A.D.: Nasihau tohusur nǝpasusan siYesu Kristo.

ais: [nǝais] Nǝwai todaŋ nǝboŋ tosusus buni vakot.

ak: [nǝak] Nab̃iltib̃ot aNoah toum hǝni hǝn nǝbathudud san mai natit tiltile gail lotomaur asike lǝb̃imat len nab̃iltius mai nilev tokabut gol navile a pan.

akat: [nǝakat] Nǝvat sua nǝtau han topǝhapǝhw o tomasiav be golǝboi gǝb̃ekǝta vi lohoim kǝkereh.

alos: [nǝalos] Nǝhai sua, nalut gail lotomǝtortor. Nalut nǝalos lutov pǝpadaŋ hǝn nǝtan ŋai. Nasuhut nalut nǝalos evi hai pǝhas naJu gail lǝb̃evǝhas niben nǝvanuan tomat hǝni hǝn asike b̃ib̃o tutut be hǝn b̃ipat b̃ebǝlav. Nalut nǝalos ehum naluvera.

alfa: [alfa] Len nǝalfapet silat a Kris, alfa evi naleta nametǝkav.

ametist: [nǝametist] Nǝvat nǝtau han toboŋboŋ ale imasil.

Appa: [aAppa] Nasoruan sua len nasoruan ta Aram, namilen ke Tata.

Areopakus: [nǝAreopakus] Naṽehuh sua tokad nahǝsan nagot hǝn nǝb̃alan silat a Atens, mai lokis nǝmatsistret gail lotobǝtah lan nǝAreopakus am.

baptais: [ibaptais] AJon eduŋ nǝvanuan gail len nǝwai ale ipat kuv galito. Igole hǝn lǝb̃eṽusan nǝpairan dan nǝsaan salito, mai nautautan hǝn nǝmauran toveveu.

bathuyah: [nǝbathuyah] Nǝboŋ datb̃isor husur nǝbathudud sidato datolǝboi datb̃isor husur alat lototoh sutuai tia, atǝmadit gail, atabǝdit gail, alat lotopas galit mai alat lotopas galit am sutuai sutuai. Datokis galit p̃isi nǝbathuyah sidato. Alat lotohusur gidato, anatudit gail, amǝhaibǝgw gail, anatulit gail van van datokis galit hǝn nǝpasusan sidato.

B.C.: Nasihau gail lotopat a m̃o hǝn nǝpasusan siYesu Kristo. Ale datuke A.D. hǝn nasihau lotohusur nǝpasusan san.

bea: [nabea] Narivatǝvat katkat totibau, tobǝlav sǝhor nǝvanuan. Niben kavkav ikad navurun, ale iyar len narien ivat hum narivatǝvat be elǝboi b̃iyar hum nǝvanuan len narien eru.

boŋ hǝn Nabǝbaŋan: [Nǝboŋ hǝn Nabǝbaŋan] Nǝboŋ sua seJu gail totibau. Len nǝboŋ enan lǝsǝhan, lobǝbaŋ mai aGot. Ab̃iltihai tutumav etutumav hǝn b̃ebǝbaŋ sil nǝsaban mai nǝsaan seJu gail. Nǝboŋ enan ipat len nahǝbati Septeba o Oktoba ŋa len nahǝbati eru enan nǝtas isa masuṽ hǝn nawolan.

bras: [nǝbras] Nametǝlai sua nǝtau han toyaŋyaŋ. Len nǝbras ikad nakopa mai nametǝlai sual am lokisi hǝn nasiŋk artob̃on. Nasiŋk evi nametǝlai tokabut gol nǝkapa.

brons: [nabrons] Nametǝlai sua todaŋ, nǝtau han tomial kǝkereh hun nakopa. Len nǝbrons ikad nakopa mai natin artob̃on.

bubur: [abubur, nabubur] Nasoruan siGot b̃ike nabubur o abubur, evi nǝvanuan ideh gotolǝboii, gotolǝmasi, gotoriŋ nǝlom̃ lan, savi natǝbarehreh o naulum̃an gotolǝŋoni o gotoke gilah maii. (Geris Jon 15.13–15.)

b̃iltihai tutumav: [ab̃iltihai tutumav] Avan sua toil a m̃o hǝn ahai tutumav gail. Vǝha-sua len nasihau ṽisusua eb̃is len naim siGot len Naut Tolo hǝn Naloan gail, nahudhuim lohoim buni len naim siGot. Eb̃is hǝn b̃igol nǝda hǝn narivatvat totutumav hǝn gail b̃eturtur, hǝn nǝvanuan gail lǝb̃iveveu dan nǝsaan salito. Nǝboŋ nasoruan siGot toke ab̃iltihai tutumav gail, lovi alat lotovi ab̃iltihai tutumav a m̃o mai ahai tutumav gail lotoil a m̃o. Len nasoruan b̃onb̃on datuke hae pris mo jif pris.

