9
Godeeye Isalael odoo ee
tei o odoo doloso hesiga
1-3  Exo 32:32Esiga a Keliso sabolo hedebe doloso badolone, tei goodee hagee nimapoo ka taka. Osoloso ayo wulo gamenee koo takooso. Dio Tei oso mo sooloo ma kuloduga gweli goo ee ka bamoloso. Esiga mo sooloo ma kuloduga gweli goo ee epedee nimapoo tei goo taka goo ee, a gooleedooso. To ee hagoso, ayo nimapoo takolone mo odoo Isalael bia ee halo diya gooholone, a su hegi sabolo ka badoso. Bei, diayo Godeeye goomoga goo ee koo dedeliga. Esiga a teiba daga, a goomogoso, mo odoo oso mo debi ee toloso Keliso sabolo hedebe doloso dabalai. Osoloso ayo dia debi ee toloso Godeeye kamana ee toloso a Keliso maga puloso badalai. Esino ayo egeesee selai, a tebile.
4  Exo 4:22; Hib 9:5; Psa 147:19; Lev 1—10; Loum 15:8Egeesi ma kulodu Isalael odoo hagee bia Godeeye tei owolo dio diso. Osoloso dimapoo yayo toowa doloso badeli goo ee eligiso. Osoloso yayo Isalael odoo sabolo to magooso. Osoloso yayo tei magoo ee dimapoo teneeso. Osoloso o hu dokodoo poudoolone yimapoo goomoga teneli goo ee dimapoo olo eligiso. Osoloso yayo dimapoo to abo edidi magooso. 5 Egeesi ma kulodu dibada amawe dio ee Eibalaham, Aisek osoloso Yekob. Osoloso Keliso onosee mipoo hamapoo sibileso odoo hagee bia dia soosoo ma kuloduga odoo su paso. Esiga Keliso ee Godeeso. Esiga odoo susuga oso yimapoo goomoga poudoolone kookaiyo osee dabalai tekepo. Bei, bi susuga Godeeye wiligi doloso ka badoso. Goo hagee tei goo.
6 Esiga Godeeye Isalael odoo mapoo to edidi magoo ee gababiasomo? Haye, gababile. Bei, Isalael odoo susuga ma kulodu odoo abo ee tei Isalael odoonee. 7  Gen 21:12Osoloso Eibalahameeyo amawe dima kulodu odoo abo ee tei Eibalahameeyo amawe dionee. Bei, Godeeye Eibalaham mapoo egeesee takaso, “Tei namawe dio ee hedebe nowolo Aisek maga balaiso,” diso. 8  Gal 4:23Goo hagoso egeesee eligiso, Eibalahameeyo amawe dima kulodu, odoo abo ee tei Godeeyo owolo dionee. Esino Godeeye to edidi magoo goo mapoo tei too goo maga soolooga magoo ee, tei Godeeyo owolo dio oso. 9  Gen 18:14Bei, Godeeye Eibalaham mapoo to edidi magolone egeesee takaso,
“Ayo dugo hedebe poogoloso see wedi siboga, nosobo Sela giso holo soomagoo molo agalaiso,” dee takaso.
10 Esiga holope hagee ibada amawe Aisek. Yo kauwuloso Lebeka huso. Osoloso osobo Lebeka koowasi moodooloso, giso holo bakadio biame hedebe mapoo soomagooso. 11-12  Gen 25:23Egeesi ma kulodu giso holo bakadio hagee soomagelega badoboome, Godeeye Lebeka mapoo egeesee takaso, “Nowolo daga holo oso omolowo to mapoo mesimo sileiso,” diso. Esiga o bakadio oso goo moodoolai ee gooleedelega doboome, Godeeye to hagee malalo olo takaso. Esiga Godeeye o odoo egee hesigamolo ee yayo goo moodoo ogoloso koo hesieli. Esino yo wulo eyo goomoga goo ee dodolone ka hesieli. 13  Mal 1:2-3Esiga Godeeyo to booka mapoo hogugu oso egeesee takooso,
“Ayo Yekob ono diya goomegeliso. Esino Iso haga koo goomegeli,” dee takooso.
14 Egeesi ma kulodu iyo kasee takalaiyo? Godee yo hedebe hediliwe pidili Godeeyo? Haye, yo egeesee koo seli. 15  Exo 33:19Bei, Godeeye Moses mapoo egeesee takaso,
“Ayo sooloo deli goo ee odoo hee mapoo eligilei goomogoga, ayo yimapoo eligileiso. Osoloso ayo odoo hee pidilame goomogoga, ayo yo pidileiso,” diso.
16  Epe 2:8Esiga Godeeye hesiga goo ee edebeeyo goomoga goo maga, osoloso diayo goo moodeli ee ogoloso koo hesigeli. Esino Godeeye wulo eyo sooloo dala maga odoo ka hesigamoloso. 17  Exo 9:16Esiga o booka mapoo Godeeye Isipi odoo dia wiligi odoo taba mapoo egeesee takaso,
“Ayo namapoo wiligi odoo tabalame hu teneeso,
wulo namaga ayo kitulugu odoo susuga mapoo yilige bigilame.
Osoloso mo goo dudobuguloso mipoo hamapoo debeli odoo susuga oso dulame,” dee takaso.
18 Esiga iba gooleedooso, Godeeye odoo hee pidilame goomogoga, yayo yo pidileiso. Osoloso yayo koo mesili goo ee odoo hee mapoo tenelame goomogoga, yayo tenelaiso.
