3
Pita mesekei ndramak ta anyolou lakou amwenen ja
1 Ya, na mada an taloh na beyeh ari badeh, Pita hawe Jon, uru au ala loken ala asiu tinan ta Kindrei asolom. 2 Eme ndramak ari badan imek kabatana tinen atehei iy eme len. Eme iri bwese-ei iy ili madasan tinan ta i asiu tinan ta Kindrei aloh, “Madasan Mwasin.” Eme iy udu aliy na len mari badeh, anyolou lakou tiri lau adek ala ame ala bolo asiu tinan ta Kindrei. 3 Eme iy anyolom Pita uru Jon ame le badeh, iy anyolou uru ta luk. 4 Eme uru anyolom amwenen i tan. Ano Pita anya, “Madam keme taru!” 5 Ya eme iy anya, uru kameh anyohan iy lakou, ya eme madan i turu.
6 Ano Pita anya, “Aru badeh, luk ta anyohan ou bwe. Arile, sasah taru udu aliy kada-ah, aru kameh atehei ewek tam. Na boto-on ta nyara Jises Krais badu Nasaret badeh, ou suri ou, ma ou adek.” 7 Ya eme Pita tawi minen salin ma suri iy ere loken. Eme katin hawe kusu-u bekan tan abadok ma iy edek. 8 Ano iy ili hawe oro ili bolo asiu tinan ta Kindrei, ma edek ma sandroh ta atudun Kindrei. 9 Ya eme iri lau mari anyolom iy edek ma atudun Kindrei; 10 ma iri seleyani iy, tasah iy badeh, ndramak ta anyolou lakou. Iy mene manyah udu Madasan Mwasin ta i bolo asiu ta Kindrei. Eme ya, mani iri mari atur ma mada iri atau, ta sasah nane ndrasahan tan.
Pita asehek sahou i tiri lau nane anyolom iy ndramak dah
11 Eme ndramak nane ta anyolou lakou tawi Pita uru Jon kahis le badeh, iri lau mani iri
atur ya iri sakaliye ala ame ala hawe uru ala beleheleh ta Solomon. 12 Eme Pita anyolom badeh, iy tiye i toro anya, “Aha lau badu Isra-el, mani aha atur ta sasah? Aha anyolom aru boto-on tasah handru? Budon taha kede-eh anya, boto-on mari badeh udu taru, tasah aru mwasin mara-ei ta mada Kindrei, ma aru bwidi iy ndramak kede-eh edek ja. Arile bwe. 13 Kindrei ta Abraham uru Aisik hawe Jekop, ma ta tama taha badeh, bwidi lomadan i ta lohowan tan Jises asahan. Aha mene atehei iy ili mine iri lau adai iy. Pailat anya karuwani iy, arile aha badeh, bwale aha, ma aha baseken iy udu mada Pailat bwe. 14 Aha tubuni kona aha i ta iy ndramak mwasin labai doh, iy bamekes ari kandriyen ndra-in bwe. Iy irek na iri kandriyen mwasin le. Aha bwale aha ta Pailat tolowei Jises. Aha tiye Pailat tolowei iy ndramak ta adi ndramak. 15 Aha badeh, adai ndramak ta edeu kohan handru ta udu le buku doh. Arile, Kindrei le mete-ei iy ta imek eme loken. Eme aru badeh, anyolom na mada aru amwenen ma aru asehek nyala aha. 16 Eme i san ta budon handru in ta nyara Jises badeh, ndramak badan imek, ndra boto-on ja. Ehe, na budon handru in ta Jises le, ndramak badeh, ndramwenen ja. Eme na dah aha anyolom. 17 Eme ya aha nadu tine, jo badeh, tanan, ta aha tanan bala mwasin ta lakou aha amekes i ta Jises bwe; ma hawe oro lau ta atondrok ale. 18 Arile, sahou mene Kindrei atehei i kani iri propet mari asehek badeh, i buku doh: Krais kameh bwese isi. Ma na kandriyen aha amekes i tan, Kindrei bwidi sahou tiri propet tan i handru. 19 Ya eme aha badeh, katubuni ndrine aha ma aha ka-en hamon ta Kindrei. Ma idah kameh, lomondra ndra-in taha kameh Kindrei sikine iu. Ya len ta akohok manyah mwasin ta Laban kameh eme. 20 Ma iy kameh suni Jises eme hamon ja. Iy badeh, Krais, ndramak Kindrei mene ndralebelei ta akohok aha ame hamon ja. 21 Jises kameh udu kandrah udu gwek, winiya le len Kindrei anya kamekes lakou mari kasahan ha-un ja, i buku none iy mene ndrasehek i tiri propet tan ndrabun mwena mene. 22 Moses mene tiye anya,
‘Laban Kindrei kameh tutuni ndramak ari badu bolo aha kameh asahan propet taha. Iy kameh suni iy i le buku iy mene suni jo. Ya eme aha badeh, kanuhun sahou tan mari iy asehek i taha. 23 Ya are lau banuhun bohon bwe, badeh kameh tikahei iy eme len ta bolo lau tan.’ Dutoronomi 18:15, 18-19
24 “Handru labai, iri propet
kabatana Samuwel eme, eme taku dah badeh, mari asehek nyala le len doh. 25 Ya eme aha dah, badeh, lundriye iri propet ta sahou randra le mene Kindrei amekes hawe tubu aha Abraham i buku doh:
‘Na lundriyem oro le kameh, jo kameh edeu nyosowan i la-u iri lau mari badu munyak.’ Jenesis 22:18; 26:4
26 Na len Kindrei tutuni lohowan tan, iy suni iy ewek taha bwena ta adeu nyosowan ewek la-u aha, ta amekes aha badeh, katubuni kona aha ki tiri kandriyen ndra-in.”