¡Diuzh to grëse to!

1 Naa nac Pabl, tib zha ne pxeeḻ Dios nonee Xtiidz Ndzon me lo miech. Led miechd bzoo naa, led miechd pxeeḻ naa, sinque Jesús pxeeḻ naa, me ni Dios Pxoz me, meṉ ne bleeban me.

2 Laa naa rxeḻ tib guits rii ziaad lo to zigne no to nëz Galás i, nac to zha ne ngab lo Jesús; rquiaabdiuzh naa to, ni scagaa grë zha rii laa zho rxeeḻ bdiuzh lo to. 3 Dios meṉ ne nac Pxoz ne, ni Jesús meṉ ndzon ne rnabey, me nac meṉ ne tsoxco grë zhizhgab to, zeeṉa peet tsienied guic to. 4 Jesús bdeed xquieḻmban bdiizh me xtoḻ ne, psilaa me no lo grëtaa guieḻntseeb ne no lo guidzliu rii, laaw beeṉ me zigne gocladzse Dios meṉ ne nac Pxoz me. 5 ¡Gotsaa dziuuṉnon ne Dios sca, ni gdziṉd dze ne csaan ne dziuuṉnon ne me! Sca rieguiaḻa.

6 Rzee zdoo naa goṉ ne gardle gac nroob dze ga, laa to bzozitle lo Xtiidz Ndzon Dios, meṉ ne bredz to pcaania me to, porne nquialadz Jesús to. Wseed ne rliladz to niina, masaque rzac to na miṉcogaa csilaa to lo doḻ. 7 Per guieṉdraa stib wseed ne goṉ csilaa ne lo doḻ. Miṉe naca zha ne biadseed to i, lega rquidiese zho to, racladz zho ctsëë zho miṉe nac Xtiidz Ndzon Jesús.

8 Grëse zha ne guiaadnie stiblo wseed miṉe pseete no to, ni gnë zho lëë miṉ co csilaa to lo doḻ; zha ne sca guṉ, miech ndziibdeele ga nac zho. Teḻ chotaa sca guṉ, niicle teḻ naazhala, tib anjl ne guietgaa gbaaw, ible zdzibdee Dios zho. 9 Bnele naaw lo to, ni na laaw rneque naa stib: Teḻ cho zha ne guiadseed to stiblo wseed miṉe pseete no to, ni gnë zho lëë miṉ co csilaa to lo doḻ, ible zdzibdee Dios zho.

10 Nana goṉ ne znu rne naa, no to guiab parne guiaṉnziuu naa lo miech gane znu rne naa; per goḻgacnaṉ gaṉle, quiaguibd naa guiaṉnziuu naa lo miech, sinque laa naa noxco guṉ naa miṉe rnabey Dios. ¡Sac teḻne leḻ ncuaaṉe gleynie miech noxco naa, nlid dzigo xtsiiṉ Jesús ga noyuṉ naa!

11 Bets, bzian, goḻgacnaṉ sca gaṉle: Wseed ne nac Xtiidz Ndzon Jesús, miṉe biaḻseed naa to, led guicd miech biaba. 12 Paat biad naa nseed miech naaw, sinque Jesúszhal bneedza lo naa.

13 Led naṉle to gaṉle, zha nactaa grë miṉe beṉ naa zeeṉe bii no naa lo zhiwseed zha Israel; ptsidiḻ naa grë miech ne no xnëz Jesús, blëënie naa zho, pquianaḻ naa nloozh naa zho. 14 Bzhoob diidz ne naa nac zha ne pseedraa lo grë meṉladz naa, zha ne tipse biagrëë naa scuel; naa nac zha ne neer lo zho, sac naa ruṉ grëse miṉe rnabey zhiwseed zha Israel, ni naa rioxcoraa ruṉ grëse miṉe beeṉ grë pxozgol no. Sca nagoṉ goc naa lo zha Israel.

15 Ible güeynied guic naa, antes ne gal naa laa Dios bzooblole naa guṉbey naa Xpëëd me; laa me bleextsole naa, niapse porne nquialadz me naa. Zeeṉe bdziṉ dze co 16 laa me blu me lo naa, bzo me naa ga naa zaatne ndxie grë miech ne nacdraa zha Israel, gaseed naa zho Xtiidz me miṉe glu zha laa zho lo doḻ. Zeeṉe blozh goṉ naa Xpëëd me, biad naa niaguib naa ne gooṉ dieṉ cho nseed naa, 17 ni niicle biadgaa naa Jerusalén, nianabdiidz naa lo grë zha ne pxeeḻle me nonee Xtiidz me; sinque laa naa bia nëz Arab, wbirele naa nëz co, dzigoraa bdziiṉ naa Damasc stib.

18 Gocle tsoṉ iza dzigoraa bia naa Jerusalén, hor coraa beeṉbey naa Pedr; blëz naa lo me ga tsiiṉ ngbidz. 19 Gaque beeṉbey naa Jacob bets Jesús, laa grëraa zha ne pxeeḻ Jesús noyuṉ xtsiiṉ me, ni tib zho goṉd naa. 20 Dios zobwi gaṉle diidzli nac grë miṉe rne naa nu, led lega rned naaw.

21 Zeeṉe brie naa ga, laa naa bia nëz Siria ni nëz Cilis. 22 Grë zha Judé zha ne nole xnëz Jesús, gard guṉbey zho naa leṉ dze co. 23 Diidz ronse zho rnee zla zha ne nacgrë zho: “Meṉ ne scataa pquianaḻ ne, yele me noseed miech Xtiidz Dios, ni glo scataa gocladz me nitlo mew.” 24 Dzigo rley zho, rdeed zho xquizh lo Dios ne yele naa rliladz Jesús.