Godeeye kamana goo sabolo
osoloso sooloo deli goo sabolo
19 Esiga odoo heeso amapoo egeesee woosalai malaiso, “Godee eyo odoo abo mapoo koo mesili goo ee ka tenemolo daga, yayo see kasi maga odoo egee bia odoo tokenee dee ka takalaiyo? Bei, odoo agayo Godeeye goomoga goo ee hamaga takalai ka teibayo?” 20  Isa 29:16; 45:9Esino emegei, nayo Godee mapoo hageesee woosalai tekeponee. Bei, no wulo mi odoo. Esiga wudu taka to hagoso. Katolo bogoso moodoo oso yo moodeli odoo mapoo takolone, “Nayo kasalame a egeesee ka moodoowo?” dee takalai tekeponee. 21  Jer 18:6Bei, katolo moodeli odoo yayo bogo hedebe egee toloso, katolo hee mapoo wulo biame susuga nei magalai sabolo, osoloso goo toowa biame mapoo katolo hee mapoo nei magalai ee moodoolai, yimapoo kitulugu moloso.* To hageeyo bei ee egeesi moloso. Godee eyo goomoga goo ee dodolone, odoo heeso goo toowa talame, osoloso odoo heeso goo pepooko talame hesilei, yimapoo kitulugu moloso. Bei, Godeeye odoo susuga ka moodooga.
22 Egeesi ma kulodu Godee yo egeeseelone badoso. Yimapoo kitulugu moloso, yayo kamana sabolo osoloso yayo kitulugu ee odoo mapoo eligilei. Esino odoo yayo kamanali oso teli mapoo diyadeega, yayo ogoloso dia goo tokenee eyo nei saga tenelega mesie sabolo ka bamoloso. 23 Osoloso yimapoo kitulugu moloso, yayo sooloo deli odoo mapoo yayo toowa doloso egee bado goo ee eligilei. Bei, odoo egee bia eyo olo hesigaso, yayo toowa doloso egee bado mapoo gasibe dalame. 24 Esiga odoo Godee yayo toowa doloso egee bado mapoo gasibe dalame, hedebe Yu odoo ee hesile. Esino yayo Yu odoonee sabolosee hesiaso. Esiga odoo yayo hesia ee ibaso. 25  Hos 2:23Godeeye Yu odoonee dia goo maga Hoseya booka mapoo hogugu oso egeesee takooso,
“Odoo daga ayo mo odoo dele poogoo egee bia ee see epedee mo odoo dalaiso.
Osoloso ayo sooloo delega debei odoo egee bia ee, see epedee ayo sooloo dalaiso,” diso.
26  Hos 1:10Daga Godeeye dimapoo takolone,
“Niba tei mo odoonee,” diso.
Esino see yayo dimapoo takolone,
“Niba gie badeli Godeeyo owolo dio dalaiso.”
27  Isa 10:22-23Osoloso Aisayaye Isalael odoo dia goo maga takolone egeesee takaso,
“Isalael odoo oso diya balone booboosee masi malaiso.
Esino dima kulodu wulo aboso gie badeli talaiso.
28 Bei, Lodeeye mipoo hamapoo debeli odoo dia goo tokenee eyo nei saga teneloso hosudalaiso.”
29  Isa 1:9Osoloso Aisayaye see tobu Isalael odoo dia goo maga egeesee takaso,
“Kitulugu Godeeye ima kulodu odoo abo pidilega poogoo diepi,
Sodom mi sabolo osoloso Gomola mi sabolo* Sodom mi sabolo osoloso Gomola mi sabolo - Eibalahameeye badebei biame mapoo, Godeeye mi bakadio hagee dou gigaloogooso. Bei, odoo egee biaso goo tokenee tolone doboome. douso nadolone odoo susuga piligu egeesi masi iba nosee piligiliyo,” dee takaso.
Isalael odooso to tekepo mapoo
tei tele poogoo goo
30 Esiga to ayo taka goo eyo bei ee egeesi moloso. Yu odoonee oso Godeeyo howo woola tekepo doloso badalai goo ee esile. Esino dieso tei too goo maga Godeeye o howo woola diba odoo tekepo diso. 31 Esino Isalael odoo oso Godeeyo howo woola tekepo doloso dabalai goo ee esilone, dibada tei magoo ono medee dodolone debeiso. Esino goo oso diba odoo tekepo dele. 32  Isa 8:14Bei, diayo tei tele poogoloso, wulo dieso kitulugu maga Godeeyo howo woola odoo tekepo dalame seeso. Goo egeesi maga diba yo odoo tagodibigili mapoo tagodibuguloso ka misigedibuo demeleeso. 33  Isa 28:16; 1Pita 2:6Bei, Godeeyo to booka mapoo hogugu oso egeesee takooso,
“Ayo Sayon mi mapoo yo magalaiso.* To hageeyo bei ee Godeeye odoo eyo hudi magoo Keliso ee Isalael odoo mapoo diye dalaiso.
Yo omapoo odoo tagodibuguloso ka misigedibuo demalaiso.
Esino edebeeyo yimapoo tei toga, goo omaga goohele sabolo badalaime. Bei, goo hagoso goo mauwe malaime.”

