1 Isaac bato nue selebagusad, degi, aku-atakgusbalid. Ibagwengine, Isaac, e-machi-dummad-Esaúʼse gochad. Geb ega sogded:

—¡Machi!

Esaú abin-sogded:

—Degite. ¿Ibua?

2 Geb Isaac sogdebalid:

—Mag be an-daked, an nue-selebagusad. Ukiar sunna an burgwed. 3 A-ular, sapurba-nabi an be-abedo. Anga ibmar-maknaega warsi be sedo, sigu be sedbalo. 4 Ibmar be maksale, an mas-gunbidaedyob ise-nue-imakar be anga mas saoed. Geb we-mas-gunnega be anga sedagoed. A-sorba, an-burgwed-iduar, ise-nued-an-begi-binsaedgi an bega ibmar sogoed.

5 Isaac-Esaúʼga-ibmar-sogsadi, Rebecaʼdi bela itosad. A-ular, Esaú sapurba e-babga ibmar-maknadgu, 6 a-sorba, Rebeca e-machi-bipigwad-Jacobʼga sogded:

—Nue be an-itogo. Be-bab, be-ia-Esaúʼga sunmakgwisgu, ega-soge an itosad: 7 ‘Sapurba be ibmar-maknaye, a-mas ise-nue-imakar anga be saoye. Geb an burgwed-iduar Bab-Jehová-asabin, an-begi-ise-nued-binsaedgi an bega ibmar sogoye.’ 8 Machi, degisoggu, nue be an-itogo. An-ibmar-bega-sogoedba, bela be imako. 9 Degisoggu, sibadmar-bukwadse be nae, sibad-mimmi-senigwad-warbo-bur-nuedid be anga sedago. Be-bab mas-gunbidaedyob an ise-nue-imakar an ega mas saoed. 10 Geb degine, be-bab a-mas-gunnega ega be sedoed. Adi, be-bab e-burgwed-iduar, ise-nued-binsaed bega sogoed.

11 Ar Jacobʼdi e-nan-Rebecaʼga sogded:

—Ar nabir be sogendo. Ar an-iadi wawaad. Andi degisulid. 12 Ar an-bab an-abagan-ebualile, mag an-itogoed, ande an Jacobʼad. Geb angi binsaoed, an egi dodonaiye. Ar bur an-ukabsaoed, ise-nued-angi-binsaed bar anga sogosulid.

13 Ar e-nandi Jacob-abin sogded:

—Machigwa, be ukabsaleye sogele, ani an ukabsalegoed, bedi ollordo. Degisoggu, an-ibmar-bega-sognaidba be imake. Sibad-mimmi-senigana-warbo be anga sedage.

14 Jacob sibad-mimmi-seniganabina naded. Geb e-nanga senonikid. Agi e-nan Isaac-mas-abedaedyob sibad-e-san ise-nue-imakar imaksad. 15 Geb degine, Rebeca, e-machi-dummad-Esaú-e-mor onosad. A-morde bur mor-nuedid, e-neggi ise-nue-saboar bukwad. Agine, Rebeca e-machi-bipigwad-Jacobʼga a-mor-yoega uksad. 16 Geb deginbali, Rebeca sibad-bipi-e-uka-wawaadgi Jacob-e-surgan, degine, e-dukarba obipirmaksad, bia absarsuli-nanaedgi nasiksad. 17 Geb degine, Rebeca mas ise-nue-saale Jacobʼga uksad, adi, Jacob e-bab-Isaacʼga ukegar. Geb madu-imaksadi ega uksabalid.

18 Geb degine, Jacob, e-bab-siidse dogdapid, ese gordapid:

—¡Baba!

Isaac abin-sogded:

—An wegi sii. ¿Be biti-an-machi?

19 Jacob abin-sogded:

—An, Esaú, be-machi-dummad. Be anga-sogsadba bato an imaksad. Baba, be-dage. Wis wese be sigdage. An-ibmar-maksad be gundage. Geb be ise-nued-angi-binsaed be anga sogoed.

20 Geb degine, Isaac e-machiga sogded:

—Machi, ¿igi nabir bato be ibmar abingusbinne?

Jacob e-bab-abin sogded.

—Bab-Dummad-Jehová gwae-gwae ibmar-abinguega an-bendaksad.

21 Ar e-bab-Isaacʼdi abin-sogded:

—Anse be dage, an be-ebubie, bule be an-machi-Esaú-sunnaddibe.

22 Jacob e-bab-walikaa naded, adi, e-ebugegar. Geb degine, Isaac sogded:

—Be-sunmaked Jacobʼyob be sunmaked. Be-sakwamardi Esaú-sakwamar an itoged.

23 Isaac Jacob-e-sakwamar e-ia-Esaú-sakwamaryob absar yaisur-itossoggu, Isaac magar-itossulid. A-ular, Isaac ise-nued-binsaed Jacobʼga soged-iduale, 24 gannar Jacobʼga sogded:

—¿Ar nue be an-machi-Esaú-sunnadi?

