Dene köcökpa te Pawülü ba fü wü kpara ka Yesu agbü Korïnito
2 Korïnito
Masere si-ngü
Dene kpah gara köcökpa, te Pawülü ba fü wü kpara ka Yesu Kurisito agbü Korïnito.
Nih tanga gbü 1 Korïnito 5:9, gü ba, te enga gina, o Pawülü ba mene köcökpa, te nih ngbü eï, gü ba, gina Korïnito ne, la de, engu ba ta gara köcökpa eyi, tima fü wü kpara ka Korïnito. Te di bala, 1 Korïnito la, ah zu de gina köcökpa, de te Pawülü tima fü wü kpara ka Korïnito, nda de. Amba nih ngbü eï, gü ba, ah de 1 Korïnito ne, angü ah de gina köcökpa ka Pawülü fü wü kpara ka Korïnito, te wüh to eyi esüka gara wü buku gbü *Ngari Me. Angü gigina na, ta te Pawülü ba ne, dürü ka-ye eyi.
Teka mene köcökpa ne, te nih ngbü eï, gü ba, 2 Korïnito ne, ah ena adi ka-ye de ebabata, anga ebabala köcökpa te Pawülü ba fü wü *kpara ka Yesu agbü Korïnito. Nih ngbü eï, gü ba, 2 Korïnito ne, teka te köcökpa la di de eꞌbaꞌbasu köcökpa ka Pawülü fü wü kpara ka Korïnito, te wüh to eyi esüka wü gara buku, te di gbü Ngari Me.
Fïngangü ka wü gara kpara te ewü wu ngü fa sü, gü ba, sidi nga mene köcökpa te nih ngbü eï, gü ba, 1 Korïnito, ta te Pawülü tima fü wü kpara ka Yesu agbü Korïnito ne, wü gara kpara agbü Korïnito kpala kpo ta da efala Pawülü, da ekpa ngüngü na, gü ba, “Pawülü de mürü fiti, angü engu zu de *mürü tima ka Yesu nda de.” Teka ngü la, fü Pawülü ayia gbü Efeso, anü agbü Korïnito, teka de ni reke ngü la kpala. Dela, ah de mene kokoro kaka, te engu mala, gü ba, “Ngü la to ta mere cïnga fü wü kpara ka Korïnito fa sü ne.” (Mü ena amaka ngü la gbü 2 Korïnito 2:1.) Fü Pawülü ayia ta azïnga te mene wü kpara, te ewü mere siti ngü la. (Mü ena amaka ngü la gbü 2 Korïnito 13:2). Fü ah alügü nga ye, adu agbü Efeso.
Ta te Pawülü du agbü Efeso ne, ah du ba gara kpeke köcökpa kpah eyi fü wü kpara ka Korïnito la. (Mü ena amaka ngü la gbü 2 Korïnito 2:3-4). Ah tima ta köcökpa la esaka Tito. Fü ewü ayia areke ngü ake Tito, gü ba, te Tito ena ayia gbü Korïnito, teka adu agbü Efeso la, ah le de Tito fü to gbü Makedoniya bete Türüwa. Amba sidi nga ngü te Tito nü sü tete, fü wü gara siti ngü akpo da emere te-wü gbü Efeso sela, teka ngü ka Yesu, te Pawülü ngbü erï wü kpara di ne. (Mü ena amaka ngü la gbü buku ka Wü Mürü Tima 19:23-41.) Te di bala, fü Pawülü ayia gbü Efeso, teka de ni nü, ni maka Tito agbü Türüwa kpala. Kpah bala, teka de ni rï wü kpara de kpala de ngü ka Yesu. Amba baka te engu koro kpala, Tito koro nda la de. Fü ngü la ayia ato mere cïnga emaguma Pawülü. Fü Pawülü adu ayia sela, ale kaje, anü agbü Makedoniya. Fü ah anü amaka Tito kpala. Fü ah aje züka ngü, te wü kpara ka Korïnito mere ne, gömö Tito. Angü wüh le ngü ka köcökpa, te Pawülü tima fü ewü ne, reke areke. Sidi nga züka ngü te Pawülü je de bala, fü ah adu aba mene köcökpa, te nih ngbü eï, gü ba, 2 Korïnito ne.
Wü ngü te mü ena amaka gbü köcökpa ka 2 Korïnito ne, wüh dene.
