57
Tungaepnah neh Uemonah
[Aka mawt ham Saul taeng lamloh lungko khuila a yong vaengkah David kah, “Phae Boeh” Laa]
1 Pathen aw kai n'rhen dae, kai n'rhen dae.
Ka hinglu loh nang dongah ying tih
talnah he a poeng hil,
na phae hlip ah ka ying ni.
2 Kai ham hma aka khap
Pathen te Sangkoek Khohni,
Pathen la ka khue.
3 Vaan lamkah han tueih tih kai n'khang,
kai aka hloem khaw a veet.
(Selah)
Pathen loh a sitlohnah neh a oltak te a tueih.
4 Ka hinglu he hlang capa boeih aka hlawp,
sathuengnu rhoek lakli ah ka yalh.
A no khaw caai neh thaltang la om tih
a lai te cunghang bangla haat.
5 Pathen he vaan rhoek soah pomsang pai saeh.
Namah kah thangpomnah loh diklai pum khuk thil saeh.
6 Ka khokan ah lawk a tung uh tih ka hinglu loh duengyai sut.
Kai hmai kah a vueh uh rhom khui ah cungku uh.
(Selah)
7 Ka lungbuei cikngae ngawn Pathen aw.
Ka lungbuei cikngae neh ka hlai vetih ka tingtoeng ni.
8 Ka thangpomnah aw haenghang laeh.
Thangpa neh rhotoeng haenghang laeh.
Mincang ah haenghang pawn ni.
9 Ka Boeipa nang te pilnam rhoek taengah kan uem vetih,
namtu rhoek taengah kan tingtoeng ni.
10 Na sitlohnah loh vaan duela,
na uepomnah loh khomong khaw a puet.
11 Pathen he vaan rhoek boeih soah pomsang pai saeh.
Namah kah thangpomnah loh diklai pum khuk thil saeh.