HOSEA
(The Book of Hosea)
Hosea Cabu Kawng
Hosea he Isiah neh thuivai uh tih kho hmaih a sak. Israel tlangpuei ram Assyria loh a loh tom vaengkah b.c 721 ah kho a sak. Israel kah tholhnah long he dantatnah neh patangnah a pai sak. Pathen loh Israel ca rhoek a lungnah te va loh yuu a lungnah kawng neh a thuinuet. Lamhma ah Hosea loh pumyoi nu Gomer a yuunah kawng a tueng sak. He tlukla nueihbu kamrhing a phueih he Israel ca rhoek Pathen taeng lamkah a hnukpoh dongah yah a poh pawn ni a ti. Israel a hnukpoh dongah dantatnah a yook tueng pai a ti. Te dae ngaiuepnah loh koep a vai. Pathen loh hnawt mai cakhaw amih ham khodawkngainah koep a paek. A ram manghai, khosoih, tonghma rhoek kah a tholh te khaw a thui. Pathen kah dantatnah pai tom coeng dongah a rhalrhing sak. Pathen taengla mael uh laeh a ti nah.
Oltlueng
I. Hosea kah Imkhuikho 1—3
A. Hosea khuenah 1.2—2.3
B. Yuu thuingaihnah2.4
C. Thohnah 3.1)
II. Uepom Pathen neh Hnukpoh Israel
A. Israel hnukpoh 4.1—8.14
B. Olcaeknah 9.1—13.16
III. Ram Pilnam Thohnah 14)
A. Mael hamla Khuenah 14.1
B. Thoh ham olkhueh 14.5
C. Uepom hamla khuenah 14.9
1
1 2Mg 15.1-7; 2Kh 26.1-23; 2Mg 15.32-38; 2Kh 27.1-8; 2Mg 16.1-20; 2Kh 28.1-27; 2Mg 18.1—20.21; 2Kh 29.1—32.33; 2Mg 14.23-29BOEIPA ol tah Judah manghai rhoek Uzziah, Jotham, Ahaz, Hezekiah tue neh Israel manghai Joash capa Jeroboam tue vaengah Beeri capa Hosea taengla pawk.
Hosea kah Yulohnah
2 BOEIPA tah Hosea dong lamloh lamhma la cal. Te vaengah BOEIPA loh Hosea te, “Cet lamtah pumyoi nu neh pumyoihnah kah camoe rhoek te namah taengla lo laeh. Khohmuen he BOEIPA hnuk lamloh cukhalh rhoe cukhalh,” a ti nah.
3 Te dongah cet tih Diblaim canu Gomer te a loh. Te vaengah vawn tih anih hamla capa pakhat a sak pah. 4 2Mg 10.11Te vaengah BOEIPA loh anih te, “A ming te Jezreel sui. Jehu im kah Jezreel thii te ka cawh vetih Israel imkhui kah ram te ka paa sak pawn ni. 5 Te khohnin te a pha vaengah tah Israel kah lii te Jezreel kol ah ka khaem pah ni,” a ti. 6 Te phoeiah koep vawn tih canu a sak hatah, “Israel imkhui te koep ka haidam voel pawt vetih amih te ka khuen rhoe ka khuen ham coeng dongah a ming te Loruhamah sui. 7 Tedae Judah imkhui tah ka haidam vetih amih te amamih kah Pathen BOEIPA rhangneh ka khang ni. Te vaengah amih te lii neh, tumca neh, caemtloek neh, marhang neh, marhang caem neh ka khang mahpawh,” a ti nah.
8 Loruhamah te suk a kan phoeiah vawn tih capa a sak. 9 Te vaengah, “Nangmih te ka pilnam voel pawt tih kai khaw nangmih hut la ka om voel pawt dongah a ming te Loami sui,” a ti nah.
10 Rom 9.26Tedae Israel ca hlangmi tah tuitunli kah laivin bangla om ni. Te te loeng lek pawt tih tae lek pawh. Amih te, ‘Nangmih te ka pilnam moenih,’ a ti nah hmuen ah a om sak vetih amih te aka hing Pathen ca rhoek a ti ni. 11 Te vaengah Judah ca rhoek neh Israel ca tun tingtun uh ni. Amamih ham boeilu pakhat a khueh uh tih Jezreel khohnin puei ham khohmuen lamloh cet uh ni,” a ti nah.