b̃iltiluṽoh hǝn nasoltia: [Nab̃iltiluṽoh hǝn nasoltia] Nab̃iltiluṽoh hǝn nasoltia ikad nasoltia lotovi 600 lan.

b̃iltiwai Kalili: [Nab̃iltiwai Kalili] Len naut a Kalili ikad nab̃iltiwai nabǝlavan han tovi 21 km mai nap̃osǝp̃osan han tovi 8 km. Ikad nǝhes eru am. Lokisi hǝn nab̃iltiwai Tiperias (Jon 6.1) mai nab̃iltiwai Kennesaret (Luk 5.1) am.

b̃uvimal: [nab̃uvimal] Ehum navib̃u tokad nab̃ur gail lan. Nǝvanuan toram̃ram̃e hǝni eṽuv lan ale eriŋ nǝŋarhuvǝlan gail len nab̃ur han gail hǝn b̃egǝgel hǝn nǝwalan han.

det: [nadet] Nadet ehum namǝtu, ebǝlav, ikad nǝpashǝte mai ikad naṽite lotohanhani. Len naut a Israel lob̃ilb̃il hǝn nǝpashǝt nadet hǝn leb̃eṽusani ke losǝhor aenemi salito gail len nǝb̃alan. Lob̃ilb̃il hǝni am len nahǝhaṽuran.

didimair: [edidimair] Nǝvanuan todidimaur egǝgel hǝn nǝnauan san akis, sǝnau lǝboi nap̃isal tonor hǝn b̃ehusuri.

elefant: [naelefant] Nab̃iltirivatǝvat niben totibau. Nǝdariŋan arup̃osǝp̃os, nahunusun ebǝlav masuṽ hum nǝm̃at, ale ikad nariṽon eru artobǝlav habat.

emeralt: [naemeralt] Nǝvat sua nǝtau han tokǝskǝsan, ale imasil.

Epikurian: Galit lodǝlom ke nahǝhaṽuran evi nǝbathut nǝmauran, ale b̃ikad nagot ideh, nǝvanuan lovi naut kǝmas hǝn galito.

Farisi: [naFarisi] Avan ideh len nǝpati hǝn napolotik sua, tohushusur gat nakelean todaŋ p̃isi, ale topatpat gai mǝhat hǝni. Edǝlom ke ikad na-le-mǝhat-an dan nǝmatan, mai aGot eil a m̃o mai iwol hǝn natit p̃isi.

fik: [nafik] Ikad nǝhai sua len naut a Israel. Lǝb̃imabule len naut tovoi hǝni, elǝboi b̃etibau, ale nalute ip̃osǝp̃os. Nǝboŋ toṽan, naṽit nǝhai nafik ihehe, ale nǝvanuan lolǝmas lǝb̃ihani. Lokis nǝhai enan hǝn nafik o nǝhai nafik, ale lokis naṽit nǝhai enan hǝn nafik.

flaks: [nǝflaks] Natuhhai sua tokad natret gail len natub̃ulon. Luvai natret gail hǝn lǝb̃ikad nǝkaliko tovoi.

fraŋkinsens: [nafraŋkinsens] Nǝda hǝn nǝhai sua. Nǝboŋ nǝda tomasmas, egǝm vi hai pǝhas. NaJu gail lovǝhas niben nǝvanuan tomat hǝni. NaJu gail lurer hǝn nǝvanuan hǝni, ale len nalotuan salito lopǝŋasi len natutumavan husur nǝb̃on tosusau.

foks: [nafoks] Ehum natuhlipah nagilen totibau. Akis ike tikat bun nǝman gail be sǝhanhani, mai ikad nǝkadun mai naṽide hum nahit tosusuah gai. Itohtoh len nab̃ur len tan.

