Mak
Olo Hungkuno Wopɨngo loso Mak Mtɨꞌmokumentisofoho.
Olo Hungkuno Sɨmoꞌmjofoho.
Jisas ahwomomneꞌno nto sɨmentiso sohonta soswo sɨfe aho hopiꞌnono mofonepo nto uyokolofahonɨngki Mak olo iyoswo loso mtɨꞌmokumentisofoho. Mak sohwo yofe hufaꞌunjo hweho. Nomꞌne yofeso olenoho. Jounɨyoho. I osoꞌno yofe hiso nehmꞌno huꞌmo ole: Joun Makɨyoho. (Oso hungkuno hiso Apousel sohe engo 12 honɨngkano weꞌe 25. Osopo weho.) Mak sohwo yofe hufaꞌu mulinyo hwapɨngoso ole: Yofe Makɨyeso Ngkɨlik hungkuno mtaꞌangofoho. Yofe Jounɨyeso Hipɨlu hungkuno mtaꞌangofoho. Makɨye naꞌusi Maliyafoho. (Oso hiso Apousel sohe engo 12 honɨngkano weꞌe 12. Osopo weho.) Mak huhwo sohwoe konaꞌwohiye ango somo aꞌamu Jisasɨmo inɨngkunyoso aho kuꞌmo kuꞌmɨngo neꞌno uhuꞌmokumotofomnoho. Mak sohwo Jisasɨye inomokomoyo hwoꞌmaho. Oꞌo, Jisasɨye inomokomoyo Saimoun Pitaꞌnji ango Loum sopo syoho imojiye hwaꞌuyoho. Olo iyoswo hiloso Mak ango Loum humanto mtɨꞌmokumentisofoho. Aꞌamu fehohnjo hofɨko huno ole, Mak sohwo Hipɨlu hungkuno soꞌnji Ngkɨlik hungkuno soꞌnji huno moiꞌwoꞌnnyo hweho. Osoꞌno ango Loum sopo Pitaꞌnji nohumanji Mak kako Pitafe hungkuno iwoloꞌmokiyo syoho imojo hweho. Pita kako Anɨtuye hungkunoso Hipɨlu hungkunomo lahonɨngki aꞌamu Loumjoso upaꞌnyoꞌne Mak kako Ngkɨlik hungkunomo iwoloꞌmokumojo hweho. Osoꞌno aꞌamu Loumjo sofe hunoso olenoho. Hwe fihwo kako nɨhuꞌno yokumpohnꞌnyo hwoꞌmanji nakwoe Hwe Engo hweho. Ose syofɨsyontanɨngkofi Mak kako Jisasɨmneꞌno ole ulɨmonto mtɨꞌmokumentisofoho. Jisas sohwo hwe yokumpohnꞌnyo sohwafe yokumpohnꞌnyo somo Jisasɨye yokumpohnꞌnyoso yakolonoho. Jisas sohwo Anɨtuye Hwomu Ne hweho. Kako aꞌamu mnokinoꞌnjo soꞌnji aꞌamu towahuno wonyoꞌnjo somo wopɨngo umokiyoꞌne yokumpohnꞌnyoso hiꞌnjo hweho. Aꞌamu Loumjo somo Mak ose ulɨmonto mtɨꞌmokumentisofoho. Olo iyoswo hiloso Mak aꞌamu Ngkɨlik Jisasɨmo inɨngkunyo somneꞌno mtɨꞌmokumentisofoho. Mak mtɨꞌmokumentiso iyoswo hiloso nakumo huno nafohotofoꞌnefoho. Huno nafohotofo hwapɨngo neso ole: Jisas sohwo yoꞌmayo hopiꞌnono hwaho loponjofe yokumpoynꞌnyo somo yakolownnyo hweho. Osoꞌno nakwo olo iyoswo hiloso atofo lɨhwasi Jisasɨmo unɨngkohwano.
1
Joun Hwe Aꞌamumo Mijo Kiyomaꞌmojo sohwo hungkuno lutɨhwamentisofoho.
