Téerëe bíníyú unna won Pool Filemoo ra
Kúnsëe
Ƴee daa unna bíní Pool Filemoo ra. Ɗi fi Filemoo húmú yíkëe alal te húmú lahte i ñaam faami. Di ɓaahi ɓëewí ƴaa bín fë, ñaammi wa daa súrgë yée ké yen woteh. Pool waarete ri Uni Neba, ɗi haalte ngémë níi ɗi yeeltee hen kooji Pool.
Húmú lahte ow di ñaammi Filemoo hínú Onesime, fússé hegohte. Ɓani Pool yúhëntúu homi Pool kasaa, ɗi haalte ngémë.
Jamanii baaha, ñaam fús hegoh níi habaatu raa, tíkúu daani misikke níi misik te húl sah na ɗam na.
Pool yeñ Onesime Filemoo na, bíníté unni ƴeh tíkké yaˈi, komaalohi wa Filemoo. Filiɓ unna, Pool ɗagiɗte Filemoo, baaliɗte Onesime Filemoo na, wonte ri biti ɗi habaˈ ri koy-yaafi.
Ɓëyí fí jaŋi téeríi bee ɓéeɓ ay yúh biti ɓëewë gémú Yéesú-Kiristaa na ra ɓéeɓ, wa i koy-yaay.
1
Wodohi Pool Filemoo
1 Ɗo fi Filemoo kooji fun, ɗo fa bok a fun légéy rë, soˈ mi Pool, soˈ fa téƴú kasu ndah Yéesú-Kiristaa ra, funi Timoote koy-yaafi yen filiɓ ngémë, fun na woduu ro. 2 Fun na woduu Apiyaa* 1.2 Apiyaa :Ɗi ow ɓeleɓ. koy-yaafi yen filiɓ ngémë ɓal, a Arkipe fa yeni boku haaˈa ra, a ɓëy ílí jaŋaa na teeˈuu faamu ra. 3 Baap-Koo a Yéesú-Kiristaa Yíkëe líhún rën mal, on ɗon jaamma !
Yee ɗagiɗ Pool Filemoo ra
4 Filemoo, wahtii ɗagaa mi níi nuf soˈ pay ɗoo na rek, faraah mi sím Koope fi yen, 5 ndah mi kelohte ɗee gémëˈ a ɗee fahaˈ fu Yéesú-Kiristaa Yíkëe te lahiɗte ɓëewí Koope ɓéeɓ njiriñ ra. 6 Soˈ nék, yee na ɗaŋ mi ra daa ri bitih, ngémë boku yen baa ra lah njiriñ, nda fu yúh níi lan iñi wunna ɓéeɓ lahu yen gémë gémú yen Yéesú-Kiristaa na ra, ɗi lah ndam. 7 Ɗo fi koy-yaasoˈ, fahaˈa fahaˈ fu ɓëewí Koope ra, onte wa doole, sosilte keeñ soˈ, yëellíɗté rí.
Layidi Pool Onesime
8 Ɗaaha, Kiristaa onte soˈ sañ-sañi túuƴëe mí rë yee nay fuu page ra sah ndaa, 9 yee nay mi roo ɗage bee ra nék, mi fahaay biti mi túuƴë rë rí túuƴë. Fu pagaa ri biti fu fahaˈ soˈ fahoo daa génël sëˈ. Soˈ mi Pool, soˈ fa faan soˈ maan bee ra, ɓaatte biti mi téƴúté kasu abee ndah Yéesú-Kiristaa ra, daa mi na ɗaŋ ɗo. 10 Yee nay mi roo ɗage ra nék, mi ɗagiɗ ɗi Onesime fa hen koy soo na, mi hente baap ɗii na filiɓ ngémë di kasaa hom mi bee ra. 11 Ɗéɓëenë, ɗi lahray ro njiriñ ndaa leegi ɗi lahiɗte yen ɓéeɓ ana njiriñ† 1.11 Onesime : daa ri « lahte njiriñ » di gerek.. 12 Kon, mee roo rii nimiliɗ ɗa te lah yúhé biti daa ri keeñ soˈ. 13 Mi yef ri soo na dee koon daa génël sëˈ nda ri légéyíɗ sëˈ iña nay fu soo légéyíré koon homi soˈ filiɓ kasaa bee ndah Uni Neba ra, 14 ndaa mi fahaay paŋ dara te fu ñéeréeh në. Mi fahaay gangalu paŋi yii wuni bah, mi fahaˈ biti fu núhëe rí keeñu. 15 Mín hena ɗah, takaˈ ee ke ɗoni Onesime baa waɗ waro, nda maañeh fíi fu liilaat ɗi faw. 16 Leegi, ɗi henlay ñaam kep, ɗi gén ñaam fap, ɗi koy-yaay, bi fahuute níi fahaˈ. Soˈ mi bee déˈ, mi fahaˈte ri níi fahaˈ, ndaa ɗo fu waɗtee rii fahaˈ fahaˈi luk bi funi af biti ɗi súrgúu, te ri koy-yaafu filiɓ ngémë.
17 Ƴaha biti fu hampe ñéerëˈí yen raa nék, lah habee ri ti biti fu ham soˈ nen. 18 Ƴaha biti ɗi tooñ ro tooño mbée ɗi lahiɗ ɗo kabut, pegoh soˈ wa. 19 Soˈ mi Pool daa mi na bíní a yaˈ soˈ ee bitih : « Soˈ mi beh, daa mi nay roo yínlé. » Soˈ nék, mi fahaay roo won biti ɗo ɓal, fu lahiɗte soˈ kabut te kabut ka, ɗi pesu, ɗo fi bah. 20 Ahaŋkay, ɗo fi koy-yaasoˈ, pagiɗ soˈ yii baa ndah Yíkëe, fu yëellíɗ keeñ soˈ ndah nona nonu yen Kiristaa na ra. 21 Wëerté sëˈ biti iña bíní mi ro ƴee ra, fay waa paŋ níi fu ɓaat na kay sah. 22 Lah saamiɗ soˈ tígí homa mi ɓal ndah mi yaakaarte bitih ɗaŋŋi ron tahte leegi mi nimiliru ron.
Takohi Pool a Filemoo
23 Epafaraas fa funi homu kasaa ndah Yéesú-Kiristaa ra na wodoh ro, 24 ɓani Marka a Aristarka a Demaas a Lúkkë, ƴee funi wa boku légéyë rë. 25 Yéesú-Kiristaa Yíkëe líhë rën mal !