Friman: Naut p̃isi len naut a Rom lukad alat lotovi slev a m̃o be lǝsavi slev am, lukad nǝmakuvan tia.

gavna: [nǝgavna] Nǝvanuan toil a m̃o hǝn naprovens ta Rom lokisi hǝn agavna. Imaienan, nǝboŋ lotopas aYesu, Kwirinius evi gavna len naprovens Siria, nǝboŋ aYesu tomat, aPontius Pilate evi gavna len naprovens Jutea.

gol: [nagol] Nametǝlai sua tomǝdmǝdau, nǝtau han toyaŋyaŋ buni. Nagol sǝtaŋ. Nǝvat hǝn gǝb̃eṽur nagol etibau gol ke evi nametǝlai sekiŋ gail.

gomah: [igomah] Napǝhaṽut b̃ikab buni, nahurabat san gail b̃ivoi habat, b̃epǝhas buni, datuke igomah. Lǝb̃itai nǝwag hǝn nǝwag b̃ivoi buni datuke nǝwag igomah. Avan ideh b̃isor hǝn nasoran san b̃egǝlgǝlan, b̃ebutǝlas hǝn datb̃edǝlomi, datuke nasoruan san igomah buni.

hai kelkel ur: [ahai kelkel ur] Nǝvanuan tokel ur nasoruan aGot tokel maii. Len nasoruan b̃onb̃on datuke profet.

hai pispisul: [ahai pispisul] Nǝvanuan aYesu tolekis hǝni, totabtabuh lan hǝn b̃ikel ur napisulan san, na-kel-uri-an tovoi, mai nǝvanuan gail hǝn natohan pipihabǝlan aGot b̃etibau am tabtab. Len nasoruan b̃onb̃on datuke aposol.

hai p̃usan: [ahai p̃usan] Nǝvanuan top̃usp̃usan. Galevis loṽusan nǝvanuan gail hǝn nalo siMoses, be aYesu eṽusan nǝvanuan gail hǝn natohan pipihabǝlan aGot mai naṽide tovoi aGot tolǝŋoni. Lokis aYesu hǝn Hai p̃usan. Len nasoruan b̃onb̃on datuke tija.

hai susur: [ahai susur] Avan ideh tohusur tabtab hǝn avan ideh, tosǝsǝloŋ hǝn nap̃usanan san mai tosǝsǝloŋ husuri, togol nǝsa gai tokele. Len nasoruan b̃onb̃on datuke disaepol.

hai tutumav: [ahai tutumav] Avan ideh toum len naut siGot a Jerusalem. Etutumav hǝn naviolan nǝvanuan lotoviol hǝn gail mai aGot, ale etutumav hǝn narivatvat gail m̃os nǝvanuan gail hǝn b̃ep̃ur kuv nǝsaan salito. Len nasoruan b̃onb̃on datuke pris.

hai wolwol: [ahai wolwol] Nǝvanuan towol hǝn nǝwag wol. Len nasoruan b̃onb̃on datuke kapten.

hai tivtivtan: [nǝhai tivtivtan] Nǝvanuan toke timabul nawit marireu ibaŋis nǝhai tivtivtan len nab̃uluk. Ale atenan iwol, nab̃uluk eliv nǝhai tivtivtan van, ale etivtiv tan van, nǝtan esǝŋav, utaut hǝn aten b̃imabul nawit lan. Datolǝboi datb̃ikele am ke nǝhai tivtivtan ekir p̃up̃ul nǝtan.

hani: [nǝhani] Natit tohehe masuṽ topat len naim sesukapak.

Hermes: [aHermes] Nagot tovi ahai pispisul sinagot gail silat a Kris.

Herot: [aHerot] Len Na-kel-gati-an Veveu ikad aHerot itor:

hisop: [nahisop] Natuhhai sua nǝb̃on tosusuau. Nǝpashǝt nahisop, evi natsua naJu gail lotokade len nalotuan salit gail (Exo 12.22; Lev 14.4, 6, 49-52; Num 19.2-6).

hotel: [nahotel] Naim sua gotoŋavŋav lan, gotohanhan lan, gotopatpat lan len nǝyaran sam̃. Goṽur natohan len nahotel husur nǝmariboŋ ṽisusua.

hulahul: [ehulahul] Nǝboŋ nalipah tosǝsǝloŋ hǝn nabuai tois lilihai o lathutai lotohut nǝman, ile mǝhat, eil, ipair hǝn nǝhon van hǝn nǝwalan, namǝtan arosǝŋav, nǝdariŋan aroil vi mǝhat. Ehulahul. Len nasoruan ta Iglan luke alert.

hurhuwain: [nahurhuwain] Alat a Jutea lǝsǝkad nab̃otel ideh gol ke lob̃ir nǝwain veveu b̃urhulon nahurhunani o nahurhusipsip hum tovi b̃otel.

ikel: [naikel] Nǝman namǝsav totibau tohum nǝbal be totibau sǝhori.

il-b̃uri-an: [na-il-b̃uri-an] Nǝvanuan b̃isor len na-il-b̃uri-an, gai eil b̃ur namǝmauan mai namǝtahwan, ale isor.

