Proveb
3
Selkatien min meatin hau keil
Proveb 3:1-12,27-35
1 Natkuli, em navobongentei asa koa naviseinuk eni.
Lisenges, kindem kat mengkatien keil onak ka kusil kati.
2 Hihiseien onak houmon moulien onom hetaveah
ka kiles tahosien.
3 En moulien onom, avaseini asa hemai,
kitie lat sakien ten more envatien onom en meatin sav keil
ka lises kumoni hetahos min keil.
Konalokoveintei sise keilu ekek,
hetahos keke kitis kati hel en tinom.
4 Munak kumon koanek, Ahi ka meatin sav keil
isi keil venuk ka isom hetahos.✡ Luk 2:52
5 Hetal min moulien vasi onom, kiling desien onom en Iahova.
Konandesintei ileilien onom enges.
6 Kindem kat Iahova en tounah vasi koa komumoni,
ka kei hetie sise koa mal minuk.
7 Konandem sasom enuktei konahit ileilien onom mulin ileilien onen meatin sav keil.✡ Rom 12:16
Kihouhou min Iahova ka konahatei vesesal en tisaen.
8 Munak kumon koanek, hesak revi avem
ka en tinom, kilonge hetahos.
9 Kihouhou min Iahova hetal min tounah vasi onom,
ka kisan tei anien hau koa moul en ah osom heha mini.
10 Munak kumon koanek, kiles tahosien koa hemariso en moulien onom,
vah onom hehilelau en anien lises ka kirtamureitei en etai tounah.
11 Natkuli, navong Iahova ralimal enuk ven tounah,
kisik enges veni ka kindem kati. ✡ Siob 5:17
12 Kumon koanek veni Iahova ralimal en koakeil envatien onen mul en keil.
Kei mumoni suval tata tai koa ralimal en natnali koa si veni.✡ Rev 3:19
27 Hetahos minuk keke konahuli kattei ui umen onen koakeil amum
navong mul en hem keke kovasani min keil.
28 Munak meatin tai visuk en tounah tai koa kovuli kati mul, tahos keke kisan vareini mini.
Konahitentei konahit, “Vuo, visuvong esuk nisani minuk.”
29 Konoumontei sise vapurun meatin tai koa ro vesesal venuk
veni ro ral minuk ka ling desien onen mul enuk.
30 Konasel kutut kattei meatin sav
koa romumon etai tounah vapurunuk.
31 Konahati lattei meatin tatituen,
ka konousiltei sakien keil onen,
32 veni Iahova vuroh kat vati meatin koa mukonek,
ka koakeil moulien one mal, kei lah keil umai vesesal veni.
33 Iahova hesan sesendaen heha kat teim sen meatin keil koa amum tisa.
Ka hesan tokolkatien heha en teim sen meatin keil koa amum mal.
34 Kei mundem heisav en vati meatin keil koa avut keil ka amundem heisav en meatin sav keil.
Ka mul lele tahos min koakeil amumon rendemien one va netan.✡ Tiem 4:6; 1Pit 5:5
35 Meatin keil koa avi meteisau, ise hetahos.
Ka koakeil avi varu, keil apurun ise.