Jacob abin-sogded:

—Eye, an Esaú-sunnadi.

25 Geb degine, e-bab Jacobʼga sogded:

—Machi, anga be mas dake, adi, be-ibmar-maksad an gunnegar. Geb a-sorba, an-ise-nued-begi-binsaed an bega sogoed.

Jacob e-babga mas daksasunnad, degi, ega vino senonibalid. Isaac nue-mas-guchad, degi, nue-gobsabalid. 26 Geb degine, Isaac Jacobʼga sogded:

—Machi, anse be dage, be an-wagar udage.

27 Jacob e-bab-wagar-uega e-bab-walikaa nonigua, e-bab, Jacob-mor-yoid usad. Geb degine, Isaac, Jacobʼgi-nued-ise-binsadedba, ega weyob sogded:

30 Isaac, ise-nued-binsaed-Jacobʼga-sognaid bergusgua, Jacob nodeyalaba, Esaúʼdi sapurba-ibmar-makdiid dognonikid. 31 Esaú mas nued-gulle e-babga imaksamogad. Geb e-babga sesa gusad, ega sogdapid:

—Baba, be gwisgu. Be-machi, bega ibmar-maksad be gunne, be-angi-ise-nued-binsaed be anga sogsun.

32 Geb degine, Isaac, Esaúʼga sogded:

—¿Be doa-dule?

Esaú abin-sogded.

—Ani, an Esaú, be-machi-gebesailagined.

33 Isaac geger-itoged, nue-wawanmake sogded:

—Degite, ¿wede doa be-iduar ibmar-maksad, yeer-gulle anga senonisunna? Be-nonikid-iduar, dule-anga-mas-senonikid bela an guchad. Bato be-iduar-dule-arbidga, egi ise-nued-binsaed bela an ega sogsad. Ar emigindi, bato egi ise-nued binsalessunnad. Geg bar an oakaloged.

34 Esaú, e-bab weyob ega soge itosgu, nue-nunmak binnasur ise-ogormakar boded.

Geb e-babga sogded:

—¡Baba, ise-nued-binsaed be anga sogmoga!

35 Ar Isaacʼdi e-machi-abin sogded:

—Be-urba bato anse arbid. An-yardaksad. Ise-nued-binsaleged begadinad, be-ibe atursasad.

36 Geb Esaú sogded:

—¡Ar nabir ega Jacobʼye nug nasiksamala! ¡Ar emide ilabogus an-yardakdanikid! Gebe unni, an machi-sailagined-guedba anga ibmar-uklegoenad an-ibe susad. Emide, angi ise-nued-binsaleged an-ibe susbalid.

Esaú sogdebalid:

—Baba, degite, angi ise-nued-binsaleged, ¿wis be anga obessuli?

37 Geb degi, e-bab-Isaac abin-sogded:

—Be-dummadga-gued-igar Jacobʼga an uksad. Bela e-gwenadgan e-maiga-gued-igar, an ega uksabalid.

”An-ise-nued-egi-binsaedba, an ega sogsabalid: Bitigi orosgi-dakleged-bukidar nikuena gadinye, degine, vino-bukidar nikubalina gadinye. Ar emigindi, machi, ¿igi-bar-an-saosunna?”

38 Esaú e-babgi alamaknai gusad:

—¿Baba, be-ise-nued-binsaed wis soggwensaar geg be anga soge? ¡Be angi ise-nued binsamoga!

Degine, Esaú gannar ise-ogormakar bodbalid.

39 Geb, Isaac na e-machi-Esaúʼga sogded:

41 Weyob-gusad-akale, Esaú, Jacob-sae-dakded, ar ade, e-annik ise-nued-egi-binsaleged egwachad. Degisoggu, Esaú binsadisunnad: “Emisgwasaar an-bab-burgosoggu, aba anmar bukib-binsadii guoed. A-sorbali, an-urba-Jacob anse oburgwilegoye.”

42 Rebeca wisgusgu igi e-machi-dummad-Esaú binsadii, e-machi-bipigwad-Jacobʼse gochad, ega sogded:

—Be-ia-Esaú be-oburgwebi gudiid. Yamo baisur-itogeyob gudiid. 43 Degisoggu, machi, nue be an-itogo: Emisbinne, Harán-neggweburse an-sus-Labán-e-negse be wakinne. 44 Agi, be-ia sae-itoged baisur-ito-gusadse be undar gudii guoed. 45 Be-ia-Esaú ibmar-iegedse be gudii guoed. A-sorba, be gannar-dagega an be-owisogoed. Ar iba-galagwengi an-masmala-warbobela an surgubisulid.

46 Geb degine, Rebeca e-sui-Isaacʼga sokalid:

—Esaú, Het-dule-e-sisgwa-nikusad-ular, an budar-itogusad. We-Canaán-yargi Het-dulemar-bukwad-e-sisgwa-wargwen-weyob-damogadi Jacob nikusale, ar an bur burgwed, nabirid.