8
Yesu kà Məŋ Madzahaga gami
1 Gay uwana aɗuwà à vok kà aganay: Mədadzəka mapəhay: Məŋ Madzahaga gami uwana adadza madzay la kəslah asik la afik la ahàl kaf aŋa Zəzagəla lakəl la zagəla, uwana akor tatak gesina, 2 masla kà Məŋ Madzahaga la slaka tsikaslaga, uwana la Zəzagəla la abà. Azlamadzahaga taɗahàhà sləray aŋatà la gày lukut uwana la aku, ahàl aŋa azladza aɗahàŋ. Ama slaka uwana Yesu aɗàh sləray aŋha kà la zagəla, slaka dziriga uwana Zəzagəla aɗahàŋ.
3 Azlaməŋ madzahaga gesina kà taɓə̀k atà à ahəŋ, kà atà aŋa mavàh tatak à Zəzagəla, ŋgaha bay kà atà makaɗal tatak. Gay gà la uwaga, Məŋ Madzahaga gami akor tatak kà mavày suwaŋ. 4 Mədzugw, mok uwana agà la ahəŋ la gudəŋ la vok kà, apakà Məŋ Madzahaga aw. Kà uwana azlamadzahaga aŋa azlaməna mav tatak à Zəzagəla la ahəŋ, uwana takàɗal tatak bokuba uwana mapəhay aŋa Zəzagəla agòɗ à azla Yahudiya. 5 Azlaməna mav tatak à Zəzagəla uwaga kà taɗahàhà sləray aŋatà kà la məŋ gày madəv kuɗa à Zəzagəla la aku. Ama gày uwaga kà maftsa vok aŋa gày dziriga uwana la zagəla la afik. Mok uwana Musa ahàd kà maɗàh gày lukut uwatà kà Zəzagəla agòɗal:
ˈ‘Nərə̀z lela, ŋgaha hàd, kadaŋal bokuba uwana gəpə̀hkala la gudəŋ uwanay la afik.’ˈ✡ 8.5 2Musa 25.40
6 Kətà haɗay, mənəŋàŋ kà sləray aŋa Yesu Kristu aɗuwaŋ sləray aŋa azlamadzahaga anik gesina la kaykay, makəs vok slawda uwana akəs anu vok slawda la Zəzagəla, ŋgaha la azladza kà, aɗuwaŋ makəs vok slawda aŋa uwarà, uwatà bay, kà uwana tatak uwana Zəzagəla apəhàŋ la makəs vok slawda uwanay la abà kà, aɗuwaŋ azlatatak uwana məɓə̀zal uwarà.
7 Agayŋa makəs vok slawda teraŋaga agay delga kà, naka Zəzagəla aɗàh makəs vok slawda anik aya aw. 8 Ama mənəŋaŋ kà aslà aw, kà uwaga Zəzagəla apə̀hla tsakana aŋatà à azladza, ŋgaha agòɗ à atà:
ˈ‘Fàw sləm à abà. Zamana anik adàsa à waŋ à uwana gəɗàh makəs vok slawda mawga la Isərayel, ŋgaha à azladza tsəhay Yahuda.
9 Dagay mok uwana gəkə̀s ahàl aŋa azlababa aŋatà madzidziga kà masəlla atà à uda la gudəŋ Misəra la abà kà, gəkəs vok slawda la atà.
Ama makəs vok slawda mawga uwana gədàɗehəŋ lagwa, adàgay kà bokuba makəs vok slawda uwatà aya aw.
Tawìsà makəs vok slawda maviyaga ala, à uwana gəɗahàŋ.
Gay gà la uwaga à uwana, gəguwatàla à lig à gay. Gi Sufəl Zəzagəla aŋkul la uwana gəpəhay kiya uwanay.
10 Makəs vok slawda uwana gədàɗehəŋ la azladza Isərayel la zamana uwatà kà aganay:
Gədàfa à atà mapəhay gulo à ahàl,
Gədàtsetserah mapəhay gulo à ləv aŋatà à tsəh babay.
Gədàgay Zəzagəla aŋatà,
Ŋgaha tadàgay azladza gulo suwaŋ.
11 Dza la ahəŋ adàda à slaka azladeda aŋha kà matapatàla gay gulo matapay aya aw, Kà magoɗ à atà kà:
Sə̀làw Sufəl Zəzagəla aya aw,
Kà uwana dza gesina tadàsəl gi azlabəziga baməraka azlamagolga bay.
12 Vok adàhama à gi kà tsakana aŋatà, gədàmatsatàŋ ala adàgay.
Gədàfa à atà à ləv à abà aya aw.’ˈ✡ 8.12 Yeremiya 31.31-34
Kiya uwaga Sufəl Zəzagəla agòɗ.
13 Uwana Zəzagəla apə̀h kiya uwanay kà lakəl aŋa makəs vok slawda mawga, uwaga asal magoɗay kà, uwana aɗahàŋ teraŋa kà, apakà maviya tatak. Məsəl haɗay kà, tatak uwana adapaka maviya tatak kà, uwaga kà azlaka dza aya aw, iyaw aŋha adadəv à gay adagay.