(Matɨyu 3:1-12; Luk 3:1-9, 15-17; Joun 1:19-28)
1 Ngko Makꞌni Anɨtuye Hwomu Jisas Kɨlais sohuneꞌno hungkuno wopɨngo wamtɨꞌmokumonneꞌno yohono. 2 Hungkuno ae lomayoso ole. Hohonta Anɨtu kako Aisaiya sohumo hungkuno uyahonɨngki iyoswo ole mtɨꞌmokumento,
Anɨtu kakoe hwomumo ulɨmento,
Upaꞌnyo. Ngko hwe fihumo nje hungkuno motaweꞌne wolɨhwatɨmonnoho.
Oso huhwo sohwo kako kikimo sɨmoꞌmo kupe-eꞌne hweho. Kako jɨje honɨngkano itoꞌno esyohumayoꞌne hweho.
3 Olo hwe huhwo lohwo hwaho aꞌamumo humunyo fiꞌmo hwe fihwoe mampaho engo ole hoꞌnɨmento,
Hwe Engo sohumneꞌno honɨngkano itoꞌno fehumamno.
Kakoe hano emoyoꞌne soꞌno honɨngkano hiso itoꞌno mɨhwatɨmno.
Oso hungkunoso Aisaiya mtɨꞌmokumentisofoho.
4 Oseso Joun aꞌamumo mijo kiyomaꞌmojo sohwo hwaho aꞌamu mohumunyopo iꞌmofaponto aꞌamu piꞌnɨngo uhuꞌmokahonɨngkofi ole lutɨhwamento, Sekwo sekwoe honɨngkano wonyo somneꞌno hohujo ikinjaofɨkujoꞌno Anɨtu kako sekwoe wonyo hiso wae yasemofɨhwasoꞌno ngko mijo wokiyosemaꞌmo. Ose ulɨmentisofoho. Aꞌamumo sekwoe honɨngkano songoso utɨhwayoꞌnefoho. 5 Aꞌamu hwaho Jutiyantaꞌango soꞌnji pone engo Jelusalem mtaꞌango piꞌnɨngo engo soꞌnji Jounɨmo uꞌmantɨfi kakoe hungkuno upaꞌnontɨfi hofɨkoe wonyo yoloho lɨjwaofahonɨngkofi Joun hofɨkimo Mijo Joutan sohumo kiyomaꞌmentisofoho.
6 Jounɨye nemꞌno manjiꞌmofo hwaho fiꞌnjohwe yahu kamel lohwaꞌnji mtɨꞌmokumentisofoho. Yahu paho ahulohoso lohoꞌnɨmentisofoho. Kako kusɨmoꞌnji tɨme mijoꞌnji nɨmojo hweho. 7 Joun aꞌamumo ole lutɨhwamojofoho. Hwe nomꞌnehwo tɨfi noponefoho. Oso hwe huhwo sohwo kakoe yokumpohnꞌnyoso nje yokumpohnꞌnyomo nɨyakolofonefoho. Ngko sohwoꞌni oso hwe huhwo sohwoe yofe engo soꞌno ngko kakimo momayo ulohofiyoꞌne hwoꞌnyoho. 8 Ngko sekumo mijoꞌnohino kiyosemawoꞌnɨngkono. Hwe tɨfinjo sohwo kako Anɨtuye Towahuno Wopɨngonjo sohwo wokiyosemaꞌmontonoho.
Joun Jisasɨmo mijo kiyomahonɨngki Seten Jisasɨmo yamofo ulohoꞌmentisofoho.
(Matɨyu 3:13-17; Luk 3:21-22; Joun 1:29-34)
9 Osohonta Jisas pone Nasalet hwaho Ngkalili ulɨkoꞌmanto Jounɨmo nuꞌmahonɨngki Joun kakimo Mijo Joutan sohumo kiyomaꞌmentisofoho. 10 Jisas mijo mtaꞌango nosɨꞌmofaponto uhwonɨmentisoso ahwomo mtampo lohofahonɨngki Anɨtuye Towahuno yɨhufo ntolofiyo paꞌnyo sohwo Jisasɨmo wekehumapmmentisofoho. 11 Oso hohosohonta ahwomo mtaꞌni ole hoꞌnɨmento, Kɨko nje Hwomu sohwohnneꞌno, ngko sɨmeho wopɨngo mɨkunɨmposo kijapalokweno. Kɨko yoꞌmayo wopɨngo iwoꞌnɨngkino soꞌno nje sɨmeho wopɨngo nɨmoꞌnantofoho. Ose hoꞌnɨmentisofoho.