im nab̃onb̃onan: [naim nab̃onb̃onan] Len navile p̃isi naJu gail lukad naim lotob̃onb̃on lan hǝn lǝb̃eṽuruŋ nasoruan siGot mai lǝb̃ep̃usan hǝni. Lulotu len naim enan, be savi naim siGot, husur ikad naim sua ŋai siGot topat len nab̃iltivile Jerusalem.

im siGot: [naim siGot] Ipat len nab̃iltivile Jerusalem. Ikad naholǝvat todar visi mai nǝvanuan gail lotoum ei. Galevis lotutumav hǝn naviolan nǝvanuan lotoviol hǝn gail mai aGot, galevis lokǝtkǝta kǝkol hǝn naholǝvat hum nalipah gail. Len nasoruan siGot evi naim esan tokad Naut Tolo Masuṽ lohoim. Ab̃iltihai tutumav elǝboi b̃eb̃is len Naut Tolo Masuṽ enan vǝha-sua ŋai len nasihau tosua.

intǝres: [naintǝres] Gǝb̃eriŋ nǝvat sam̃ len nalulutar, dereh tepisan nǝvat ideh am. Ale naintǝres evi nǝvat, nǝvat sam̃ topasi nǝboŋ topat tobǝlav len nalulutar.

ist: [naist] Govi ist nǝboŋ gotovi lan naut namityal tovisi lan.

itian tosa: [naitian tosa] AGot idam̃ hǝn nǝvanuan b̃igol naitian mai asoan tolah kitin maii ŋai. Naitian ideh am evi itian tosa ale aGot emǝtahun buni. Ris Lev 18.6–23.

jasint: [nǝjasint] Nǝvat nǝtau han tobisibis ale elǝboi b̃imasil.

jaspa: [nǝjaspa] Nǝvat sua nǝtau han tomial o tokǝsan o toyaŋyaŋ.

kako: [nǝkako] Nǝboŋ dattousan natit gail len nǝwag wol o nǝlanis datokisi hǝn nǝkako. Ale nǝboŋ nǝwag wol tobar naut tovi lan edǝdaŋ ei gol ke nǝkako ipat a ut. Imaienan, nǝkako evi natit nǝwag wol o nǝlanis topat gail van.

kamel: [nǝkamel] Narivatǝvat sua nǝmadun tosahsah. Ihanhan naliol hum nab̃uluk be elǝboi b̃iyar b̃ebǝlav, namunan eb̃uer. Husur enan loriŋ natit gail len nǝmadun hǝn b̃evusi len naut masmas gail.

karnelian: [nǝkarnelian] Nǝvat nǝtau han tobisibis, be sǝmasil savoi.

kat: [nǝkat] Natsua dattousan natideh tomǝlas lan tokad nawil tarhǝte mai tarhǝte. Ikad nǝkat nahos o nab̃uluk o nǝvanuan tolivi van, ale ikad nǝkat tile nǝvanuan tosul hǝni hum dattosul hǝn nawilbaro.

kelean todaŋ: [nakelean todaŋ] Natideh aGot o nab̃iltivanuan tokel idaŋ hǝn nǝvanuan lǝb̃ehusuri. Nakelean lotodaŋ mai nǝ-kai-tasi-an gail aGot tokel mai aMoses hǝn alat aIsrael lǝb̃ehusur gail hǝn lǝb̃ikad natit aGot tokel gat gail, naJu gail lokis natgalen p̃isi hǝn nalo.

kel-gati-an: [na-kel-gati-an] Nǝboŋ avan ideh tokele ke dereh tigol natesua o tigol natesua balai, nǝsa todam̃ hǝn b̃igole timasmaienan. Nǝsa tokele evi na-kel-gati-an. Len nasoruan b̃onb̃on datuke promes.

kemkeman: [nakemkeman] Len nasoruan ta Uluveu datuke hǝhaṽur, len nasoruan ta Avoh luke kemkem. Ale len nasoruan siGot ike nahǝhaṽuran hǝn nasoruan welkam mai glad ale ike nakemkeman hǝn nasoruan joy.

kes: [nakes] Nǝhai bǝtbǝtah tokad narien toru ŋai toil len nǝtan. Nǝboŋ avan ideh tobǝtah len nǝhai bǝtbǝtah a mǝhat, elǝboi b̃eriŋ narien gǝlar lan.

kǝlas: [nakǝlas] Natit tomasil dattolǝboi datb̃ekǝta tur lan. Idaŋ ale b̃iteh dereh timap̃ulp̃ul. Nakǝlas b̃ikad nasilva tarhǝte datokisi hǝn nakǝlas sal be datsalǝboi datb̃ekǝta tur lan, nǝboŋ dattokǝta vi lan, datoleleduŋ ale datoris nǝhodato.