Sapïta 1–7 Ngü te di ezengba wü Pawülü de wü kpara ka Yesu
Sapïta 8–9 Ngü teka jiase fü wü mürü cïnga agbü Yudaya
Sapïta 10–13 Wazi te Yesu to fü Pawülü angü engu de mürü tima kaka
1
Dene mandï ka Pawülü fü wü kpara
ka Yesu Kurisito agbü Korïnito
1 De-yi, wü *kpara ka Yesu Kurisito agbü Korïnito, a ba köcökpa ne fü yi me-a, de-ra Pawülü, te Me fe ra *mürü tima ka Yesu, ake enga ni nih, Timoteyo. A to mandï fü yi, wü kpara ka Yesu de kpala, kpah de wü kpara ka Yesu agbü tö ka Akaya ꞌburu. 2 Wö nih Me ake Miri Yesu *Kurisito di de yi, de wüh to gu ngü ka-wü fü yi, de *züka maguma wü.
Dene ngü teka wazi te Me ngbü eto fü nih
3 Ma gbo nga ïrï Me, te di de Wö ye Miri ka-nih Yesu Kurisito ne, angü engu ngbü ewu cïnga nih, fü ah angbü ele ta-ngü te nih. 4 Engu ngbü kpah eto wazi fü nih, gbü wü cïnga te ngbü embü nih ne ꞌburu. Te di bala, nih tï kpah eyi ale ta-ngü te wü bu nih, adi egu maguma ewü gbü cïnga ka-ewü, teka wazi de te Me ngbü eto fü nih ne. 5 Angü te nih maka mere cïnga baka nda Yesu Kurisito la, Yesu ena ele ta-ngü te nih, de mere wazi ka-ye. 6 Cïnga te a ngbü ezü ne, ah teka ngü ka-yi, teka de yi je ngü ka Yesu, fü yi aküwa. Kpah bala, wazi te Me ngbü eto fü a gbü cïnga ka-a ne, ah kpah tüngü yi, teka de yi maka wazi, fü yi arü di kpekpeke gbü cïnga ka-yi, te ngbü embü yi kpah baka nda-a ne. 7 Te di bala ne, a kpe cürü de, angü a wu eyi, gü ba, te yi ngbü emaka cïnga, kpah baka nda-a la, yi ena amaka wazi kpah baka a, fü yi arü di kpekpeke gbü ngü ka Me.
8-9 Wü di enga wüna, a le amala nga cïnga, te mere a agbü Asïya, ne fü yi. Dela cïnga nda de. Angü ah de mere siti cïnga, te fa wazi a cu afa. Fü a afï, gü ba, “A ena akpi akpi gbü cïnga la, a tï aküwa nda-a de.” Amba cïnga la mbü a kükürü nda de. Ah teka de a ce ngü ka-a ꞌburu esaka Me, de engu küwa a me-ye. Angü wazi a be teka ngü la nda de. Amba wazi Me ladü. Engu tï eyi azükü wü kpara gbü kpi, duu me-ye. 10 Wayi, Me küwa a gbü siti kpi la eyi fanü. Engu ena aküwa a kpah aküwa, gbü wü gara cïnga, te ena amaka a te gara. Angü a o fïngangü ka-a eyi ꞌburu eküte Me, gü ba, “Fanü, engu ena angbü fï bü da eküwa a gbü wü ngü ꞌburu.” 11 Ah le kpah de yi di eyi-ta Me fü a, angü gba ka-yi la ena ale ta-ngü te a. Teka ngü la, mere bi wü kpara ena agbo nga Me teka ngü ka-a. Kükürü de, angü Me ena adi eküwa a, teka gba te bi wü kpara ngbü eku fefe teka a ne.
