1 Muu ze tí ndâ mbe kû cu wáràgà tí nó a ndâ ꞌduù taꞌô: ŋìnó a ye tí Páwòlò, giì je ndâ Sìlìvánò ta Tìmàtéyò. Ze kû cu wáràgà tí nó ji yo tí ndâ ꞌduù mì Mbíṛì tí Bu ndoo, tí ndâ ꞌduù mì Mbe tí ndoo Jézù tí Bìndi-Mbíṛì, mbe kû kili ta ṛè mì Bìndi-Mbíṛì mí gbí gbata Tèsàlónìkà. 2 Ze kû ꞌdeke tí ze ji Mbíṛì tí Bu ndoo, ze delè kû ꞌdeke tí ze ji Mbe tí ndoo Jézù tí Bìndi-Mbíṛì, máa, ndú ꞌví cù ꞌdê ngo cù ndú mítí yo, ndú delè ꞌví si yo ꞌví dù nìkì maa.

3 Àá mì ze a ndeṛè tacó bà ꞌdè nìkì maa ji Mbíṛì go ŋìnó náa à tí  tacó tí yo ꞌdáá gî, ndâ náꞌvindí ze, tacó yo kpónó kû tee njembí yo mítí Mbíṛì ta wotí tí  ndii ŋìnó sàà kùṛo gî. Yo delè kû zè tí yo gbí òkò tí yo nìkì ta banga tí  ngé ndii gî. 4 Ze kû mba tí ze ta ṛè yo kùṛo ndâ ꞌbí mbe kû kili ta ṛè mì Bìndi-Mbíṛì, tacó à tà kpêtí má kû pèè mbí yo ta bà mèèkèꞌi tí yo, yo kpòò kû tee káa njembí yo mítí Mbíṛì.

5 Gbí có bà tee njembí yo kácáá mítí Mbíṛì nò énó máa, yo ŋò ni gî máa, yí a mbe waa yúcó. Káa mboo tàkò ŋa i tí nò náa yo kû me nò a bà bàkà yo mì Mbíṛì tí ndâ bòò-gba mì wó tí Mbíṛì. 6 Mbíṛì bà waa có ta yúcó, yí bà kèèndè mbugo tí nó náa yo kuu gbí  nó á mítí ndâ mbe kû mbu yo nó gî. 7 Bìndi  yí bà kaa yo tí ndâ ꞌduù tí nó náa à kpónó kû mèèkèꞌi tí yo nó mítí tó bàndò tí nó náa yí bà kaa ze mítí  nó ta o bà tùbà tí Jézù mì wó ꞌdo gbíṛì ta ndâ basìlì mì wó tí Mbíṛì, náa yí je wotí ji ndú. 8 Jézù ta o tí nò bà da nó gì co gbí ngba wu gí bà kèèndè có ndâ vò i mì ndâ mbe si Mbíṛì tí có lá, ta ndâ mbe biya bà ùnje gítí Banga-Ngú-Có mì wó tí Jézù tí Mbe tí ndoo, ji ndú. 9 Ndâ ŋa ndâ ꞌduù tí nò bà mbu ji bà waa có mítí ndú, énó máa, ndú ꞌví dù tí ndâ vóló-volo ꞌduù dúú bà ya tí , giì je bà mò ndú ꞌdo kùṛo Mbe tí ndoo gî, à delè bà mò ndú ꞌdo gbí ngba wotí mì wó gî. 10 Yí bà me ndâ i tí nò a i ta o tí nó náa yí bà gì tí , tacó wàa, ndâ ꞌduù tí nó náa yí kaa ndú mò gí mì wó gî nó ꞌví ùlù yí, ta bà te duù mítí wó nô. Yo ta o tí nò delè bà dù kuu gbí òkò tí ndâ mbe kû ùlù Jézù, tacó yo ùnje gítí yúcó tí nó náa ze táánò ꞌdè ji yo nó gî.

11 Ŋìnò a ndeṛè bà ꞌdeke tí ze ji Mbíṛì ta o ꞌdáá gî ká nò. Ze kû yù nambeè ꞌdo mì wó, máa, yí ꞌví si yo ꞌví dù tí ndâ ꞌduù mbe ꞌvii tí ndâ ꞌduù ŋìnó náa yí tèꞌé tí ndú gî, yí delè ta wotí mì wó ꞌví si yo ꞌví bàkà go ndâ tó có tí nó ꞌdáá gbí njembí yo nô, tacó wàa, yo ꞌví cee ta nèté tí nó náa yo kû bàkà yee tí kpónó nó ꞌdo gbí có mì bà tee njembí yo mítí wó. 12 Gbí ŋa kpokèjì tí nò, ndâ ꞌduù bà ùlù ṛè Mbe tí ndoo Jézù ꞌdo gbí có mì yo, ndú delè bà ùlù ṛè yo ꞌdo gbí có mì wó, á ꞌdo gbí nambeè mì Mbíṛì, delè ꞌdo gbí nambeè mì Mbe tí ndoo Jézù tí Bìndi-Mbíṛì.