Seten kako Jisasɨmo yamofo ulohoꞌmentisofoho.
(Matɨyu 4:1-11; Luk 4:1-13)
12 Ose hoꞌnɨngkahonɨngki Mijo Joutanntaꞌango Anɨtuye Towahuno Wopɨngo sohwo Jisasɨmo nomꞌne hwaho aꞌamu mohumunyo iyo yoꞌmayo ane sopono uhwatɨmentisofoho. 13 Osopo Jisas nohumentanɨngki sɨkuno fouti (40) memjaofahonɨngki Seten Jisasɨmo wonyo umokumo lonto Jisasɨmo yamofo ulohoꞌmentisofoho. Oso hwaho sopo sikisɨwojo yoꞌmayoso nohumentanɨngkofi aꞌamu ahwomomjo sohwa Jisasɨmo ufoꞌmaꞌmentohofofoho.
Jisas syoho emayoso Ngkalili ntaꞌni emaꞌmentisofoho.
(Matɨyu 4:12-17; Luk 4:14-15)
14 Hwangku sohonta Helout hwe yofe engoꞌnjo hwaho mokosyohumayo sohwo kako Jounɨmo impoꞌangomo intofahumentisoso Jisas hwaho Ngkalili sopo nowento Anɨtuye hungkuno lutɨhwomaꞌmentisofoho. 15 Ole ulɨmento, Upaꞌnɨmno. Olohonta Anɨtuye sɨkuno mofoneponoho. Weꞌenepi Anɨtu kako kakoe aꞌamu soꞌnyumo yokumpohnꞌnyo enemokosyohumanefoho. Sekwoe honɨngkano wonyo somneꞌno hohujo ikinjaofɨkuji Anɨtumo sɨmeho hiꞌntnnono uyɨmno. Ose lutɨhwamentisofoho.
Hwe osofosofahuꞌno inanɨku syohoꞌnjo sohwamneꞌno Jisas joho ulɨmentisofoho.
(Matɨyu 4:18-22; Luk 5:1-11)
16 Sɨkuno fihwi Jisas Mijo Ayo Ngkalili momɨngopo hano emoyonto uhwonɨmentisoso Saimoun konɨngkwaꞌwehwo Entɨluꞌnji siko inanɨku hoꞌyo mijomo hoꞌnaofontanɨngki uhwonɨmentisofoho. Inanɨku ifamiyoso sikoe hamniyoho syohofoho. 17 Jisas nuhwononto ulɨmento, Siko ngkimo tɨfi nnɨngkapinyo. Siko inanɨku mawoꞌnɨngkisiye paꞌnɨngoso Anɨtumneꞌno aꞌamu mayoꞌne wolosetɨhwamo. 18 Ose ulahonɨngki sikoe inanɨku hoꞌyo komoꞌno nulɨkoꞌmanji Jisasɨꞌnji umentohofofoho.
19 Hofɨko weꞌenepi mitɨmomɨngo somo nokuꞌmokwawentɨfi Jisas uhwonɨmentisoso Sepetiye hwomu sohwaꞌu Jemɨsɨꞌnji Jounꞌnji siko yofayokinomo nohumanji inanɨku hoꞌyo itoꞌno esyohumentanɨngki uhwonɨmentisofoho. 20 Jisas nuhwononto sikineꞌno komoꞌno joho ulɨmento, Oyoninyo. Ose ulahonɨngki Jemɨsɨꞌnji Jounꞌnji siko komoꞌno kanɨngkwohumo ulɨkoꞌmaꞌmentisiyefoho. Kanɨngkwohwo Sepeti kakoe aꞌamu syoho ulohofiyo sohwanji hofɨkoe yofayokinomo nohumentanɨngkofi Jemɨsɨꞌnji Jounꞌnji siko ulɨkoꞌmanji Jisasɨꞌnji umentohofofoho.
