1 Wayire ndoma mu endimi ejʼabaatu neja bamalayika, aye ni puma hwenda, mba hyʼehivuga ehiŋwamo ejanjaasi eritategereheha. 2 Wayire mba nʼehirabo ehyʼobunaabbi era nʼohumanya namanya ebyama byosibyosi, era wayire mba nʼamagesi nʼohufugiirira ohugengula esozi, aye nga puma hwenda, mba puma mugaso.* 13:2 Mat 17:20; 21:21; Mar 11:23 3 Wayire paayo ebyange byosibyosi ohuyeeda abagadi, era nʼohweŋaayo Neŋayo ohunjohya omuliro,* 13:3 omuliro Oba omubiri ko nepaahepaahe. aye ni puma hwenda, ehyo hiba sihingasa.

4 Ohwenda hugumikiriza era huli nʼehisa. Ohwenda huŋuma esaalwa, sihwepaahapaaha, sihwehudumbasa, 5 huŋuma ehabyo, sihweyendesa ebiraŋi, huŋuma busungu owamangumangu, era sihweŋambirira hibi. 6 Ohwenda sihusangaalira ebikolwa ebibi, aye husangaalira ebiitu ebituufu. 7 Ohwenda hwehaliriha, hugumira ebigosi byosibyosi, sihuleheraŋo hufugiirira ti Hatonda asobola byosibyosi, mu biitu byosibyosi ohwenda huba nʼohusuubira nʼohugumikiriza.

8 Ohwenda nihwo sihuhoma. Aye obunabbi bulyola ehiseera wahoma. Nʼehirabo ehyʼohuloma mu ndimi hija huŋwaŋo, nʼohumanya hwosi huhome aŋo. 9 Hiri hiityo olwohuba humanyireho bidiidiri era nʼobunaabbi obuhuŋa sihubuhenayo. 10 Aye ni hulisuna ebyene nʼebyene, ebindi ebyo birihoma aŋo. 11 Ni naali ni kiiri muŋere, nʼalomanga hyʼomuŋere, naŋeeganga hyʼomuŋere era ni mbona ebiitu hyʼomuŋere. Aye ni nahula, nga ebyʼobuŋere mbita ŋala. 12 Hatyane hubona biroliroli. Aye ni hulitiina mwigulu, hulibona hiisi hiitu moni hu moni. Sitegeera hiisi hiitu mu wiijufu, aye hu olwo ndimanyira erala byosibyosi bulaŋi, ngʼolu Hatonda gamanyire mu wiijufu.

13 Ebiitu biri bidatu ebija husigalaŋo emirembe nʼemirembe; ohufugiirira, nʼohusuubira, nʼohwenda. Aye ohwenda njʼohuhira byosibyosi.