1 Zezì tı̨lı k'e naetłe ekò dǫ ı̨łè wegǫ̀hłı̨ gots'ǫ wedaà goìlee yaɂı̨. 2 Wecheekeè dageehke, “K'àowo, amìı wehołı̨į̀ k'èxa dıı dǫ wedaà goìlee wegǫ̀hłı̨, ededı̨ hanì-le-ı̨dè wetà eyıts'ǫ wemǫ?” gıìhdı.

3 Zezì gots'ǫ̀ hadı, “Dıı dǫ hołı̨ı̨ hòèhtsı̨ t'à ajà nıìle, eyıts'ǫ wèot'ı̨ hołı̨ı̨ hogèhtsı̨ t'à hajà nıìle. Nǫ̀htsı̨ naxıdaà eyı dǫ gha enıìyah hohtsı̨ ha nıwǫ t'à, ajà hǫt'e. 4 Įłaà goxè dzęh agǫ̀ht'e et'ıì amìı jǫ ts'ǫ̀ sı̨ı̨hɂàa sìı wegha eghàlats'eeda ha hǫt'e. Whaà-le-t'ıì to agode ha, hanì-ı̨dè dǫ wı̨ı̨zìı eghàlaeda ha dìì agode ha. 5 Įłaà dıı nèk'e whıhda et'ıì dǫ hazǫǫ̀ gıgha dzęh aht'e,” gòhdı.

6 Zezì hadı tł'axǫǫ̀ dèè k'e dèèze. Ehtł'è edewazeè ta ayį̀į̀là gà dǫ wedaà k'e ayį̀į̀là. 7 Zezì eyı dǫ ts'ǫ̀ hadı, “Sıloam tıa whehtǫǫ ekǫ nàątła gà nedaà k'enaı̨htse,” yèhdı. (“Sıloam” gedı nı̨dè “wets'ı̨ı̨hɂà” gedıì-agedı.) Eyıt'à eyı dǫ ekǫ nàhtła gà ededaà k'enaı̨htso. Edekǫ̀ ts'ǫ̀ naetłe ekò wegha xègoèht'į̀ ajà.

8 Dǫ gıgà nàdèe eyıts'ǫ ı̨nę̀ę t'asìı eekèe zǫ t'à dǫ gık'èezǫǫ sìı dałegeehke, “Dıı dǫ t'aats'ǫǫ̀ t'asìı eekè là eyı nì-ı̨t'e?” gedı. 9 Dǫ mǫ̀hdaa hagedı, “Hęɂę, eyı at'ı̨,” hanìkò mǫ̀hdaa, “Į̀le, eyı nıìle, ekìı yexèht'eè wègaat'ı̨,” gedı.

Hanìkò eyı dǫ sìı hadı, “Eyı dǫ aht'e ne,” gòhdı.

10 Eyıt'à dageehke, “Dànìghǫ dıì negha xègaat'ı̨į̀ agòjà?” gıìhdı.

11 Gots'ǫ̀ hadı, “Dǫ Zezì gıìhdı, ehtł'è edewazeè ta ayį̀į̀là gà sedaà k'e ayį̀į̀là. Sıloam tıa whehtǫ ekǫ edek'enaı̨htse sèhdı. Ekǫ sedaà k'enaıhtso là segha xègoèht'į̀ agòjà,” gòhdı.

12 “Eyı dǫ welaedì?” gıìhdı. “Wek'èehsǫ-le,” gòhdı.

13 Eyı dǫ sìı Pharısee gı̨ı̨lı̨ı̨ ts'ǫ̀ geèhchì. 14 Eyı dzęę̀ k'e Zezì ehtł'è edewazeè ta ayį̀į̀là gà dǫdaà k'e ayį̀į̀làa sìı Nǫ̀htsı̨ Dzęę̀ k'e ayį̀į̀là. 15 Pharısee gı̨ı̨lı̨ı̨ sìı eyı dǫ dageehke, “Dànì nedaà k'aàt'ıì ajà?” gıìhdı. Dǫ gots'ǫ̀ hadı, “Ehtł'è sedaà k'e ayį̀į̀là, sedaà k'enaıhtso, eyıts'ǫ dıì segha xègaat'ı̨į̀ agòjà,” gòhdı.