koin: [nakoin] Nǝvat lotogole hǝn nametǝlai nagol, nasilva o nakopa. Loṽur natit gail hǝn nǝvat galenan, ale evi nap̃urp̃uran hǝn nauman.

komada: [Nakomada] Avan ideh toil a m̃o hǝn nasoltia gail.

kopa: [nakopa] Nametǝlai sua tomǝdmǝdau, nǝtau han tomial. Nǝboŋ nakopa totaŋ, egǝm kǝskǝsan. Len naut a Vanuatu a m̃o datukad nakoin lotovi kopa. Nakoin hǝn nǝwan vatu mai nakoin hǝn natu vatu arovi kopa.

krep: [nakrep] Ikad nǝhau sua toṽan len nab̃iltihavhǝte. Naṽit nǝhau enan ihehe masuṽ, ale lupal dasdas naṽit nǝhau hǝn nasuhute b̃isel. Nasuhute topat tobǝlav kǝkereh egǝm vi wain. Naṽite mai nǝhau, lokis gǝlar p̃isi hǝn nakrep.

krisolait: [nakrisolait] Nǝvat nǝtau han toyaŋyaŋ ale tomasil.

krisopres: [nakrisopres] Nǝvat nǝtau han tokǝskǝsan ale tomasil.

kristal: [nakristal] Nǝvat tomasil hum nakǝlas, sǝkad nǝtau ideh.

Kristo: [aKristo] Nǝvanuan alat a Israel lotovatvat viri, nǝvanuan aGot totabtabuh lan hǝn b̃ilav kuv alat a Israel dan naenemi salit gail. Be aGot itabtabuh lan hǝn b̃evi kiŋ silat lotoriŋ nǝlolit lan, savi kiŋ hǝn naut sua hum aTevit tovi kiŋ hǝn naut a Israel ta sutuai.

kul: [ekul] Nǝboŋ avan ideh sǝdaŋ husur tomǝsah, niben tomǝhav o salǝboi b̃igol natsua, datuke ekul.

kulan: [nakulan] Datb̃isor husur nakulan sivan ideh, namilen ke gai sǝkad nǝdaŋan.

kumin: [nakumin] Nǝb̃on namisurhut nakumin esusau, ale loriŋ namisurhut gail len nǝhanian.

kupit: [nakupit] Evi nabǝlavan hǝn navǝlan nǝvanuan, tub̃at len nakobkob van vǝbar nagilen nǝŋarhuvǝlan. Nabǝlavan hǝn nakupit pǝpadaŋ hǝn nahudhumita.

kuṽol: [ekuṽol] Nǝboŋ tokad natit tosob̃ur ale gulekis hǝn natit tovoi sǝhor gail am, gokuṽol. Gǝb̃ekuṽol hǝn naieh len nab̃ilikoro, namilen ke gulekis hǝn naieh tovoi sǝhor ideh gail am lotopat len nab̃ilikoro.

lat lotokǝtkǝta kǝkol hǝn naim siGot: [alat lotokǝtkǝta kǝkol hǝn naim siGot] Naim siGot ikad naholǝvat todar visi. Ahai tutumav gail mai nǝvanuan len nahǝmar a Levi loum len naut enan, be len nahǝmar a Levi, galit galevis loum hum nalipah seb̃iltihai tutumav. Lokǝtkǝta tǝban naut enan mai lokǝtkǝta kǝkol hǝn naim siGot hǝn avan ideh asike b̃emǝdasi.

lepat: [nalepat] Nab̃iltip̃us katkat nǝtau han tomial hum naliol tomasmas. Nalepat egǝgǝris.

leprosi: [naleprosi] Evi namǝsahan hǝn nahurhuben nǝvanuan togǝgel hǝn nǝtau han hǝn b̃egǝm pǝhapǝhw. Len nalo siMoses nǝvanuan tokad namǝsahan tomagenan timasriŋ gab̃ulan nǝvanuan gail am hǝn b̃itoh a tut dan galito. Gai eb̃iŋb̃iŋal len nabunusian sinalo. Nǝboŋ namǝsahan tonoŋ, ivan hǝn ahai tutumav hǝn b̃ebunus vahvahur niben. Asike b̃isab̃ namǝsahan ideh am, ikel uri ke avan enan iveveu, elǝboi b̃etǝlmam vahim.

