1 Ʉbakʉmbʉsye abandʉ ʉkʉtɨ biijiisyege kʉ balongosi na balagɨli. Babatiilege nʉ kwitendekesya kɨlɨngaani ʉkʉbomba ɨmbombo syosa ɨnunu. 2 Kangɨ balɨngantʉkaga ʉmundʉ najʉmo, balɨngʉʉmanaga na bandʉ, bajege booloolo, kʉno biijiisyege kʉ bandʉ boosa.

3 Namanga na nuuswe akabalɨlo kamo twalɨ bakonyofu, tʉkaabombaga ɨsi ikʉlonda Kyala, twasyobigwaga, twalɨ batʉmwa baa finyonyo ɨfya mbiibi ɨsya lʉko nʉ lʉko. Nkajɨɨlo kɨɨtʉ twalɨ nʉ bʉbiibi nʉ bʉʉfi, abandʉ baatʉbengile na nuuswe twabakalalɨlaga. 4 Looli Kyala ʉMpoki gwɨtʉ bo atʉnangiisye ʉbooloolo nʉ lʉgano lwake, 5 aatʉpokile. Akaatʉpokile kʉnongwa jaa mbombo ɨsya bʉgolofu ɨsi tʉbombile, looli aatʉpokile kʉnongwa jaa lʉpaakɨsyo lwake. Aatwelwisye kʉ njɨla jaa kʉpaapigwa ʉbʉpya, nʉ kʉtʉpapo ʉbʉʉmi ʉbʉpya kʉ njɨla jaa Mbepo Mwikemo. 6 Aatʉpeele Mbepo Mwikemo kʉ bwingi, kʉ njɨla jaa Jesu Kɨlɨsiti ʉMpoki gwɨtʉ, 7 ʉkʉtɨ mwi ipyana lyake tʉbaligwe ʉbʉgolofu, tʉje baa kɨlɨngo kya bʉʉmi bwa bwila na bwila, ʉbʉ tukʉsʉʉbɨla. 8 Ʉbʉjobi ʉbo bwa nalooli. Ngʉlonda ʉsisisimɨkɨsyege ɨnongwa ɨsyo, ʉkʉtɨ aba bikʉmmwitɨka Kyala biiningege nɨ ndumbula joosa, ʉkʉbomba ɨmbombo ɨnunu, ɨsi silɨ nɨ fya kʉkabamo kʉ bandʉ boosa.

9 Looli ʉsyepʉkɨlege ɨnongwa sya lʉkaani ʉlwa bʉkonyofu, ʉtʉpango ʉtwa fikolo muno fijɨɨliile, ʉnjwego nʉ kʉkaanikana ɨsya ndagɨlo sya Moose. Syosa ɨsyo sikaja nɨ fya kʉkabamo, sya itolo. 10 Ʉmundʉ ʉntikani, ʉnsokege ʉlwa kwanda nʉ lwa bʉbɨlɨ, lɨnga atikʉpɨlɨka ʉnkaanege. 11 Ʉmeenye ʉkʉtɨ ʉmundʉ bo ʉjo asobile ɨnjɨla, kangɨ ntʉlanongwa, ʉjo iilongile mwene.

12 Ndumwile ʉkʉbʉʉka kʉkʉtʉʉgala kʉla kʉ Nikopoli, akabalɨlo akaa mmapepo. Ngʉntʉma Alitema pamo Tikiko kʉmyako. Bo afikile ʉko, gwikasye ʉkʉbʉʉka kʉ Nikopoli ʉkʉtɨ twaganile. 13 Sena ʉmmanyili gwa ndagɨlo na Apolo, ʉbapepo fyosa ɨfya kʉbatʉʉla mu njɨla, balɨngaagɨlwaga nakamo. 14 Ɨjo njɨla joope, ɨjaa bandʉ bɨɨtʉ ʉkʉmanyila ʉkʉbomba ɨnunu amasikʉ goosa, ʉkʉtɨ babatʉʉlege aba balɨ nʉ bʉtolwe, balɨngajaga bandʉ aba batikʉpa ɨseke mbʉʉmi bwabo.

15 Abandʉ boosa aba tʉlɨ pamopeene, bikʉkʉponia. Ʉtʉponekesye abiitɨki, aba batʉganile ndwitɨko. Ɨliipyana lɨjege pamopeene na nuumwe mwesa mwe muliko ʉko.