Dene si-ngü te ma koro tete na kpaka yi la de ne
12 Wü di enga wüna, wü gara kpara ngbü esu wu eküte a, gü ba, a de wü mürü fiti. Ah bala de! Angü a gïrï mani, teka adi efiti wü kpara di, baka wü kpara ka füh kotö ne, nda-a de. A wu eyi, gü ba, gbü ngbüngbü ka-a füh kotö sene, a ngbü fï bü emere ngü de maguma a biringbö, te ngbü ereke gbü jia Me, teka wazi de te Me ngbü eto fü a ne. Angü dela ngü te ngbü eto tadu fü a. Zu ngü te a ngbü emere ne, yi wu ta kpah kpo, gbü ngbüngbü ka-a esüka yi de kpala ne. 13-14 Ngü de te a ba tima fü yi ne, ngü gbügbü ꞌbasu ꞌbasu nda de. A ngbü emala ngü fü yi mbölö mbölö, baka te yi ngbü ewu, da eje ngü gbügbü na ereke areke ne. Ah le de yi fï ngü ne mbi mbi mbi. Te yi wu ngü ka-a mbi mbi la de la, ah le de ngü ka-a rï gbü nzö yi, teka fü yi ao fïngangü ka-yi tete. Te yi mere bala la, ngü ka-a ena ato tadu fü yi, kpah baka te ngü ka-yi ena ato tadu fü a te gara, gbü sïkpï te Miri Yesu ena adu akoro tete.
15 Ma wu ngü la eyi, fü ra adu ao ta gbü fïngangü ka-ra, gü ba, “Ma ena akoro aceka yi te enga gina, o ra nü agbü Makedoniya la de, teka de yi maka tadu du ꞌbasu.” 16 Angü ma fï ta, gü ba, “Te ma ena ayia agbü Asïya, da enü agbü Makedoniya la, ma ena afü kpuru to kpaka yi sela. Kpah bala, gbü dudu ka-ra agbü Makedoniya, ma ena afü adu kpah kpuru kpaka yi sela, teka de yi le ta-ngü te ra, teka nünü ka-ra agbü Yudaya.” 17 Amba, baka te ma koro eyi agbü Makedoniya, ma fü kpuru kpaka yi de ne, ngü la gbü jia yi esiti? Yi ngbü efï, gü ba, ma de mürü mani, te ma ngbü emala ngü efüfü afüfü? Ah bala de!
18 Wü di enga wüna, ma mala ngü fü yi ꞌbasu ꞌbasu nda-ra de. Ngü te ma mala fü yi de bala ne, ah de zu ngü, te Me wu kpo. 19 Angü ngü ka Yesu Kurisito, Ye Me, te a ngbü emala fü yi ake Sïla bete Timoteyo ne, ah de ngü ꞌbasu ꞌbasu nda de. Ah ka-ye zu ngü ka Me biringbö. 20 Angü mere bi züka ngü ta te Me mala gügü, gü ba, “Ni ena amere fü wü kpara ka-ni ne,” wü ngü la ꞌburu, nih maka eyi, teka ngü ka Yesu Kurisito. Te di bala, nih ngbü egbo nga ïrï Me, teka ngü ka Yesu. Fü nih angbü kpah emala, gü ba, “Ah di bala,” teka ïrï Yesu. 21 Me fe nih de nih ma ꞌburu me-ye, ao wü kpara ka-ye tete, teka ngü ka Yesu Kurisito. Fü ah ayia ato wazi fü nih, teka de nih rü kpekpeke gbü tima ka-ye la. 22 Me wa kpah tere eyi eküte nih, te ena adi esere nih, gü ba, nih de wü kpara kaka. Angü ah tima *Nzïla Wazi ye, akoro angbü emaguma nih, baka gina takpa ka *küküwa, te Me ena ato te gara fü nih agbü sü ka-ye agbü kpï ne.
23 Wü di enga wüna, ma su wu de. Me wu ngü la kpo. Si-ngü de te ma koro tete kpaka yi la de ne, ah teka te ma je nga *siti ngü ka-yi. Ngü de te ma je la, ah ke te-ra fa sü. Fü maguma ra ayia agürü. Fü ra ayia awu fanü, gü ba, te ma ena akoro ta kpaka yi kere sidi nga ngü la, de bane ma ena aro mö fü yi kpekpeke, fü ngü la ato cïnga fü yi. Te di bala, fü ra ayia afï, gü ba, ma tï anü kpaka yi la de. Ah le de ma ba ngü la, tima fü yi bü gbü köcökpa. 24 Yi ngbü efï, gü ba, a le ao te-a baka wü mere kpara, teka angbü gbü nzö ani de wazi? Ah bala de. A le arï yi, da eto wazi fü yi, teka de yi di engbü de mere tadu, angü a wu eyi, gü ba, yi to maguma yi eyi fü Yesu Kurisito fanü fanü.