2
1b. Salomón Bab-Dummadse-goled-neg sobsad
(2:1–5:1)
Salomón Hiramʼbo igar-mesisad
(1 Reyes 5:1-18; 7:13-14)
1 Rey-Salomón, Bab-Jehováʼga Babse-goled-neg-sobye binsaalid, degi, e-reyneg-sobedgi binsaarbalid.
2 Degi, Rey-Salomón ibmar-imakmalad nugsasad:
Dule-ibmar-semalad, mili-dulapaa-gakambe (70,000) nug-imaksad.
Yalaganba dule-akwa-sikmalad, mili-dulabake (80,000) nug-imaksad,
Arbamalad-e-dakmalad, milipaa gaka dulataled-ilanergwa (3,600) nug-imaksabalid.
3 Geb degi, Salomón Tiro-neggwebur-e-rey-Hiramʼga gayaburba barmisad:
“An-bab-David e-reyneg-sobnaigua, igi ega be urwar-urgomar barmimai-gusa, deyobi, be anga imakmogana gadin. 4 Emide, an-Bab-Dummad-Jehováʼga, e-nug-odummogega, ese-goled-neg an ega sobesokalid. We-negde an Bab-Jehováʼga nug-imakoed. Adi, an Bab-Jehováʼgarbi e-asabin inamar-wawadikid ogumakdii guega, degi, bane-bane madu-swilidikid-urbedii guega an imakoed. Deginbali, agi an wakudaradbali, degi, sedogidbali ibmar-durgan ogumakar Bab-Dummadga-ukega an imakbaloed. Amba deyobbardo: Itoged-iba-irba, degi, nii-gebe-gwisgusar imaklebaloed. Deginbali, anmar-Bab-Dummad-Jehová-nug-odummoleged-e-ibagangi deyobi imaklebaloed. Degiibi igar-mai Israel-dulemar degisadegu imakdii guoed.
5 ”Ar anmar-Bab-Dummad, bab-dummad-baiganba bur bule dule-dummad-maisoggu, an ega neg bela-bela bur-yeerdakle an sobergebmogad. 6 Degi-inigwele, nibnegbela amba Bab-Dummadga unniguarsulid. Degite, we-neg-bursunna ¿sunna unniguosi? Geg unnigued. ¿Ar ande doasunna, ega we-neg-nued sobega? Andi an ega we-neg sobewilubsulinad. Degi-inigwele, Bab-Jehová-nug-odummogega, an neg soboed, adi, agi ega ina-wawagan-ogumakegar. 7 Degisoggu, dule-wargwen-ibmar-wisid an abeged:
Dule-nabir-orgi-arbaed, nabir-manigi-arbaed,
nabir-esgoro-gordikidgi-arbaed, nabir-esgorogi-arbaed,
a-dule be anga barmidago.
”Degine, we-dule-ibmar-wisid nirba-suir-akwagiid, nirba-ginnid, nirba-arad-nabir-imaked, an abeged. Deginbali, dule-ibmar-sobar-sobar-nasiked-wisid an abeged. Ar a-dule-amilegoedi, an-bab-Davidʼga-epenne-arbasmaladbogwa-arbanai an abeged. Amar Judá-yargi, degi, Jerusalénʼgi arbamaloed.
8 ”Deginbali, Líbano-e-urgomar anga barmidabalo: Urwar-urgomar, baryawar-urgomar, sapi-gupu-wargii-dakleged-urgomar-sándaloʼye-nugad barmidago. Ar an wisid, be-sordamar Líbano-urgomar-mamaredgi durdakaled. Degine, dule-anga-arbamalad be-sordamar-bendakmaloed. 9 Adi, amar anga urgo-bukidar mamarmalagar. Ar ade, an Bab-Dummadse-goled-neg-dummad, bela-bela yeerdakle an sobesokalid.
10 Be-sordagan-urgo-mamarmaloedga orosgi-dakleged-omukualed-trigoʼye-nugad,
sagu-dummagan mili-durgwen (20,000) an ukoed.
Degi, orosgisaar-daklemogad-cebadaʼye-nugad,
sagu-dummagan mili-durgwen (20,000) an ukbaloed.
Degine, vino,
galón-mili-dulatar-gakambe-gakatar (115,000) an ukbaloed.
Degine, ibmar-dibyed-gwallu,
amba galón-mili-dulatar-gakambe-gakatar (115,000), an ukbaloed.”
11 Geb degine, Tiro-e-rey-Hiram, Rey-Salomónʼga gardagi e-gayaburba narmakar barmialid:
“Bab-Jehová na e-dulemar-sabedbali Israel-yar-seega be-imaksad.”
12 Hiram wegii sogsibalid:
“Israel-e-Bab-Dummad-Jehová-nug odummolesun. A-Bab-Dummad nibneg, degi, napneg obinnisad. Degine, Rey-Davidʼga machi-binsaed-ibed uksad. We-machide mag neg-itoged, mag ibmar-daked, nue-binsaed-nikad. We-machi Bab-Jehováʼse-goled-neg soboed, degine, ega reyneg sobbaloed.
13 ”Degisoggu, dule-wargwen-odurdakedsaila-bela-ibmar-wisid an bega barmido. We-dulede, Hiram-Abiʼye-nugad. 14 We-dule-e-nandi, Danʼginedid. E-babdi, Tiroʼginedid.
Ar Hiram-Abiʼdi, bela ibmar-wisid:
Or-sobed, mani-sobed, esgoro-gordikid-sobed,
esgoromar-sobed wisbalid.
Degi, akwagi nabir arbabalid, urgogi arbabalid.
Deginbali, Hiram-Abi nirba-suir-akwagiid-imaked,
nirba-arad-imaked, nirba-ginnid-imaked wisbalid,
degi, nirba-linoʼye-nugad imakbalid.
Deginbali, Hiram-Abi ibmar-e-itoleged galagwensuli-sobar-sobar-imaked wisbalid.
”We-dule, be-dulemar-ibmar-wismalad-abargi, degi, be-bab-an-dummad-Davidʼga-arbasmalad-abargi arbaoed.
15 ”Dummad, emisgi, anmar-bega-arbamaloedga we-ibmarmar be barmidage:
Orosgi-dakleged-trigo, orosgisaar-dakleged-cebada,
olivo-gwallu, degine, vino,
be anga-sogsadyob be anmarga barmidado.
16 ”Anmar Líbano-yargi urgomar-abeleged mamarmaloed. Geb we-urgomar edinnar-edinnar-nanai, demargi-oselegar Jope-neggweburse an sedmaloed. Geb agi, Jerusalénʼse be urgomar sedmosunnoed.”
17 Salomón-e-bab-David dule-ainebarmalad-ebichisgusad-sorba, Salomónʼdi, dulemar-ainebarmalad-Israel-yargi-gudimalad bela ebichismogad.
Belagwable, mili-dulagugle-gakambe-gakapaa gaka dulataled-ilanergwa-mergu (153,600) daklealid.
18 Rey-Salomón, a-dulemar mili-dulapaa-gakambe (70,000) ibmar-berbemalaga onug-imaksad.
Degi, mili-dulabake (80,000) yar-mulluganba akwa-sikmaloed onug-imaksabalid.
Deginbali, arbamalad-e-dakmalad sordamar-oarbaega, milipaa gaka dulataled-ilanergwa (3,600), onugsasbalid.