Levet: Len nasoruan ta m̃o datokis napǝhaṽut toyalyal hǝn Levet hum dattokis naulum̃an toyalyal hǝn Nasub̃.

linen: [nalinen] Nǝkaliko pǝhapǝhw tokat udud lotovaii hǝn natret gail topat len nalut nǝflaks. Nǝvanuan gail lolǝmasi husur sagol naut topud hǝn avan ideh tosun nahurabat lotosode hǝn nǝkaliko enan. NaJu gail loruŋ gol niben alat lotomat lan.

lion: [nalion] Nab̃iltip̃us katkat nǝtau han tomial hum naliol tomasmas. Nalion ulum̃an ikad navurun lǝblǝbah todar vis nǝhon.

lipah: [alipah] Avan ideh tohut nǝvanuan tosa gail lotob̃ur kotov nalo hǝn naut. Itah gat galito, eriŋ galit len naim bǝbaŋis o len nakotan. Len nasoruan b̃onb̃on datuke polis.

lo: [nalo] Len naut galevis len nasoruan siGot, nalo evi nalob̃ulat erim aMoses totos gail len natub̃atan hǝn nasoruan siGot. Ale len naut galevis naJu gail luke nalo, be namilen ke nasoruan siGot kavkav. Ale len naut galevis am nalo evi nǝsa aGot tokai tasi mai nakelean limasgol husuri.

lokust: [nalokust] Ehun natohtohlomǝtu, ihanhan natideh tokǝsan ale egǝm len nab̃iltivǝshǝte tohum nǝmarigw. AGot idam̃ hǝn alat a Israel lǝb̃ihan nalokust.

madihdih: [imadihdih] Natideh dattoke tomadihdih ipat magenan akis, gole ke datb̃ike nab̃urhuwai imadihdih, namilen ke naut kǝmas dattovǝvaut kuv nǝwai tosob̃ur, nǝwai ipat p̃itp̃itoṽ ŋai. Nǝdaŋan siYesu imaienan, naut kǝmas galevis ivan dani, nǝdaŋan san ipat p̃itp̃itoṽ ŋai.

mail: [nǝmail] Nǝmail silat a Rom evi namita tovi 1500.

malperi: [nǝhai malperi] Nab̃iltihai tokad nǝharhǝte topat nasihau tosob̃ur, toharhar tǝlmam. Iṽan hǝn naṽit len natuhhavhǝte. Nǝboŋ naṽit nǝmalperi tomen iboŋboŋ buni o imotmot ale ihehe masuṽ.

maŋmaŋ: [imaŋmaŋ] Nǝboŋ avan ideh toris natesua totile masuṽ, ip̃aŋ habat lan, nabuŋon esǝŋav, namǝtan gǝlaru arosǝŋav.

mapol: [nǝmapol] Nǝvat tokab masuṽ husur tokad nǝtau tiltile gail. Loum hǝn naim gail mai nǝlablab gail hǝni.

mariboŋ: [nǝmariboŋ] Len nasoruan siGot nǝmariboŋ evi nǝboŋ sua kavkav, nalennǝyal sua kavkav mai nalenmariug sua kavkav.

matuan: [nǝmatuan] Nǝboŋ dattomabul nǝhanian, itov, ale iṽan. Hum ma toṽan hǝn naṽite, hum ma toṽan hǝn nǝhanian tin pipitan. Ale nǝboŋ nǝhanian tomatu datutarive o datokir susuri. Alat aIsrael lotomabul nawit, nǝboŋ tomatu luta kokotovi. Ale datokis nǝboŋ enan hǝn nǝmatuan. Len nasoruan ta Iglan datuke harvest.

merikel: [namerikel] Natesua avan ideh salǝboi b̃igole, be nǝboŋ aYesu togole, nǝvanuan p̃isi lumaŋmaŋ lan.

mǝlauah: [namǝlauah] Nǝlablab topat mashuwag.

mǝnas: [namǝnas] Nǝkabkabilan mai na-m̃ial-habat-an togǝm len aGot, ale topat len naut aGot totoh lan. Len nasoruan ta Iglan, datuke glory, be nasoruan enan ikad namilen tile am toke nǝyalyalan.

mǝr: [namǝr] Nǝda hǝn nǝhai sua. Nǝboŋ nǝda tomasmas, egǝm vi hai pǝhas. NaJu gail lovǝhas niben nǝvanuan tomat hǝni, ale lopǝŋas namǝr hǝn nǝb̃on nǝbasuhab b̃esusau.

mina: [namina] Evi nakoin silat a Kris tovi nǝvat hǝn nap̃urp̃uran hǝn nauman hǝn nahǝbati totor.

mint: [namint] Naluhai sua nǝb̃on tosusau. NaJu gail loriŋi len nǝhanian.

mitisau hǝn nǝmauran tonor: [namitisau hǝn nǝmauran tonor] Namitisau evi nalǝboian dattokade husur dattosǝkul, o nalǝboian dattokade hǝn dattogol natsua. Ale avan sua ikad namitisau hǝn b̃itawag, avan tile ikad namitisau hǝn b̃eum hǝn naim o hǝn b̃evǝteh navus mai nǝwei, be lǝsǝkad namitisau hǝn nǝmauran tonor. Avan ideh tonau nalǝboian tokade len nǝmauran san, ale tonau nǝsaban san gail, be togol naṽide tonor aGot tohǝhaṽur hǝni, gai ikad namitisau hǝn nǝmauran tonor.

