9
Allahri Nuhag salag pibogha (9:1-17)
1 Wene seogti, Allahri Nuh elmaboap mikip nenero aruklamsiogti, “A'unag agha nimi maikno mangaro pileba, mog so'o ane to'op talul. 2 Samenag magti nimi opsin komag nimiap lebe arobaap sin nikag wamek aghana magti opsiogpa, lebe aroba so'oag uropneap, im toman yabiropneap, maghag uropneap a'un sembe log uro wamukang. 'A'un mikip uro wapmundi, lebe aroba saelbamsululom' aro sin ni a'un saeag palilamna. 3 'So'oag agha pongoroba telamlulom,' aro Nari tatsisi saog uro wene, 'Lebe aroba taneko babe telamlulom,' aro wene ambarelamsin. 4 Ot enengag agha kamag wamnep, ane sembe lebe aroba enengap teheng kom.*Ibraninangdi samen ulamekne pham kerekto pelengkia ngang kareplamekpa eneng ni palamogpa kembiagha yolamek. 5-6 Nari nimi Nandamne yameap sunsunum uro sumbahisi ana a'undi eneng, a'undi hain sembe Nari lumbanun. Lebe arobari opsilea babe Nari lumbanun, nimiri opsika babe Nari a'undi hain lumbanun. Nimi etneri nimi olamsile tanena el neneko nimi yogneri obukang. 7 A'unag agha nimi maikno mangkahimunneri mog so'o to'op talul,” seog.
8 Wene seogti Allahri Nuh elmaboap sin ambarelamsiogti, 9-10 “Wene anap anmaboapti mangkahimunneap, lebe aroba so'oag wamangneap, im toman yabiropneap, a'un ni kabong anekoag agha lambalomne, sikindi mangkahyikne sembe babe niag salag palilamnange ane: 11 'Nia mangkina hain eptopne ni wamlange nen mag agha opsunun kom,' aro salag ane palilamna. Nen mag nubunge longoro walelamleri, mog so'o ane mali nembalul kom. 12-13 Nari a'unap lebe aroba tanekoap a'unag salag palilamnange nene wamle paghabog wamlul. Salag palilamnange nene sembe kekneba Nari yin ene phae mano yame saog uro kokto imag wiriklamna. 14 Sop-sop toa pololong aropne payalamneba mano yame lag talamle tanena, 15 Nari, 'Nia mangkina hain eptoba nen opsunun kom,' aro salag palilamnange neneag seneraglamnun. 16 Nari yin mano yame saog uro lag talamleba Nari kemelamneri, a'unap lebe arobaap sembe salag lelamnange nene kom tanep komdi palilamnange nene sembe el uro wamnun. 17 Nari nia mangkina hain ua uropne niag salag lelamnange nene sik senelamlulomba, kekneba Nari yin phae mano yame ane wiriklamna,” seog.
Nuh elmaboap sembe lebogha (9:18-29)
18 Nuh elmabo kabong anekoag agha lambaekne taneko si Sem, Yafet, Ham lambaek. Ham elmena sina Kanaan. 19 Nuh elmabo wilindi abeneko nimi so'oag nimi ni sikinisang taog. 20 Nuh poneko awe weropne wamogti, haing anggur awe wenne alnibaog. 21 Haing anggur awe welamogti, ik nhon sum Nuh poneko haing anggur lolteroba mag yonge maikno teogti, nenek salehirop nang saog uro ulamog†Nimi mog so'o ngaiag sip anggur wana takto palilamang. Palilamangti, anggur loltero mag ane palilamang. Olog ua ulamangba, mag yonge talamla. Nimiri mag ane nubu ten tanena nenek salbahinep aghana nen wamnepti, wana peket tahinep.. Nenek salehirop nang saog uro ulamogti, ag enekto amogne komopto tobogahiogti, elenge ae kalun aeag aneko malamog. 22 Nuh poneko karebenang malamogpa Ham nenekori kembaogti, “Naro yabo ambatsineba og sobukap,” aro ambarel pihiog. 23 Ambarel pihiogpa, Semap Yafetapti ag nhon toptekti, sa'o tara-tara ag sirikag saelbamdekti, wail toman ko'ol palamdekti, “Nani kerebenang wamla imnunam kom,” aro wail tahip agha ag aneko niknibarek. 24 Niknibarekti wamdekpa, mag yonge teogne neneko wana peket taogpa, pukogti, “Hamdi nanag uanep kom saogne ual,” aro 25 Hamag yubu lelamogti,
“Anme Kanaan‡Nuhri, “Hamag lag wabanun kom,” aro likipto elme Kanaanag yubu lelamogti, “Ankabo aruknange wapmendi seklenne wamlulam,” seog. seklebale!
Elkabo arukna taleri seklenne wamle!
26-27 Name Sem Ili Allah omeknange wamlaba,
nimiri babe Sem Ili Allah omeklamukang.
Allahri Yafet elenge mog so'o yabto ambatleba,
eldi mangaro mangkahilenge tanekori Sem elmaboap nikag wamukang.
Aghana Kanaan neneko elkabo arukna talul,”
seog.
28-29 Mag nubunge neneko longoro walelamogti nimi obsiogha Nuh heng kun-kunne teng no'op tarabare eptopne no'opbare (600) wamogpa, uro yabiog. Uro yabiog aneko nen Nuh heng kun-kunne teng aobare eptopne phendeba tarabare (350) wamog. Heng kun-kunne teng aobare eptopne phendeba tarabare (350) wamogti, Nuh mangkaeka heng kun-kunne 950 wamogpa tebaog.
*9:4 Ibraninangdi samen ulamekne pham kerekto pelengkia ngang kareplamekpa eneng ni palamogpa kembiagha yolamek.
†9:21 Nimi mog so'o ngaiag sip anggur wana takto palilamang. Palilamangti, anggur loltero mag ane palilamang. Olog ua ulamangba, mag yonge talamla. Nimiri mag ane nubu ten tanena nenek salbahinep aghana nen wamnepti, wana peket tahinep.
‡9:25 Nuhri, “Hamag lag wabanun kom,” aro likipto elme Kanaanag yubu lelamogti, “Ankabo aruknange wapmendi seklenne wamlulam,” seog.