Téeríi ana fa bíníyú unni kayya won Pool ɓëy Tesalonik ra
Kúnsëe
Pool daa bíní ɓëy ílí jaŋii Tesalonik unni ƴeh. Filiɓ unna, ɗi ɗéɓpí gérém Yíkëe di gémë gémú ɓëy Tesalonik ra (1.3), ɗi ɗagiɗte wa, wa ham légéyë nahu wa ra. Fu ot Pool bíní wë unni ƴeh, nísí níɓɓë na yah jaŋii Tesalonik ra. Woni ban fi nimili Kiristaa daa ɓaatti kúɗ wona filiɓ Tesalonik, ndah lahte ɓëewí wonuu biti nagajek bisi baa lahte níi gétté. Lahte ƴi wonu tih bisi baa lahay doom ndaa leɓohte. Ƴaa aa na waa na kaaˈuute légéy, ñamuu yaˈ yi ɓëewí kayya.
Ɗi wonte wa :
- yii leŋke ayi Yíkëe yiin bis-këem (1.3-10),
- yii leŋke yee nay këllée Yéesú rë (2.1-12),
- yii leŋke híinndëh, ñee waali Koope (2.13-17),
- a yii leŋke ɗee lahaˈ légéy solo ow na ra (3.6-15).
Ɓëyí fí jaŋi téeríi bee ɓéeɓ ay ot biti légéy daa wun ow na, ɓëeˈ ɓanti sehaa iñi ɓéeɓ yaˈ ow, ɗi sehaalee nimili Yíkëe.
1
Wodohi Pool ɓëy Tesalonik
1 Ɗon fi ɓëy ílí jaŋii Tesalonik fa nonu ɓëewí Baap-Koo a Yéesú-Kiristaa Yíkëe rë, soˈ mi Pool, funi Silaas a Timoote fun na woduu ron. 2 Baap-Koo a Yéesú-Kiristaa Yíkëe líhún ron mal, on ɗon jaamma !
Ayi Yíkëe yiin bis-këem
3 Koy-yaayyi ƴeh, fun míníh ɓanti dékëˈ símí Koope ndah ɗon. Fun warutee ri sím ndah ngémën ɓaatohte caak, te fahantaˈa hom hanndal kon ɗa ɓaatoh ɓaatoo na saañ. 4 Yii baa daa tah ílí jaŋii pay fun ɓéeɓ, fun sawoor won ɓëewë filiɓ yii leŋke ɗon na, ndah filiɓ mokla na moklu ɗon ɗa a súfúñ fën ɓéeɓ, ɗon habute ngémën híin.
5 Baa daa nay teeɓee biti aattiyaˈi Koope tíkëˈ waal, nda ɗon habuu ɓëewí Nguur ki Koope waɗte wa, nguur ka tah ɗon na súfúñú rë. 6 Koope, ɗi fa júɓ ɗë ay mokil ɓëewë moklu ɗon ɗa ti di mokluu wa ɗon nen, te nagajek baa daa kaah. 7 Ɗi ay hílsíɗ ɗon fa na súfúñú rë, hílsíɗ fun na ɓal. Yiin nay feeñiyee Yéesú-Yíkëe sun-Koo, ñéerëˈ a doolii malaaka yi ra, iñƴaa ay lahee na. 8 Ɗi ay ayee filiɓ njaar kíi, keen sun fi ɓëewë kaaˈuu yúhí Koope, te kaaˈuute ñeyi Uni Nebi Yéesú-Yíkëe rë. 9 Daana nay keene sun fi wa ra ay dékée saŋkii wa, wa wulliru tígí etaˈ Yíkëe, wulliru tígí etaˈ ndami gaani. 10 Yii baa ay lahe yiin nay nimile Yíkëe rë. Yiin fi baaha, ɓëewë nonu ɗii na te gémúté ɗii na ra ɓéeɓ ɓéyíɗ ɗí, ɗi neɓaˈ wa yeel. Ɗon fi ƴaa ɗon ay none ɓëewí ƴaaha na, ndah ɗon gémúté unna komu fun ɗon ɗa.
11 Yii baa daa tah fun na ɗagiru ron faraah. Fun ɗaguu Koope biti ɗi on ɗon, ɗon yeeliyoh pesa dëek ɗi ɗon ɗa. Fun ɗagu biti di doolii, ɗi habraˈ ron ɗon paŋ yee fahuu ɗon paŋ di yin wun ɗa ɓéeɓ, te ri habraˈ ron yee na pagu ɗon filiɓ ngémën ɗë. 12 Ɗaaha, ɗon ɓaatti ɓéyíɗ tii Yéesú Yíkíi yen, ɗi ɓéyíɗ ɗon fi ƴaa ɓal. Ƴaa ay kolee mala nay onee Koope fi yen a Yéesú-Kiristaa Yíkëe rë.