1 Aung aneꞌ karavoto˜ ninge dootuuꞌkoo urantai daarireromaang daꞌ mmaikoꞌ Kaiasi, ninge aaꞌnaꞌ masikaꞌ piaaramaung. 2 Ee mmaikoꞌ, kunsimaramaung ning teing ookara kapooꞌnanka dake nkovemaing tampaꞌ nkovemaatooꞌnaang eeꞌnoko daꞌ tampaꞌ domantari otoai, daꞌ teeꞌ Tanuaang-aapei tampaꞌ otomanaꞌ. 3 Ning bakei aaꞌnaꞌ dotumaruꞌnung tenang niiꞌning niiꞌmaikororiꞌ poroma naumaama minkuraako tee dake kara masikung tampaꞌ siompemaung temuꞌketa siompemanaꞌ nariꞌ. 4 Tenang ninge taaravama, nkaning toireꞌke tee kara masikung tampaꞌ siompaamaung-koo ning tee bakei aaꞌnaꞌ dotumaramaung dau basinooꞌ.

5 Ee mmaikoꞌ, dake bakei tampaꞌ nariꞌ nkovemaung tenang dake teing niiꞌning Karistooꞌkoonavitu pakuerima, baruꞌnooꞌ teing damisimainku tampara doorenang osi kanteai berempaamaing dake pakuerimaung-koo. 6 Teinge tee dakaang piaa teing piaaverimaung tee siraꞌpauꞌ ookara Karistooꞌ bakanavitu-koo anke oꞌnorimaing-koo. Teka tenang temuriiꞌ nantoong diiꞌankoita tenkenaako niiꞌnooꞌke daankiariiꞌnaang, tenang napoꞌ dake pakueriai nanuꞌkoo Kumponing dotuaravainaꞌ. 7 Aiꞌ teing teing osi sipauꞌnung Karistooꞌkoong miring berempaavaꞌnaang mutaanang-nupoong-eta paku piavoroaꞌ. 8 Eeꞌnoko niiꞌke teing eeꞌning teeꞌ oroꞌnuka nantoong pakuarampiaing teing ninka nariꞌ pakumeeriainaꞌ tee kara masikung nau-anta-koo.

9 Ninge tee karavotonaneꞌ temuꞌ daariantuꞌnung niiꞌning kara minkuama diiꞌ Karistooꞌ bakanavitu teke otorimaing-koo. Teka tee naning Dioterepisi tevitu-koo baka pankaing-koo piavomaunge teing-koo, tee nkaang kara minkuantuꞌnung taaramuaruuꞌ. 10 Teeꞌkoo ning diiꞌanko meaing deekoꞌ mera tee siraꞌpampaing tee temuriiꞌ aarumo teie nkovumaung niiꞌ orakaꞌ minkumurima daang-koong tuumpimurima. Eeꞌnoko tee narung deeaꞌ, niiꞌnung tee teie teing niiꞌmaikororiꞌ daankiaama nanaamaing diikanooꞌ basiariko bakanava-koo bokuvuriaung, eeꞌnoko diiꞌ dootuuꞌnupoong-koo niiꞌning orokovurikooꞌ teing damisimainku pava-koo kuung boku-koo piavoroko, eeꞌnoko orokovurima kato bataꞌurikooꞌ Karistooꞌnavitu-eta.

11 Ee mmaikoꞌ, Kaiasi, naning orakaꞌ nkoarako tee bakaang aarumo siong-koo paaraveaukaꞌ, tampaꞌ nkoarako deekoꞌ siong-koo paaraveai. Baa tee naning kapooꞌ tampara nkovumaung tee tee naning Kumponing-etaing eeꞌnoko baa tee naning orara aarumo nkovumaung tee Kumponing tasiꞌpuaꞌ. 12 Ookarai nantoonge tee Demitereasi tee tampaꞌ minkuaamaung eeꞌnoko Ovoring bakaang kara masikung siompuko nariꞌ siraꞌparamaung. Napoꞌ niiꞌke teeꞌ nariꞌ minkuampimaunge eeꞌnoko tee dake noruꞌei otong tee niiꞌ niikaang kara tee masikung.

13 Ning tee kapooꞌnanka mmauꞌ otoꞌmemung daꞌ daarirerompeuꞌning, teka ninge teing ookara aneꞌkoo daari-koo piamoaꞌ. 14 Teka eeꞌ noruꞌamaang, ning pa dueꞌka daꞌanko mooꞌnaang, eeꞌnoko nariꞌ oing oomeeresi karompeaing.

15 Mooa tee daꞌkoo otoaing. Ainge daꞌmaikoriꞌke tampara tampaamaang daꞌkoo. Dake napoꞌ teeꞌ tampara tampema naueriai teing ookara mmaikoriꞌ miring tamperima.

Basi teꞌ.