Jisas aꞌamu angaꞌnohino sohumtaꞌni towahuno wonyoso wae yaoꞌmentisofoho.
(Luk 4:31-37)
21 Jisasɨꞌnji kakoe inomokomoyo sohwanji nowentɨfi pone Koponeyam iꞌmofawentɨfi sɨkuno Salolemo aꞌamu iyoho fosyohumayoꞌne sɨkuno somo hofɨko aꞌamu Jutafe tajo angomo noswontɨfi Jisas hwe moyaꞌmimo hungkuno lutɨhwamentisofoho. 22 Aꞌamuso hofɨko kakoe hungkunomo upaꞌnontɨfi yomo imentohofofoho. Hwapɨngoso hofɨko aꞌamu honɨngkano hungkuno lutɨhwamotofo sohwa paꞌnyo hwoꞌmaho. Oꞌo, Jisas sohwo kako hungkuno hwapɨngo woꞌnnyo hweho.
23 Osohonta hwe towahuno wonyoꞌnjo sohwo tajo ango homo somo joho mohmꞌno ulɨmento, 24 Jisas Nasaletnntaꞌango sohwosi kɨko nakumo peho wonalohoꞌmneꞌno sopalokuno. Kɨko nakumo wonyo wonamokumonneꞌno losopalokuno. Ngko kikineꞌno huno niyohoho. Kɨko Anɨtuye Hwomu Wopɨngo Ne hwosoho. 25 Ose ulahonɨngki Jisas kako towahuno wonyo sohumo yoka ulɨmento, Mampiꞌnyo fosyohumaho. Kɨko olo hwe lohumo ulɨkoꞌmaho. 26 Ose ulahonɨngki towahuno wonyo huhwo sohwo joho mohmꞌno lonto hwe sohumo yomo yomo engo umasiyonto ulɨkoꞌmaꞌmentisofoho. 27 Aꞌamuso ose uhwonontɨfi yomo engo yontɨfi hnnɨmentohofi, Olo pehotɨkeno. Olo hungkuno nomꞌne songofoho. Olo hwe lohwo yokumpohnꞌnyoꞌnjo lohwo hungkuno lahonɨngki towahuno wonyo sohwa kakoe hungkunomo haloho pentɨfi tɨfi inɨngkahwofo. Ose hnnontɨfi 28 olo yoꞌmayo Jisas imentiso soꞌno hwaho Ngkalili sopo mjahoꞌnɨmɨmentisofoho.
Jisas Pitafe konemimo wopɨngo umokumentisofoho.
(Matɨyu 8:14-15; Luk 4:38-39)
29 Jisas tajo ango mtaꞌni noswaponto kako Saimounꞌnji Entɨluꞌnji sikoꞌnɨkwaꞌiye angomo humentohofofoho. Jemɨsɨꞌnji Jounꞌnji hofɨkoꞌnji humentohofofoho. 30 Saimoun konemi siye aꞌapaho tohohmtnno uhnnɨngkahonɨngki kako ijempohopo humamentisofoho. Osoꞌno Jisas noswopahonɨngki oso hungkuno hiso komoꞌno ulɨmentohofofoho. 31 Ose ulahonɨngkofi aꞌmusi mnokinoꞌnji nohumentanjopo uꞌmanto Jisas kakoe aho nomanto aꞌmu simo nulɨkofahonɨngki aꞌapaho tohohmtnno moiꞌwo imoꞌnɨngkahonɨngki kako wopɨngo imoꞌnɨmentisofoho. Wopɨngo imoꞌnonto kako aꞌamumne wopayo iloho humisyofoho.
Jisas aꞌamu piꞌnɨngo somo wopɨngo umokumentisofoho.
