28
Tyre Khoboei kah Cungkunah
1 BOEIPA ol te kai taengah ha pawk tih, 2 “Hlang capa aw, Ka Boeipa Yahovah loh a thui he Tyre rhaengsang taengah thui pah.
Na lungbuei sang tih, ‘Kai la pathen,
tuipuei tuilung kah pathen
tolrhum ah ka ngol,’ na ti.
Tedae nang hlang tangkik loh na lungbuei tah
pathen lungbuei la na poek cakhaw na pathen moenih.
3 Daniel lakah Daniel la na cueih ta te.
A kael boeih khaw nang ham a hmuep moenih ko te.
4 Na cueihnah neh na lungcuei lamloh
na thadueng la na saii.
Na thakvoh khuiah sui neh cak na hen.
5 Na hnothungnah dongah
na cueihnah khaw puh tih na thadueng sai van.
Tedae na thadueng dongah na thinko sang.
6 Na thinko te pathen kah lungbuei bangla
na ngai dongah ni ka Boeipa Yahovah loh he he a thui.
7 Te dongah ni hlanghaeng neh
namtom kholong te nang taengla kang khuen he.
A cunghang neh na cueihnah sakthen te
a khoh uh vetih na omyalnah khaw a poeih ni.
8 Vaam khuila nang n'suntlak sak uh vetih
tuipuei tuilung ah rhok dongkah dueknah neh na duek ni.
9 Nang aka ngawn kah mikhmuh ah,
‘Kai la pathen,’ na ti khaw na ti aya?
Nang adam ngawn tah
namah aka poeih kut ah na pathen moenih.
10 Kamah loh ka thui coeng dongah
kholong kut ah ni pumdul kah
dueknah neh na duek eh.
He tah ka Boeipa Yahovah kah olphong ni,” a ti.
Tyre Manghai Ham Rhahlung
11 BOEIPA ol te kai taengla ha pawk bal tih, 12 Hlang capa aw Tyre manghai ham rhahlung phueih pah lamtah amah te thui pah. Ka Boeipa Yahovah loh he ni a thui.
Cueihnah khuengrhueng neh
sakthen boeih kah cungkuemnah
kutha aka daeng khaw nang ni.
13 Pathen kah dum Eden ah tah
lung vang cungkuem te
na thoeicamnah tih lungling vaya,
lungmik, timsuih, oitha, maihae,
minhum khocillung neh tamkuei,
na kamrhing neh na rhotak toembael
sui hnopai neh nang n'suen
khohnin ah ni na khuiah a tawn uh.
14 Nang tah koelhnah aka thingthung cherubim ni.
Te dongah ni Pathen kah cimcaihnah tlang ah
nang kang khueh.
Hmai lungto lakli ah khaw
na om tih na pongpa coeng.
15 Nang kan suen khohnin lamloh
na khuikah dumlai a phoe hil pataeng
na longpuei ah na cuemthuek.
16 Na hnothungnah kah a puhnah lamloh
na kotak te kuthlahnah hah tih na tholh.
Te dongah ni Pathen kah tlang lamloh
nang kam poeih tih hmai lungto lakli lamkah
aka thingthung cherubim
taeng lamloh nang kam milh sak.
17 Na sakthen dongah na lungbuei khaw sang tih
na cueihnah neh na poci.
Na omyalnah dongah ni
diklai la manghai rhoek kah
mikhmuh ah nang kam voeih tih
nang te sawt sak ham nang kang khueh.
18 Na hnothungnah dumlai dongah
namah kah thaesainah tah khawk tih
na rhokso ni na poeih coeng.
Te dongah ni na khui lamloh
hmai ka puek sak tih nang n'hlawp.
Te vaengah nang aka so boeih kah
mikhmuh ah nang te diklai hmaiphu la kang khueh.
19 Pilnam khuikah nang aka ming boeih loh
nang soah hal uh coeng.
Mueirhih la na poeh tanglang tih
kumhal duela na phoe pawh,” a ti.
Sidon a Tonghma Thil
20 Joe 3.4-8; Zek 9.1,2; Mat 11.21,22; Luk 10.13,14BOEIPA ol te kai taengla ha pawk bal tih, 21 “Hlang capa aw Sidon te na maelhmai khueh thil lamtah tonghma thil laeh. 22 Te vaengah ka Boeipa Yahovah loh a thui he thui pah.
Kai loh Sidon nang kam pai thil coeng ne.
Na kotak khuiah ka thangpom uh vetih
BOEIPA kamah tila m'ming uh bitni.
Tholhphu te anih soah ka saii vetih
a khuiah ka ciim uh bitni.
23 A khuikah duektahaw neh a kawtpoeng ah thii ka tueih
vaengah a kaepvai kah cunghang neh
a kholung ah a rhok la cungku ni.
Te vaengah BOEIPA kamah te m'ming uh bitni.
24 Te vaengah Israel imkhui ham tangti kah a huet neh hling kah a do khaw om voel mahpawh. A kaepvai boeih lamkah amih aka hnaep long khaw kai he ka Boeipa Yahovah ni tila a ming uh bitni.
Bidip La Israel Coinah
25 Ka Boeipa Yahovah loh he ni a thui. Israel imkhui te pilnam lamloh ka coi. Amih taengla taekyak uh cakhaw namtom mikhmuh kah amih taengah ka ciim coeng. Te dongah a khohmuen ah kho a sak uh ni. Te te ka sal Jakob taengah ka paek coeng. 26 A khuiah ngaikhuek la hing uh vetih im a sak uh ni. Misur a phung uh vetih ngaikhuek la hing uh ni. A kaepvai lamkah amih aka hnaep boeih soah tholhphu ka suk vaengah kai he BOEIPA a Pathen la a ming uh bitni.