9:1-3: Exo 32:32

9:4: Exo 4:22; Hib 9:5; Psa 147:19; Lev 1—10; Loum 15:8

9:7: Gen 21:12

9:8: Gal 4:23

9:9: Gen 18:14

9:11-12: Gen 25:23

9:13: Mal 1:2-3

9:15: Exo 33:19

9:16: Epe 2:8

9:17: Exo 9:16

9:20: Isa 29:16; 45:9

9:21: Jer 18:6

*9:21: To hageeyo bei ee egeesi moloso. Godee eyo goomoga goo ee dodolone, odoo heeso goo toowa talame, osoloso odoo heeso goo pepooko talame hesilei, yimapoo kitulugu moloso. Bei, Godeeye odoo susuga ka moodooga.

9:25: Hos 2:23

9:26: Hos 1:10

9:27: Isa 10:22-23

9:29: Isa 1:9

*9:29: Sodom mi sabolo osoloso Gomola mi sabolo - Eibalahameeye badebei biame mapoo, Godeeye mi bakadio hagee dou gigaloogooso. Bei, odoo egee biaso goo tokenee tolone doboome.

9:32: Isa 8:14

9:33: Isa 28:16; 1Pita 2:6

*9:33: To hageeyo bei ee Godeeye odoo eyo hudi magoo Keliso ee Isalael odoo mapoo diye dalaiso.

© 2006, 2015, 2017 Wycliffe Bible Translators, Inc.