(Matɨyu 8:16-17; Luk 4:40-41)
32 Oso sɨkuno somo aꞌamuso hofɨko aꞌamu nomꞌne yoꞌmayo yoꞌmayo mnokinoꞌnjo soꞌnji aꞌamu towahuno wonyoꞌnjo soꞌnji ipemotapmmentohofofoho. 33 Aꞌamu hopiꞌnono oso ango Jisas humentanjo hokuꞌyo sopo uhuꞌmokumentohofofoho. 34 Aꞌamu yoꞌmayo yoꞌmayo mnokinoꞌnjo soꞌnji towahuno wonyoꞌnjo soꞌnji wopɨngo umokumentisofoho. Towahuno wonyo huhwo sohwa Jisas Anɨtuye hwomu sohumo yofe uhwoꞌmentohofo soꞌno Jisas hofɨkimo hungkunojo soꞌne mampiꞌnyo umokumentisofoho.
Jisas hwaho Ngkalili sopo Anɨtuye hungkuno lutɨhwamentisofoho.
(Luk 4:42-44)
35 Iyohohweꞌnji Jisas nolɨkafonto kengopo aꞌamu mohumunyo sopo nowento osopo kako Anɨtumo jomo ulɨmentisofoho. 36 Saimoun kakoe aꞌamuꞌnji Jisasɨneꞌno tɨpeentɨfi 37 Jisasɨmo tɨpɨhwonontɨfi ulɨmentohofi, Aꞌamu hopiꞌnono kikineꞌno wotɨpekohonɨmoꞌnantɨfi yalokwofo. 38 Ose ulahonɨngkofi Jisas ulɨmento, Hofɨkoe syohofoho. Nomꞌne ango mofone sopo wohwano. Nomꞌne aꞌamumo hungkuno wopɨngo wolutɨhwamneꞌno yohono. Osoꞌne pmmentohe hwoꞌnyoho. 39 Ose ulahonɨngki nowentɨfi hwaho Ngkalili hoꞌmo soꞌmo tajo ango somo lutɨhwanto towahuno wonyo somo wae yaoꞌmentisofoho.
Jisas hwe aꞌapaho uyo wonyoꞌnjo sohumo wopɨngo umokumentisofoho.
(Matɨyu 8:1-4; Luk 5:12-16)
40 Hwe aꞌapaho sompoteꞌnjo sohwo Jisasɨmo humotaho sulonto hwahopo hwomtame ulohofonto jomo yokumpohnꞌnyo ulɨmento, Kɨko ngkimo wopɨngo wanɨmokumo lisoꞌmanji, jɨje yokumpohnꞌnyoso hoponoho. 41 Jisas nupaꞌnonto hitoho ulofahonɨngki aho kisusyonto hwe sohumo ulɨmento, Ou wopɨngo wakumokumonneꞌno yohono. Kɨko wopɨngo hmmoꞌnyo. 42 Ose ulɨmentiso soꞌno oso uyo wonyo huhwo sohwo moiꞌwo komoꞌno iꞌmoꞌnɨkahonɨngki kako wopɨngo humamentisofoho. 43-44 Wopɨngo humentanɨngki Jisas hwe sohumo yoka yokumpohnꞌnyo ulɨmento, Olo yoheso nomꞌne aꞌamumo nulohotoho. Oꞌo, kɨko komoꞌno nowehoji oso aꞌamu tajo ango syohoꞌnjo sohumo jɨje aꞌapaho utɨhwahoji yoꞌmayo Mouses selɨmentiso soꞌno Anɨtumo yano uyo. Oseso aꞌamu hopiꞌnonohinoso uhwonɨngkuji jɨje aꞌapaho uyo wonyoso wopɨngo imoꞌnɨngkiso soꞌno huno wosyofɨsyantafeho. Jisas ose ulɨmentisofoho. 45 Lɨhwojahonɨngki hwe huhwo sohwo kako aꞌamu hopiꞌnonohinomo oso Jisas kakoe aꞌapaho wopɨngo umokumentiso soꞌno ulɨmentisoso oso hungkuno hiso angoꞌmeemo hoꞌnɨmentisofoho. Osoꞌno Jisas kako nomꞌne angkuhwafopo mꞌmofayofoho. Kako mempo hohntaꞌni humentanɨngki aꞌamu ango kengo kengopontaꞌni kakimo uꞌmaꞌmentohofofoho.