Nasub̃: [Nasub̃] Len nasoruan siGot nasub̃ ikad namilen tiltile gail. Nǝboŋ tob̃ol husur naslev mai nǝmasta san, naslev ekis amasta hǝn Nasub̃. Nǝboŋ avan ideh tosor mai nǝvanuan totibau o nǝvanuan tovat nǝhes, ekisi hǝn Nasub̃. Vǝha-sob̃sob̃ur nǝvanuan gail lokis aYesu hǝn Nasub̃ husur loputsani len nǝnauan salito. Alat lotoriŋ nǝlolit len aYesu lokisi hǝn Nasub̃ husur tomat hǝn lǝb̃ikad navoivoian mai aGot, mai nǝmauran vi sutuai. Ale len nasoruan siGot ta m̃o lokis aGot hǝn Nasub̃ aGot.

Natun aGot: [aNatun aGot] Nǝhes sua nasoruan siGot tokis aYesu hǝni.

Natun Nanoran: [aNatun Nanoran] Nǝhes sua nasoruan siGot tokis aYesu hǝni.

Natun Nǝvanuan: [aNatun Nǝvanuan] Nǝhes sua nasoruan siGot tokis aYesu hǝni. Datusab̃i len nalob̃ulat Daniel hum tovi aKristo (Dan 7.13-14), be len naut sual am len nalob̃ulat enan (Dan 8.17), mai len nalob̃ulat Ezekiel, anatun nǝvanuan evi nǝvanuan ŋai, savi aYesu.

nau-utaut-an: [nǝ-nau-utaut-an] Nǝboŋ gotosor utaut hǝni ke gigol natsua, gusor mai nǝvanuan tile gail. Gǝb̃inau utaut hǝn gǝb̃igol natsua, gunau len gaiug sǝb̃om̃.

not: [nanot] Govi not nǝboŋ namityal tovisi len navǝlam̃ nǝmatu. Len naut a Uluveu datuke datovi pan.

oil: [naoil] Natit tohum nǝwai be tobutǝlas. Nǝboŋ dattobul hǝni mai nǝwai, isal p̃oniwai. Ikad naoil tiltile gail, naoil ipat len nap̃us, ipat len nǝlal mai nabǝŋletw, ale datob̃ir naoil tile len naenjin hǝn b̃igam b̃ivoi. NaJu gail lugol nab̃iltivat erib, bul dasdas naṽit naoliv hǝn lǝb̃ikad naoil han.

oliv: [naoliv] Ikad nǝhai sua len naut a Israel. Nalute imanivǝniv ale ikad naṽite. NaJu gail lugol nab̃iltivat erib, bul dasdas naṽit naoliv hǝn lǝb̃ikad naoil han. Len nasoruan siGot datokis nǝhai enan hǝn naoliv o nǝhai oliv, ale lokis naṽit nǝhai enan hǝn naoliv.

omeka: [omeka] Len nǝalfapet silat a Kris, omeka evi naleta namǝkot.

oniks: [naoniks] Nǝvat sua nǝtau han totiltile be gǝsalǝboi gǝb̃ekǝta tur lan.

pali: [nǝpali] Nǝpali evi liol sua tokad namisurhute. Hum namisurhuwit, nǝvanuan lolis dasdas namisurhupali gail hǝn b̃egǝm vi flaua hǝn lǝb̃ipan nabǝta hǝni.

panismen: [nǝpanismen] Nǝboŋ gotogol tosa, ikad natesua todaŋ b̃ibar gaiug, napǝŋasan o natunusian o nabilasian o natohan len naim bǝbaŋis.

