1 དེ་ཡང་ཕོལ་ལོལ་བདག་དང་སིལ་ཝ་ནཱ། ཐི་མོ་ཐེ་བཅས་ནས་བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ནང་དུ་ཡོད་པའི་ཐེ་སཱ་ལོ་ནེ་ཀེ་པ་རྣམས་ཀྱི་ཆོས་ཚོགས་ལ་འཕྲིན་ཡིག་སྤྲིངས་པ་འདི་ལྟ༌སྟེ། 2 ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།

3 སྤུན་ཟླ༌རྣམས། ཁྱོད་རྣམས་ཀྱི་དད་སེམས་ལྷག་ཏུ་ཆེ་རུ་ཕྱིན་པ་དང་ཁྱོད་ཅག་ཐམས་ཅད་ཀྱིས་ཕན་ཚུན་ལ་བྱམས་ཤིང་གཅེས་པའི་སེམས་དེའང་ཇེ་ཆེར་འགྲོ་བཞིན་ཡོད༌པས། ངེད་ཅག་གིས་རྟག་ཏུ་ཁྱོད་རྣམས་ཀྱི་ཆེད་དུ་དཀོན་མཆོག་ལ་བཀའ་དྲིན་ཞུ་འོས་སོ།། 4 དེའི༌ཕྱིར། ངེད་ཅག་གིས་དཀོན་མཆོག་གི་ཆོས་ཚོགས་སོ་སོ་ནས་ཁྱོད་རྣམས་ལ་བསྔགས་བརྗོད་བྱས་པ་ཡིན༌ཏེ། ཁྱོད་ཅག་གིས་གཉའ་གནོན་དང་དཀའ་སྡུག་མང་པོ་མྱོང་བའི་ཁྲོད་དུའང་སྔར་བཞིན་བཟོད་བསྲན་དང་དད་སེམས་བཅངས་པའི་ཕྱིར༌རོ།།

5 དོན་དེ་ནི་དཀོན་མཆོག་གིས་མ་འོངས་པར་དྲང་བདེན་གྱི་ཁྲིམས་ཐག་གཅོད་པར་འགྱུར་བའི་རྟགས་ཡིན༌ཏེ། ཁྱོད་རྣམས་དཀོན་མཆོག་གི་རྒྱལ་སྲིད་དུ་ཞུགས་འོས་པར་བརྩི་བའི་ཕྱིར༌རོ།། ཁྱོད་རྣམས་ཀྱིས་རྒྱལ་སྲིད་དེའི་དོན་དུ་སྡུག་བསྔལ་ཡང་མྱོང༌བ་ཡིན། 6-7 དཀོན་མཆོག་ནི་དྲང་གཞག་ཡིན་པས་ན། ནམ་མཁའི་ཞིང་ཁམས་ནས་གཙོ་བོ་ཡེ་ཤུ་དང་ཁོང་གི་ཕོ་ཉ་མཐུ་སྟོབས་ཅན་འཁོར་དང་བཅས་པ་མེ་ལྕེའི་ཁྲོད་དུ་མངོན་པར་འགྱུར་བའི༌ཚེ། ཁྱོད་རྣམས་སྡུག་ལ་སྦྱོར་མཁན་དེ་དག་ལ་དཀོན་མཆོག་གིས་ཀྱང་དེ་བཞིན་དུ་ལན་གནང་བར་འགྱུར་བ༌དང༌། ཁོང་གིས་དཀའ་སྡུག་མྱོང་མཁན་ཁྱོད་ཅག་དང་ངེད་རྣམས་ལྷན་དུ་དེ་ལས་ཐར་བར་མཛད་ངེས་ཤིང༌། 8 དཀོན་མཆོག་ངོ་མི་ཤེས་པ་དང་བདག་ཅག་གི་གཙོ་བོ་ཡེ་ཤུའི་འཕྲིན་བཟང་ལ་མི་ཉན་པ་རྣམས་ལ་ལན་དུ་ཉེས་ཆད་གཅོད་པར་འགྱུར་བ༌དང༌། 9 དེ་དག་ལ་གཏན་དུ་འཇིག་པའི་ཉེས་ཆད་ཕོག་སྟེ། གཙོ་བོའི་ཞལ་རས་དང་ཁོང་གི་དབང་ཤེད་ཀྱི་གཟི་འོད་དང་ཁ་འབྲལ་བར་འགྱུར། 10 ཁོང་ཉིད་ཕེབས་ཡོང་བའི་ཉིན་ལ། དོན་དེ་རྣམས་འབྱུང་ངེས༌ཏེ། ཁོང་གི་དད་ལྡན་དམ་པ་རྣམས་ཀྱི་སྟེང་ནས་རང་ཉིད་ལ་གཟི་བརྗིད་འཐོབ་པ༌དང༌། ཡང་དད་ལྡན་ཐམས་ཅད་ཀྱི་ཁྲོད་ནས་ཁོང་ལ་ངོ་མཚར་བར་འགྱུར། དེ་སྔར་ངེད་ཅག་གིས་བདེན་དཔང་བྱས་པ་ལ་ཁྱོད་རྣམས་ཀྱང་ཡིད་ཆེས༌སོ།། 11 དེའི༌ཕྱིར། ངེད་རྣམས་ཀྱིས་རྟག་ཏུ་ཁྱོད་རྣམས་ཀྱི་དོན་དུ་འདི་ལྟར་གསོལ་བ་འདེབས་བཞིན་ཡོད༌དེ། བདག་ཅག་གི་དཀོན་མཆོག་གིས་ཁྱོད་རྣམས་ལ་ཞལ་འབོད་གནང་བ་ནི་འོས་པར་གཟིགས་པ༌དང༌། ཡང་ནུས་མཐུའི་སྒོ་ནས་ཁྱོད་རྣམས་ཀྱི་འདུན་པ་བཟང་པོ་ཐམས་ཅད༌དང༌། དད་སེམས་ལ་བརྟེན་ནས་བྱས་པའི་ལས་ཐམས་ཅད་འགྲུབ་པར་མཛད་ཕྱིར་ཞུས༌པ་ཡིན། 12 དེ་ནི་བདག་ཅག་གི་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་བཞིན༌དུ། ཁྱོད་ཅག་གི་སྟེང་ནས་བདག་ཅག་གི་གཙོ་བོ་ཡེ་ཤུའི་མཚན་ལ་གཟི་བརྗིད་ལྡན་པར་འགྱུར་བ༌དང༌། ཁྱོད་རྣམས་ལའང་ཁོང་ནས་གཟི་བརྗིད་འཐོབ་པར་འགྱུར་བའི་ཕྱིར༌རོ།།