1 Fol ne Gode nemfakanea baatnenea Kobo Yesus Klaiste okok kamasanin nakabo ge baatnenebio kesoa ne Yesus Klaiste okoko okok kebianita futan olo dolanita Gode nakaia unangai Efesas bibo bianiba Yesus Klaiste wengo kla wafu blib ibo omfubenamabibe. 2 Nib Aye God esa eka Sume Yesus Klaist esa i dumo ibo daaye bianiba bobol ayam omkayemine!

3 Nibo Yesus Klaiste bainobo genobbuo dimo Gode nibo inamin namin ayamo omyebiobe. Nibte Yesus ete nanoba nib bobol tem funino makob anob kesoa Gode inamin namin ayamo esu buo omyebiobe. E inanebio kesoa nibo nib Sume Yesus Klaiste e Aye Gode niniino dobtouleb nomo! 4 Sinanggwano Gode dabale mo klaim blim bianea nibo dlakanea funanea Sinanomo i Klaiste bainobo geniba e meletan animibo ne kin dimo i hengmin blimanomabiobo ge funane kesoa nibo dlakanebiobe. 5 Gode nibo kla gobenea ele bobol tem funin ye dlakanea funanea Sinanoa Yesus Klaiste kaanea i hengmino walubenamabeo dimo i ne meme anomabiobo ge funanebiobe. 6 Gode e miine e kla goba bie dabanea daakenea kaanea nibo hengmino temo biobo dotlanebiobe. Gode inanea nibo daabenebio kesoa e kukub olo dot ayamobe. Nibo e niniino dobtouleb nomo!

7-8 Yesus Klaiste kaanea e ileme singanea nib hengmino walubenebiobe. Gode daayemin kukubo sum kesoa e inanea nibo daabenea nib hengmino omtlabenebiobe. Gode bobol tem funino ayam kesoa e nibo inabenebiobe. 9 Gode ele bobol tem funanea Ne sinanomo Klaiste dabaia daaknea kaanea nakaia unangai hengmino walubeneko ge funane biota memalo inaneta nibo watemobbiobe. Sino e bobol tem funin olo ayok otane memalo keimanobiobe. 10 Gode bobol tem funino enaminobe. E amo omakanebuo tlamo e inamin namino abilim uto bu osa eka dabalim olo bu osa alukum olminea Klaiste kimanamabebe. E bobol tem funin olo sino ayok binobio otane memalo e nibo alebenebiobe.

11 Gode okok olo klanebuo e halito mo naim blimobe. E sin funanea Ne sinanomo inamin namin olo inaneme ge funaneta omito e inamin namin olo klanebiobe. Sinanggwano Gode funanea Sinanoa item Klaist etem naniba i bobol funino makob animibo ne meme anomabiobo ge funanea nibo dlakanebio kesoa nibo e memebe. 12 Yuda ni sino Yesus Klaiste wengo wentenoba bainobo genobbio kesoa ni fumbianoba sinanomo nite Klaist ete nanoba amit nomabbiobo ge fumbianoba am olo tlamabo waiso bianoba ni Gode niniino dobtouleb biobobe. 13 Yudaba nakaia unanga ibsa inaniba Gode dowan weng ayamo wenteniba Yesus Klaiste bainobo gabibo e ibo ib hengmino temo blibo dotlanea Gode baabenea Ibo ne meletanobo ge baabenea e Hobe dobyebiobe. Sinanggwano Gode baanea Sinanomo nakaia unangai ne wengo bainobo geib mole i ne meletanobo, ne Hobe i dobyamabibo genebio e ibsa dobyebio kesoa ibo tekein kebiobe, ibsa e meletanobe. 14 Gode baanea Ne meletani dlebnia ne bib unang gamio i kukub misiamo alukum blimubenoa dleb utnia ne bib ut danamabibo genebiobe. Nibo hengmino temo biobo e dotlanebi otane memalo nib hengmino alukum mo blimubeim blimobe. Gode e meletan nibo e Hobe amitie bekebe bie kesoa nibo tekein kebuobe, sinanomo Gode bain inanea dleb utnea e bib ut danamabeo nib hengmino alukum blimubenamabo kesoa nibo e niniino dobtouleb nomo!

15-16 Ibo sbalmaniba nib Sume Yesus Klaiste bainobo gabianiba Gode bainobo galin naka mak unang maki gobe blib weng osa ne wentenia ne Gode niniino amitie dobtouleb blibe. Ne Gode nganhamang gamio ibsa daaye binabibe. 17 Ne nib Sume Yesus Klaiste e Aye Gode baabania Kobo Efesas bib seli bainobo gabibi bobol tem funin ayamo omyeba i keb kukubo kla tekein kebianiba eka keb wengo mitmakam osa kla tekein kenaine ge oha binabibe. 18 Gode bainobo gabib ibo dlakanea baabenea Ibo ne meletan kesoa sinanomo ne dleb utnia ne bib ut dania inamin namin ayamo doyamabibo genebiobe. Gode inamin namin olo doyamabibo genebuo ibo waiso bliobe. O dot sum kesoa ne Gode imin baabania Kobo i daabeneba keb kukubo mitmakamo tekein keine ge ohabibe. Ibo e kukubo mitmakamo tekein kenimibo e inamin namino doyamabibo genebu olo tekein kenomabiobe. 19-20 Eka ibo e kukubo tekein kenimibo Yesus Klaiste bainobo gabob naka unang nibo e titil olo omyebuo tekein kenomabbiobe. E titil olo dot sumobe. E titil olo nibo omyebu ota Yesus Klaist esa omalea titil olota e dofaanota hananea utnea e kweile kweitale kikib ye toumbiebe. 21-22 E inanea utnea toumbianea inamin namino abilim uto buo kima biebe. E kimanin okoko komok mak isa eka abiseli komokwal isa i kimanin okoko gaisenebiobe. E niniino naka maki memalo blib isa eka sinanoa walomabib isa i niniino alukum gaisenebiobe. E inanea Gode baabanea Kobo inamin namino alukum kima bianeba eka nakaia unangai ne bainobo gabib isa kimananale ge baabanebiobe. 23 Nakaia unangai Klaiste bainobo gabib ile makob e damobe. Eka ele makob i gabamobe. Bainobo galin nakaia unangai Gode okoko okok kebib ole Yesuse titil ota omkayebeta okok kebiobe. E titil ota inamin namino abilim uto bu osa eka dabalim olo bu osa okok kebobe. Inamin namino omalo nanamino blimobe.