115
Iahova enges vi Ahi anatin
1 Iahova, komai mervinvintei keke mevakur houhouen.
Keik enges kovinvin kovakur houhouen,
veni, lisenges, komul korie envatien onom min komai ka komumon tounah vasi koa kovat kati.
2 Romaltei keke koakeil areingeingen Ahi avoumon tohtohien en komai avahit,
“?Ueee … Ahi onami mul kave?”
3 Veni Ahi orer mul en out nesa
ka kei mul mumon tounah vasi koa kei en vati voumoni.
4 Ka ahi onen mesav keil avi nana keil enges koa amumon keil en silva ka gol,
koa amumon keil ral min he enges.✡ Sam 135:15-18; Rev 9:20
5 Amusah onge mul en ahi keil one, ka asakras avaselus,
mete mul, ka asakras avales etai tounah.
6 Ralinge mul, ka asakras avalonglong,
vulingase mul, ka asakras avamusmus.
7 He mul, ka asakras avatokol etai tounah,
ale mul, ka asakras avoual.
Ahi keil one aro raeng enges
veni moulien tovuol en keil.
8 Ahi keil one arkurtei keihoen, ka vatte hetas en koakeil aling desien one mul en keil.
Ka koakeil akur anatin en keil imai ihi heisav enges.
9 !Ka kami, me-Isrel keil, miheling desien onami en Iahova!
Veni kei mul kataun kami ka mul lei kokoe en kami.
10 Pris keil onen Ahi, tahos keke miheling demkatien onami en Ahi,
veni kei mul kataun kami ka mul lei kokoe en kami.
11 Kami vasi koa mivouhou min Iahova, tahos keke kami miheling demkatien onami eni,
veni kei mul kataun kami ka mul lei kokoe en kami.
12 Iahova mul mundem kat ir ka hetokol kat ir.
Anatin, kei hetokol kat me-Isrel keil ka pris keil onen.
13 Hetokol kat koakeil vasi avouhou mini,✡ Rev 11:18; 19:5
hetetamen keil heha hetokol meatin kuren keil emun.
14 Navisi keke Iahova hetokol kat kami hetal min titiali keil onami,
heha hetokol titiali keil one.
15 Anatin, tokolkatien onen Iahova, koa mumon out nesa ka out netan,
hel en moulien onami.
16 Out nesa vi onen Iahova,
ka out netan, kei lingi mul en hen meatin keil.
17 Koakeil amul en out ten matien aro raeng enges,
ka asakras avahou lat isen.
18 Ka ir koa romoul veah,
rehesau masmasi, kosa ka lisenges.
!Sakini, rehehati lat isen Iahova!