1 Abram mangaptaogne heng kun taibuka taubuka ulamogha teng wilindi eptopne sa'o tarabare (99) wamogpa, Nuni Allah Abram el whingag lag taogti yubu lelamogti, “Na Na'uni Allah Imap So'oap Saelbamnange.*Yahudi yubuagna si “El-Syadai” engeropne anena, “Allah Nia Mangkina Saelbamlange” aro. Andi Nari yubuog ka'elapmendi, 'Uaho,' senelamnangeog ulamlulam. 2 Nari anag salag palilamnari, 'Anmabo anisag yabo maikno taukang,' aro salag palilamna,” seogpa, 3 Abram neneko whing tahip yabu sanukto pulingkiogpa Allahri yubu lelamogti, 4-5 “Nari anag salag lelamnange nene: Nimi sisa nubunge mog so'o a'ero-a'ero wamik nimi sikinisang an talulam. Ane sembe an si samenne Abram alangkeapne nene kom wamleba wene wendog si, 'Abraham†El si Abram agha Abraham aro engkaogne nene, 'Nimi mog so'oagne sikinisang,' aro engkaog. wamlulam,' aro engelangkeken. 6 Nari anag nimi likna pimneba, andi mangarobari mangkahyikne taneko maikno taikti, as nubu tangto a'ero-a'ero wamikti yubu a'ero-a'ero lelamukang. Sin taneko anabiag agha yubu sia leropnang raja babe seklamukang. 7 Nari anap anmabo amikneap, 'Na Na'uni Allah Na wamnun,' aro salag palilamnange nene ya'ag wamlebog ekon tan koma wamlulom. 8 So'o Kanaan ane an nimi sekelanan nang saog uro wamlam aghana, an anisag yabo sembe so'o ane 'Ngai taukang,' aro tatsineri, sin sembe Sikini Allah Na wamnun,” aro lelamogti, 9 “Nari salag palilamnange nene anap, anmaboap, anmabo amikneap sae mikip uro saelbamlulom.” 10 Allahri lelamogti, “Nari salag palilamnange nene ekon tan koma el uro wamlulom aro anap, anmaboap nengabo niap nengabo kon karebel talamlulom.‡ Abrahamap eldi me mangaro mangkahiyikneap sindi mabo kere kon sirikag kareplamekti, kere sirikag kon tepto sanuklamekpa, Abrahamap eldi maboap nengabo mangkahiyikneap sembe Allahringe wamna aro kekneba ya'ag taog. 11-13 Me nengabo me mangalamsimunne ik lin sum talamle tanena kon kareplamsululom. Andamne, arukna anenge asag agha mangap taikneap, as yoghag agha kamna kapto tolamsimunneap, me nengabo me ni kon kareplamsululom. Nari anag salag palilamnange nene ya'ag wamlulne sembe el uro wamlulomba, kon karepnange nene kekneba a'unag wamlul. 14 Kon kareptop kom nimi taneko, 'Allahri lebogne irikna phibaek,' aro a'un, Na, Namabo anabiag agha iksibitsululom,” aro ambarog.

15 Ambarogti nen yubu lelamogti, “An ankel Sarai alamangne neneko si samenne lipsimendi si wendogne Sara engkalulam. 16 Elag walinge pimneri Nari el mikip nembaneba me nengabo me mangkatkilul. As nubu tangto a'ero-a'ero wamikne sikinin el wamlul. Eldi mangaroba mangarobari mangkahyikne anabiag nimi nubunang raja yubu lennang babe seklamukang,” seog. 17 Wene seogpa Abraham neneko whing tahip yabu sanukto pulingkina seneraglamogti, “Nimi ya'ag sabal tangto heng kun teng wilindi eptopne supna tarabare undo pinneri me mangaro anep te? Sara neneko babe ya'ag sabal taori heng kun teng wilindi eptopne supnabare tao. Huro me mangkalulne sembe?” aro wana-ag ogsolamog. 18 Wene senero Allahag yubu lelamogti, “Andi leplamne nene, 'Ot Ismael aghabog Abraham lunumna wamla,' aro ulamlulam,” seogpa 19 Allahrina, “Wene sembaheng kom! Ankel Sara nenekori me nengabo me mangkatkeleba si Ishak engkalulam. Nari anag salag lelamnange nene sunsunum uro anme Ishakti mangkahilenge babe Nariog saelbamsineba wamukang. 20 Ismael sembe babe andi molbalamne nene sunsunum uro ulamnun. Nari el mikip nembaneba eldi mangaroba mangarobari mangkahyikne maikno taukang. Ismael elmabo nengabo aobare mangkahileba yubu lennang wamukang. Elag agha nimi likto pilenge Nari as nubu nene-nene pihinun. 21 Aghana, heng kun amikne nonoag andi kel Sara me nengabo me mangatkilul. 'Sara me mangatkilulne Ishak sembe salag anag pipsinge neneko el saeag talul,' aro nen salag palilamna,” seog. 22 Wene aro ni ambarogti Abraham laplobiagha piog.

23 Laplobiagha piogpa sumeneko sum Abraham nenekori Allahri ambarogne sunsunum uro elme Ismaelap eldi aeag agha kaubuni mangkahiekneap kaubuni agha kamna kapto topsiogneap sumeneko sum ni kon karebahiog. 24-27 Abraham ya'ag sabal taogti heng kun teng wilindi eptopne sa'o tarabare (99) wamogpa Ismael heng kun naualbare wamog heng kunag agha sin phende babe kareplamsiekti ae enekoag kaubuni wamekneap ni kon karebahiek.