardi Job-abin-imaksurye.’
14 Job anga sunmaksasursoggua,
an bemaryob Jobʼga ibmar sogosulid.
15 ”Job, wemar-warbaagwadi gege bar be-abin-imakmalad,
ar aku itonanaid, e-binsaed galakudmalad.
16 Wemarde bar sunmaksurmarsoggua,
¿geg an bar sunmakmosunde? Suli. Andi sunmakoe.
17 An ibmar-soged nikamogad,
an-binsaed an bega sogmogoed.
18 An ibmar sogebier-itosoggua, burba-angi-maidi sunmakebier an-imaksoggua,
an ibmar sogmogoed.
19 An-gwage-itolegedi, vino-e-bugluyaba-mus-musmaksiiyob an itoged.
Vino e-buglu-binidgi-siidyob-marebieyob an itoged.
20 An sunmakergebed, adi, an nabir ollorgudoed.
An bega ibmar sogergebed.
21 Emarba-nai an sunmakosulid,
emar-nabir-obinsaega an sunmakosurbalid.
22 Yogasaar-gakansaale an emargi nued sunmakosulid.
An deyob imakdele, Bab-Dummad-we-napnegse-an-odenonikid, sabsur-an-odurdako itole.”