16 Pharısee mǫ̀hdaa Zezì ghǫ hagedı, “Eyı dǫ at'ı̨ı̨ sìı Nǫ̀htsı̨ Dzęę̀ k'èdì nıìle t'à, Nǫ̀htsı̨ gots'ǫ at'ı̨ nıìle,” gedı.

Hanìkò mǫ̀hdaa hagedı, “Dıı hanì enıìyah hòèhtsı̨ nı̨dè dànì hołı̨ı̨-hohtsı̨ı̨-dǫǫ̀ welè?” gedı t'à ełek'ę̀ę̀ agı̨ı̨wǫ-le agejà.

17 K'achı̨ ı̨łàà eyı dǫ dageehke, “Nı̨ nedaà k'aàt'ıì ayį̀į̀là ne t'à eyı dǫ sìı weghǫ dàı̨dı?” gıìhdı.

Dǫ gots'ǫ̀ hadı, “Eyı dǫ nakwenàoɂǫǫ hǫt'e,” gòhdı.

18 Dǫ wedaà k'aàt'ıì ajàa sìı Israel gha k'aodèe ı̨łaà gıgha ehkw'ı-ahodı-le t'à eyı dǫ wèot'ı̨ gokàgehɂà. 19 “Dıı naxıza nì-ı̨t'e?” gedıì dagogeehke. “Dıı dǫ wedaà goìlee wegǫ̀hłı̨ nì? Dànìghǫ dıì wedaà k'aàt'ıì ajà?” gedıì dagogeehke.

20 “Dıı goza hǫt'e, eyıts'ǫ wedaà goìlee xè wegǫ̀hłı̨ wek'èts'eezǫ,” wèot'ı̨ hagedı, 21 “Hanìkò dıì dànì k'eet'į̀ ajàa sìı eyıts'ǫ amìı k'eet'į̀ ayį̀į̀làa sìı wek'èts'eezǫ-le. Naxı̨ daweahke, weghoò k'ètłǫ ne. Edegha gode ha dìì nıìle,” gedı. 22 Dǫ wèot'ı̨ Israel got'ı̨į̀ gha k'aodèe ts'àgeejı̨ t'à agedı. Israel got'ı̨į̀ gha k'aodèe dıı hagedı ı̨lè, “Amìı, ‘Zezì, Chrıst hǫt'e,’ hadıı sìı ełèts'ehdèe-kǫ̀ at'ı̨ ha-le,” gedıì yatıì gèhtsı̨ ı̨lè. 23 Eyıt'à wèot'ı̨ hagedı, “Weghoò k'ètłǫ ne, naxı̨ daweahke,” gedı.

24 Dǫ wedaà k'aàt'ıì anajàa sìı k'achı̨ dageehke, hagedı, “Nǫ̀htsı̨ wenadąą̀ ehkw'ı goı̨de. Eyı dǫ sìı hołı̨ı̨-hohtsı̨ı̨-dǫǫ̀ hǫt'e wek'èts'eezǫ,” gıìhdı.

25 Dǫ hadı, “Hołı̨ı̨-hohtsı̨ı̨-dǫǫ̀ elı̨, elı̨-le wek'èehsǫ-le. Dıı zǫ wek'èehsǫ: Sedaà goìle ı̨lè hanìkò dıì segha xègaat'ı̨į̀ agòjà!” gòhdı.

26 K'achı̨ dageehke, “Ayìı dànììlà? Dànì nedaà k'aàt'ıì ayį̀į̀là?” gıìhdı.

27 Dǫ gots'ǫ̀ hadı, “Hòt'a hanaxèehsı̨ ı̨lè hanìkò seàhkw'ǫ-le. K'achı̨ naxıts'ǫ̀ haehsı̨ ha dahwhǫ nì? Naxı̨ sı wecheekeè aahłı̨ ha dahwhǫ nì-ghǫ aahdı?” gòhdı.

