1 Ijolo, ʉmwe mwalɨ bafwe, kʉnongwa jaa mbiibi nʉ bʉtʉlanongwa bwɨnu. 2 Akabalɨlo kala mwakongaga akajɨɨlo akabiibi akaa bandʉ abaa pakiisʉ apa, kangɨ mwammwɨmɨkaga ʉntwa ʉmbiibi Seetano, ʉjʉ jo nkʉlʉmba gwa mbepo ɨnyali mu mpaalanga. Ʉntwa ʉjo akabalɨlo aka ikʉbalongosya abandʉ aba batikʉntiila Kyala. 3 Nalooli ʉswe twesa akabalɨlo kala twalɨ bo abeene. Twakongaga ɨfinyonyo ɨfya mbɨlɨ. Twabombaga syosa ɨsi ɨndumbula syɨtʉ ɨmbiibi syalondaga. Twapaapiigwe nɨ ndumbula ɨsi silɨ nʉ bʉtʉlanongwa. Bo ʉlwa bandʉ boosa, na nuuswe twabagiisye ʉkʉpeeligwa ʉlʉfundo na Kyala.

4 Looli Kyala gwa kɨbabɨɨlɨsi fiijo. Atʉganile nʉ lʉgano ʉlʉkɨndɨlɨsi. 5 Na paapo twafwile kʉnongwa jaa bʉtʉlanongwa bwɨtʉ, poope Kyala aatʉsyʉsiisye pamopeene na Kɨlɨsiti. Nalooli kwi ipyana lya Kyala lyene, mupokiigwe. 6 Aatʉsyʉsiisye pamopeene na Kɨlɨsiti, ʉkʉtɨ tʉkajege pamopeene nagwe kʉmwanya. Aabombile ɨsi ʉkwendela kwa Kɨlɨsiti Jesu, 7 ʉkʉtɨ akabalɨlo aka kikwisa atʉnangɨsye ɨliipyana lyake ɨliikʉlʉmba. Atʉnangiisye ʉbʉkabi ʉbʉkʉlʉmba bwa ipyana lyake ɨlingi fiijo, ɨlɨ atʉpeele ʉswe twe tʉlʉngeene na Kɨlɨsiti Jesu.

8 Kyala abapokile kwi ipyana lyake, kʉ njɨla jaa kʉmmwitɨka Kɨlɨsiti Jesu. Nalooli, ʉbʉpoki mukwambɨlɨla, komma kʉnongwa jaa mbombo syɨnu ɨnunu, looli ʉbʉpoki fyabʉpe fya Kyala. 9 Mupeeliigwe itolo ʉbʉpoki na Kyala, komma kʉnongwa jaa mbombo syɨnu, ʉkʉtɨ najʉmo angiituufyaga. 10 Ʉswe tʉlɨ fipeligwa fya Kyala, aatʉbʉmbile ʉbʉpya kʉ njɨla jaa kʉlʉngana na Kɨlɨsiti Jesu, ʉkʉtɨ tʉbombege ɨmbombo ɨnunu. Kyala aasibaatiike ɨmbombo ɨsyo liijolo, ʉkʉtɨ ʉswe tʉsibombege.

11 Po ʉlʉ, ʉmwe mwe mukaja Bajuuta, mukʉmbʉke ʉkʉtɨ, aBajuuta aba bikwijoba ʉkʉtɨ, “Babuutigwa,” bikʉtɨ ʉmwe mulɨ, “Bapanja,” paapo ʉmwe mukabuutigwa kʉkyeni.* 2:11 Ʉkʉbuutigwa kʉkyeni Bala kʉ Ɨsyakʉlɨngaania. Looli ʉkʉbuutigwa ʉko mbombo itolo ɨjɨ jikʉbombigwa na bandʉ. 12 Mukʉmbʉke ʉkʉtɨ, akabalɨlo kala mukaalɨ pamopeene na Kɨlɨsiti. Mwalɨ bo ʉlwa baheesya, paapo mukaalɨ benekaaja pamopeene na Banyaisilaɨli. Ʉmwe mukaalɨ balɨɨlanisi ndʉfingo ʉlwa lwitɨkano na Kyala.† 2:12 Ʉlwitɨkano na Kyala Bala iisyʉ Ʉlwitɨkano kʉ Ɨsyakʉlɨngaania. Kangɨ mwatʉʉgalaga nkiisʉ kɨsita lʉsʉʉbɨlo nʉ kʉmmanya Kyala.

13 Ʉmwe mwe mulʉngeene na Kɨlɨsiti, ijolo mwalɨ pabʉtali na Kyala, looli akabalɨlo aka abasegeliisye ʉkwendela mwi ilopa lya Kɨlɨsiti Jesu. 14 Namanga Jesu jʉʉjo, jo ʉjʉ atʉfwenie. Atʉbʉngeenie ʉswe twe Bajuuta na nuumwe mwe mukaja Bajuuta ʉkʉja kandʉ kamokeene. Ʉkwendela mbʉfwe bwake, aalɨsoosiisyepo iimato ɨlya bʉlʉgʉ, ɨlɨ lyatʉtapwile kʉbwandɨlo. 15 Aasisoosiisye ɨngomeelesyo nɨ ndagɨlo ɨsi Kyala aabapeele aBajuuta, ʉkʉtɨ twesa tʉjege kandʉ kamokeene akapya mwa Kɨlɨsiti. Mo muno aabombiile ʉkʉtʉpa ʉlʉtengaano. 16 Aatʉfwenie nʉ kʉtʉbɨɨka ʉkʉja kandʉ kamokeene nkyeni mwa Kyala. Kʉ njɨla jaa kʉfwa pa kɨkohekano, aabʉsoosiisyepo ʉbʉlʉgʉ ʉbwa Bajuuta na aba bakaja Bajuuta. 17 Kɨlɨsiti aaliisile kʉkʉbalʉmbɨlɨla ɨNdʉmi ɨNunu ɨjaa lʉtengaano, ʉmwe mwe mukaja Bajuuta, mwe mwalɨ pabʉtali na Kyala, nʉ kʉtʉlʉmbɨlɨla ʉswe twe Bajuuta, twe twalɨ kɨfuki nagwe. 18 Namanga ʉswe twesa twe Bajuuta, na nuumwe mwe mukaja Bajuuta, tʉbagiile ʉkʉsegelela kwa Taata kʉ njɨla jaa Mbepo jʉmojwene.

19 Po ʉlʉ, ʉmwe mwe mukaja Bajuuta, mukaja baheesya kangɨ. Looli mulɨ baana baa Kyala, kangɨ mulɨ benekaaja pamopeene na biikemo baake, kangɨ mulɨ bandʉ baa mu nyumba jaake. 20 Ɨnyumba ɨjɨ jɨjengiigwe pa lwalo ʉlwa batʉmigwa na bakunguluka, joope Kɨlɨsiti Jesu lyo ibwe iikʉlʉmba ɨlya pa lwalo pa nguto. 21 Pa lwalo ʉlo, gikʉjengigwapo amapamba goosa, ʉkʉtɨ jɨje nyumba jaa maka, nʉ kʉja tempeli nyiikemo kʉ Ntwa Kyala. 22 Akabalɨlo aka, nuumwe mukʉlʉngɨsigwa pamopeene, pa lwalo lwa Jesu, ʉkʉtɨ muje nyumba jaa Kyala, muno ikʉtʉʉgala kʉ njɨla jaa Mbepo gwake.