3. BINSAED-NUEDGA-NAMAKLEGED
28
(28:1-28)
Binsaed-nuedgi yeer-sunmaklenaid
1 Job sogdebalid:
“Manimala, ormala napa-urba amileged,
sooyagi diree imaklesiid.
2 Esgoromala, napa-yaba onolesiid,
esnon-goromardi akwamargi onolesiid.
3 Dule-akwa-nuegan-amimaladi, bar negsichid-nai daksurmalad.
Negsichidgi-akwamar-bukwadi ese onilebukwad.
Yaamargi-akwa-nuegan-nikadi bela onimalad.
4 Neg-uluba-nanaledisulidgi yaamar akwimalad.
Matusuli yaa akwimalad.
Dubba bannumakar aidedamalad.
Dulemargi dikasuli neg-urba gunanaidamalad
5 Yaa-matusulidgine arbananaidamalad,
neg-uere-itoledaed-yabali gunanaidamalad,
abali, masgunned amididamalad.
6 A-yabali, akwa-dummagangine akwa-nued-zafiroʼye-nugad onomalad,
a-napa-yabali, or amimarbalid.
7 Sulubmar we-yaa-gwisaled dakdisurmalad,
sulub-e-atakedi, we-yaa-gwisaled-e-gulluse ataksulid.
8 Ibdula-ursirmaladbela, a-yaa-gwislegaledyaba dogdisulid.
Achumigurbela ese walikgudisulid.
9 Dule-akwa-nuegan-amimaladi akwa-nuegan-amiegale, akwa-dutusulid sarsonagusdamalad,
akwa-e-sailamarse-bakale, onodamalad.
10 Akwa-dummagan-akwimalad a-yaba dii-oiirmakega yaa-dummagan omesdamalad.
Dii-iirmakmaidbali akwa-nuegan-bukwadi bela magar dakdamalad.
11 Akwa-nuegan-amiegala, diwar-e-sailase warmakdamalad.
Ibmar-dukuar-bubukwad bela negache onodamalad.
12 ”Degite, ¿bia binsaed-nued-nikagued danisunna?
¿Bia gurgin-nuegan-nikulegedde danimosunna?
13 Binsaed-nued-gargeguedi dule wissulid.
We-binsaed-nuedi we-napneggi danisulid.
14 Muu-billi-maidbela soged:
‘Binsaed-nuedi, angi danisurye.’
Demarbela sogmogad:
‘Binsaed-nuedi, angi amilesurmoye.’
15 Or-nuegangine, binsaed-nuegana amilesulid,
manigine, binsaed-nuegana baklesulid.
16 We-napneggi amba or-Ofir-bukwadgi binsaed-nuegan gege bakleged.
Amba akwa-nued-óniceʼye-nugadginbela gege bakleged,
akwa-nued-zafiroʼye-nugadginbela gege baklebalid.
17 Binsaed-nuedi, bur or-nueganba, akwa-diamanteʼye-nugadba bur gargerbasailad.
Olua-or-nuegangi-sobaledbo geg binsaed-nuedi ogwaleged.
18 Binsaed-nuedi, akwa-bisgi-nueganba ibnuedid,
dimmurgiid-e-akwa-yeerdaklegedba bur sunsogedid.
19 Akwa-nued-topacioʼye-nugad Etiopíaʼgi-nikadi, gege binsaed-nued-nikagued-ebo yobi gued.
Binsaed-nued-nikaguedi gege or-sunsogedgi bakleged.
20 ”Degite, ¿bia binsaed-nued-nikaguedde danisunna?
¿Bia gurgin-nuegan-nikulegedde noarsunna?
21 Binsaed-nued-nikagued bela emargi dukumaid,
nuumarbela gege binsaed-nued-nikagued baramimogad.
22 Bergulegedi, degi, burgwedi, weyob soged:
‘Unnila, anmar binsaed-nikagued-e-nug-dummarba-guedbi itodimoye.’
23 ”Unnila Bab-Dummadbi binsaed-nikagued-igar wisid.
Binsaed-nuedi bia daniki, bia binsaed-nikaguedi amilebali, nue-wisbalid.
24 Bab-Dummadi, we-napneggi galu-sukunmar-bubukwadse-bakale, wisid.
Soggwensaale, napneggi-ibmar-bukwad gwen egi yoggusisulid.
25 Bab-Dummadi, burwaga e-gangued mesnaigua, degine, muu-billiga e-dungued mesnaibargua,
binsaed-nued-nikaguedi daksagusad.
26 Bab-Dummad, dii-wiedga igar mesnaibargua,
mar-goledga igar mesnaibargua,
27 binsaed-nued-nikaguedi daksagusbalid.
Bab-Dummadi binsaed-nued-e-gargegued daknaigusbalid,
degine, binsaed-nued-nikagued wilubdaknaigusbalid,
geb binsaed-nued-nikagued bargannononikid.
28 Bab-Dummad dulemarga sogded: ‘An-dobekwaa-nanaedi, binsaed-nued-nikaadaedye.
Degine, ibmar-isgana-imakedgi-banguedi, ibmar-wisi-daedbarye.’ ”