1 Oro aposel hawe nadu tine oro badu loboho Judiya anuhun iri lau badu leheleh ale ndrandrei sahou ta Kindrei. 2 Ya, na len Pita ili Jerusalem badeh, oro lau mene atehei budon toro handru i ta Jises ado aliy. Oro ale atehei budon toro boto-on ta asan ku-i oro asehek iy anya, 3 “Ou badeh, ala bolo asiu tiri lau nane basan ku-i iri bwe, aimon nyamon hawe iri.”

4 Pita eme badeh, asehek amwenen i toro ta nyala sasah mene asahan tan i toro: 5 “Jo badeh, udu kon tinan Jopa asolom, eme lele asahan tek le badeh, jo anyolom lakou i buku none ra-ei kolau tinan suwin ma hahuw udu kandrah eme andri. Ya suwin badeh, ma hahuw eme andri batalak le dah. 6 Jo anyolom ili badan badeh, jo atou iri katin haka, randrah randrah, ma hawe iri lakou ta seselek badu bada munyak, iri ndriliu ma hawe iri sirih badu rewa kandrah. 7 Ano, jo anuhun aloh ari anya, ‘Pita, ou suri ou, ya ou adai rayah, ma ou aimon.’

8 “Eme jo anya, ‘Laban, bwe, bwe handru en! Jo badeh, baimon sese iri lakou ko-ak doh, bwe le.’

9 “Eme Kindrei aloh san rasan ja anya, ‘Ou badeh, saloh anya iri lakou Kindrei sikinei ko-ak ndra-au, ou saloh ko-ak udu aliy ja ai, ndri-iy.’ 10 Kindrei badeh, aloh i san tulusin ano suwi labai kolau dah iu i kandrah ja.

11 “Ano, amwenen le na bolo len doh badeh, oro lau taloh, iri suni oro are Sesariya ame ales are rasi, boho asiu nane jo udu aliy dah. 12 Eme Malawin Ndrabun tiye tek badeh, ta jo sandrondro ta i hawe oro. Eme nadu tine oro ma onoh dah ame hawek ale, aso ala asiu ta ndramak doh. 13 Eme iy tiye taso ta nyala iy anyolom angelo asahan asiu tan ma tiye, ‘Ou suni oro kala Jopa kandrei ndramak ari nyaran Saimon Pita. 14 Iy kameh tiye sahou tam ma hawe oro lowam mari. Ma na sahou doh Kindrei kameh sebenei ado.’

15 “Ya jo asehek sahou i toro le badeh, Malawin Ndrabun eme la-u oro i buku none asahan eme la-u to ma mwena mene. 16 Ano jo lomondrani sasah Laban mene tiye i buku doh, ‘Jon badeh alomwa ado na gwa, arile ado kameh anyu ado na Malawin Ndrabun.’ 17 Jo winiyan batebelese hawe Kindrei bwe, tasah iy edeu ndramas i tiri i le buku iy edeu eme tataha mene, kabatana to atehei budon tato handru in ta Laban Jises Krais.”

18 Eme oro anuhun badeh, oro basehek iy ja bwe, ma boho oro andru-uk ma oro atudun Kindrei i buku doh, “Handru labai, Kindrei badeh, anya kaseben iri lau badu leheleh ale ta iri winiyan tubuni kona iri ili tiri kandriyen ndra-in, ma kakohok manyah mwasin ta Kindrei ta winiyan bano bwe.”

19 Ya oro lau ta budon handru i ta Kindrei mene aseker ta iri mene adai Stiben badeh, iri rayah aseker ala kon munyak tinan Ponisiya, ma busu Saipres ma kon tinan Antiyok atiye sahou i tiri Juwis le. 20 Arile, oro lau rayah badeh, badu Sairini hawe badu Saipres ala Antiyok atiye sahou i tiri lau badu Grik ale ta nyala sahou mwasin nyala Laban Jises Krais. 21 Eme boto-on ta Laban badeh, udu la-u oro, eme lau solo-an badeh, atehei budon tiri handru ma tubuni ndrine iri ja i ta Laban.

22 Eme iri lau ta Kindrei badu Jerusalem anuhun nyala lahou doh badeh, ma iri suni Banabas ili Antiyok. 23 Ya eme na len iy isos badeh, iy sekesek tasah iy anyolom Kindrei atehei nyosowan i tiri, ma iy tiye iri mari kado handru le ta Laban na ndrine iri mari. 24 Iy badeh, ndramak mwasin idih na Malawin Ndrabun hawe budon handru. Ma iy aluwi iri lau solo-an a ta Laban.

25 Ano, Banabas ili takaleh Sol ili Tasus. 26 Eme iy ndruni iy badeh, iy kuhi iy eme Antiyok. Ya eme udu bolo jaha ari ma buruwen badeh, Banabas uru Sol atukum hawe iri lau ta budon handru ta Kindrei ma leheya iri lau solo-an. Oro lau ta Laban, iri lau aloh oro “Kristen” ma mwena badeh, udu Antiyok.

27 Udu bolo len doh badeh, iri propet rayah ale, ado Jerusalem ame andri, ame Antiyok. 28 Eme iy ari badu hawe oro badeh, nyaran Agabus, ales ere loken asehek sahou na boto-on ta Malawin Ndrabun anya, “Idah kameh, kon mari badu loboho tondrok ta Rom kameh nyamon bwe.” Idoh badeh, asahan na len Klodiyas atondrok kon). 29 Eme oro lau ta a-en hamon ta Jises tiye anya, idah kameh, oro ari ari kameh abudon ta oro winiyan adeu lakou ili ta aseben nadu tine oro rayah nane ado Judiya. Oro lau lakou toro solo-an badeh, adeu lakou solo-an ta aseben. 30 Oro amekes budon doh ano badeh, oro atehei luk i mine Banabas uru Sol, ma uru tiyani ili tiri lau ta Kindrei nane ado Jerusalem.