SA BUKA TE
ZONA
Sa Vinabakala
Sa Buka Zona si lopu kekeṉoṉo ri kaiqa buka tadi na poropita, sina sa buka hie si tozia sa sa vivineina sa poropita sapu podekia sa pude govete nia sa ginarunu te Tamasa. Garunia Tamasa si asa pude la pa Ninive, sa ṉati vasileana lavata koasa binaṉara tanisa qinavuna Asiria, sa ṉati kana nomana tanisa butubutu Izireli. Ba lopu hiva la vasina se Zona pude tozia sa inavoso te Tamasa, sina gilania sa sapu lopu kaqu va kilasi Tamasa sari na tinoni pa vasileana Ninive. Hiva govete va seu sisigiti si asa pa Ninive meke koe Tamasa. Meke sipu ele hola sari kaiqa ginugua saripu ta evaṉa, si va tabe se Zona, meke mumudi si habotu lopu zama na va bubugorae si asa, sina lopu gorevura sa tinahuara gua pu tozia sa koari na tinoni pa Ninive.
Sa Buka Zona si vata dogoro nia sapu sa Tamasa si ṉati hiniva koari doduru Nana vina podaka. Ba sapu noma hola si e Tamasa si na Tamasa tataru meke variva taleosae; taleosoni na harupi Sa sari na kana tadi Nana tinoni, ba lopu pude va kilasi na va matei si arini.
Sari na Ṉati Pinaqapaqahana sa Buka
Sa tinioko na sineke tinarae te Zona. Hinia 1:1-17
Sa kinekere na tinavasare te Zona. Hinia 2:1-10
Sa tinarae tinazutu sapu tarae nia e Zona koari na tinoni pa popoa Ninive. Hinia 3:1-10
Taleosoni Tamasa sari pa Ninive. Hinia 4:1-11
1
Va Karia e Zona se Zihova
1 Keke rane si garunia e Zihova se Zona, sa tuna e Amitai.* 2 Baṉ 14:25 2 “Mu tuturei la tozi vura nia sa tinazutuna sa vasileana lavata pa Ninive kamahire; ura gilana valeania Rau sa kinaleana tadi na tinoni vasina,” gua si Asa. 3 Ba la nana tu pa votiki vasina se Zona, pude govete nia se Zihova, gua. La si asa pa vasileana Zopa, meke la dogoria sa si keke vaka sapu korapa va qaqiri pude la pa Sipeini. Tabaria sa sa vaka, meke suraṉa luli si asa koari na tie tavetavete pa vaka pude la pa Sipeini, pude govete va seu koe Zihova, gua.
4 Ba garunu la nia e Zihova si keke givusu ṉiṉirana pa lamana, ke raza va kaleania na raneboṉi sa vaka, meke tata huara ilasa si asa. 5 Matagutu sisigiti sari na tie tavetavete pa vaka, ke hopeke varavara la si arini koari hopeke dia tamasa pude tepa tinokae. Beto asa si ipa lani rini pa kolo sari na vinasuraṉa pude va mamaheloa sa vaka, gua. Pa totoso asa si korapa puta muliuṉu nana se Zona pa korapana hokara sa vaka.
6 La dogoria sa tie pu turaṉana sa vaka se Zona korapa puta gana, meke zama la ia sa, “Tio, na sa si puta nia goi? Vaṉunu, mamu varavara la koasa mua Tamasa, pude tokani gita; hokara kote tataruni gita Sa meke harupu gita,” gua si asa.
7 Meke vari zamai sari kasa tie tavetavete pa vaka, “Aria mada mudumudukeda pude hata vura nia pude gilania sapu esei si va tasuna gita si gita,” gua si arini. Meke sipu tavetia rini, si e Zona si ta goto. 8 Ke zama la ia rini si asa, “Ego, tozini gami, esei si kote ta zutu nia sa ginugua hie? Na sa sa mua tinavete? Pavei mae gua mu si goi? Sa pozana sa mua popoa?” gua si arini.
9 “Arau si na tie Hiburu, E Zihova sa qua Tamasa. Asa tavetia sa maṉauru na pepeso, meke sa kolo lamana,” gua se Zona.
10 Meke tozini Zona sapu korapa govete nia sa se Zihova. Ke matagutu sisigiti sari na tie tavetavete pa vaka, meke zama la ia rini se Zona, “Na vegua ke tavete gua asa si agoi!” gua si arini.
11 Ṉiṉira lala nana tu sa raneboṉi, ke nanasia rina tie tavetavete pa vaka se Zona, “Na sa kote tavete nigo gami si goi pude boka va bulea sa raneboṉi?”
12 Meke olaṉa se Zona, “Oki la nau mo pa kolo, meke kote bule mo sa raneboṉi. Gilania rau sapu pa sinea mo taqarau si ta raza nia gamu sa raneboṉi lavata hie,” gua si asa.
13 Ba lopu hiva oki la nia rini pa kolo si asa, ke podeke sisigitia rina tie tavetavete pa doduru dia ṉiniraṉira pude qelu gore la nia pa masa sa vaka. Ba ṉiṉira lalanana tu sa raneboṉi, meke lopu boka si arini. 14 Ke varavara la koe Zihova si arini, “Ke Zihova, Mu lopu va kilasa gami koasa minate tanisa tie hie! Ke Zihova, Agoi tu ṉatina sa ginugua hie; Agoi vata evaṉia sapu guahe,” gua si arini.
15 Ke ovulu vagia rini se Zona meke oki la nia pa kolo, meke hinoqa bule nodolo sa kolo. 16 Koasa ginugua asa si matagutu hola nia rina tie tavetavete pa vaka se Zihova, ke va vukivukihi la si arini koa Sa, meke veko vina tatara si arini pude nabulu nia si Asa.
17 Garunia e Zihova si keke igana lavata meke la onolo toaia se Zona, ke koa paki tu pa korapa tiana sa igana se Zona ka ṉeta rane, meke ka ṉeta boṉi.* Mt 12:40