28 Hagòhdı t'à yatıjıı t'à gık'adaedè, hagıìhdı, “Nı̨ wecheekeè anet'e! Goxı̨ Moses wecheekeè ats'ı̨ı̨t'e. 29 Nǫ̀htsı̨ Moses ts'ǫ̀ goı̨de wek'èts'eezǫ hǫt'e, ekò eyı dǫ awį̀ı̨dıı sìı edı̨į̀ gots'ǫ dǫ ne wek'èts'eezǫ-le,” gedı.

30 Eyı dǫ gots'ǫ̀ hadı, “Sıì segha enıìyah aahdı! Sedaà k'aàt'ıì ayį̀į̀là kò edı̨į̀ gots'ǫ dǫ ne sìı wek'èahsǫ-le nì? 31 Nǫ̀htsı̨ sìı hołı̨ı̨-hohtsı̨ı̨-dǫǫ̀ eèhkw'ǫ nıìle wek'èts'eezǫ. Dǫ Nǫ̀htsı̨ wınì k'ę̀ę̀ eghàlaedaa sìı yeèhkw'ǫ hǫt'e. 32 Dǫ wedaà goìle xè wegǫ̀hłı̨ı̨ sìı wedaà k'aàt'ıì adlà ghǫ ets'ıìkw'o whìle hǫt'e. 33 Eyı dǫ Nǫ̀htsı̨ dahxà eghàlaeda-le nı̨dè t'asìı hale ha wegha dìì ha ı̨lè,” eyı dǫ gòhdı.

34 Hadı t'à gıts'ǫ̀ hadı, “Negǫ̀hłı̨ gots'ǫ hołı̨ı̨-hohtsı̨ı̨-dǫǫ̀ anet'e, hoghàgoı̨htǫ ha neewǫ nì?” gıìhdı tł'axǫǫ̀ xàdegeèzhì.

35 Ełègehdèe-kǫ̀ gots'ǫ xàgeèhxà Zezì yeghǫ ıìkw'o, k'achı̨ yaɂı̨ ekò hayèhdı, “Dǫ-wet'àaɂàa-deè negha ehkw'ı adı nì?” yèhdı.

36 Dǫ hadı, “K'àowo, amìı awį̀ı̨dı? Segha ehkw'ı adı ha t'à, sets'ǫ̀ haı̨dı,” yèhdı.

37 Zezì yets'ǫ̀ hadı, “Dǫ weghàı̨da xè nets'ǫ̀ godee sìı eyı hǫt'e,” yèhdı.

38 Ekòet'ıì dǫ hadı, “Sets'ǫ̀ K'àowo, segha ehkw'ı aı̨dı,” hadı tł'axǫǫ̀ yets'ǫ̀ nàgòı̨hgè.

39 Zezì hadı, “Dıı nèk'e dǫ gısınìyaetı ha jǫ ts'ǫ̀ ahjà. Dǫ gıdaà goìlee sìı k'egeet'į̀ agede ha, eyıts'ǫ dǫ gıgha xègaat'ı̨ı̨ sìı gıdaà goìle agode ha,” gòhdı.

40 Pharısee gı̨ı̨lı̨ı̨ mǫ̀hdaa Zezì gà nàgeèhzaa sìı hadıì gıìkw'o t'à Zezì dageehke, “Goxı̨ sı godaà goìle nı̨ı̨dıì nì-aı̨dı?” gıìhdı.

41 Zezì hadı, “Naxıdaà goìle nı̨dè naxıhołı̨į̀ whìle ha ı̨lè, hanìkò gogha xègaat'ı̨ dahdı t'à naxıhołı̨į̀ ı̨łaà naxık'e whela hǫt'e,” gòhdı.