Pasova: [nǝPasova] Nǝhanan hǝn NǝPasova evi nǝhanan seJu gail husur lohǝhaṽur hǝn nǝboŋ aGot togol p̃is ahai a m̃o silat a Ijip lotomat be sǝbar alat a Israel.

paus: [nǝpaus] Len nasoruan siGot egai ikad namilen eru. Esua, natsua lotopat nǝvat b̃urhulon. Togon, natsua lotosiriv hǝn nab̃u nǝb̃alan lan hǝn lǝb̃ipati van.

peril: [naperil] Nǝvat nǝtau han tokǝskǝsan ale tomasil.

perŋan: [iperŋani] Datb̃ike nǝmargobut iperŋan naut p̃isi, namilen ke naut p̃isi evisivis lohoim mai vivile. Datb̃ike nǝhanian iperŋan naut p̃isi, namilen ke lopǝpehun nǝhanian van hǝn naim p̃isi, ideh sǝpar. Datb̃ike na-kel-uri-an tovoi iperŋan naut p̃isi, namilen ke nǝvanuan len naut p̃isi losǝsǝloŋ hǝni.

pǝhav utaut: [epǝhav utaut] Avan ideh ikel ur natideh savisi sal, be dereh tevisi balai. Len nasoruan siGot, nǝvanuan gail lotomaienan lukel ur nǝsa aGot tokele ŋai. Len nalo siMoses ikele ke, nǝboŋ avan ideh topǝhav utaut, asike b̃isarpoh, nǝvanuan gail limastubuni (Deu 13. 1-5).

rue: [narue] Naluhai sua nǝb̃on tosusau be nabus han tokon. NaJu gail lugol nalukai nareran hǝni ale loriŋi.

reven: [nareven] Evi nǝman namǝsav tomermer. Etibau ale ihanhan natideh, hum namisurhutit gail, natit tomat gail, naṽite, mai natuhtit tokǝlah gail.

rub̃at: [erub̃ati] Nǝboŋ dattogol nǝsaan datimaspanis sile, ale nǝpanismen evi matan. Nǝboŋ aGot torub̃at nǝsaan dan gidato, ehum tokas kuvi hǝn asike datb̃ipanis sile am. Datb̃ike nǝsaan sidat imarub̃at, namilen ep̃itp̃itoṽ. Len nasoruan b̃onb̃on datuke fogif. Len nasoruan siGot, nǝboŋ toke sah rub̃ati, namilen ke nǝhau tobaŋis gat natsua sǝbaŋisi am.

saan: [nǝsaan] Datupair dan aGot, datugol nǝsa aGot tomǝtahuni, nǝsa togol dattopǝpehw dan aGot. Nǝsa aGot toke tosa, datugolgole. Ale nǝsa aGot toke tovoi, enan datsagole.

saban: [nǝsaban] Len nǝmauran sidato datohusur suluṽ nap̃isal tonor.

safaia: [nǝsafaia] Nǝvat sua nǝtau han toboŋboŋ ale imasil.

salfa: [nǝsalfa] Nǝvat sua nǝtau han toyaŋyaŋ. Golǝboi gǝb̃isab̃i pǝpadaŋ hǝn nǝhab a Bu.

Sanhitrin: [nǝSanhitrin] Naluṽoh hǝn alalum̃an totibau seJu gail lotobǝtah hum nakotan. Alat lotobǝtah len nab̃onb̃onan enan lovi: ab̃iltihai tutumav, alat lotolav namilen a m̃o mai nǝbathudud galevis salito, alat lotoil a m̃o hǝn naJu gail mai alat lotokad namitisau hǝn nalo siMoses. Len nasoruan b̃onb̃on datuke kaonsel blong ol man Ju.

Sappat: [nǝSappat] Nǝmariboŋ aGot toriŋi ke tovi nǝmariboŋ hǝn nǝŋavŋavan. NǝSapat seJu gail etub̃at nǝboŋ namityal tomasur len naFraite ale ivan vǝbar namityal tomasur len naSatete.

sata: [nǝsata] Nǝsata ehum nǝhad naJu gail loriŋ nǝflaua lan nǝboŋ lotobul dasdas namisurhuwit. Datsalǝboi namǝlasan han, be datolǝboi ke nǝsata totor hǝn nǝflaua evi nǝflaua tosob̃ur.

Sattiusi: [naSattiusi] Avan ideh len nǝpati hǝn napolotik sua, sadǝlom ke ikad na-le-mǝhat-an dan nǝmatan. Galit isob̃ur lovi ahai tutumav mai ab̃iltihai tutumav gail.

saut: [nasaut] Govi saut nǝboŋ namityal tovisi len navǝlam̃ nǝmair. Len naut a Uluveu datuke datovi mǝhat.

Selot: [naSelot] Nǝvanuan len naluṽoh sua lotoke naut a Jutea tepǝpehw dan alat a Rom, lotoke lib̃al mai galit hǝn naut a Rom asike teil a m̃o hǝn naut a Jutea am.

senturion: [nasenturion] Nasoltia toil a m̃o hǝn nasoltia lotovi 100.

Seus: [aSeus] Nagot toil a m̃o hǝn nagot p̃isi silat a Kris.

sǝkel: [nasǝkel] Len nasǝkel, nǝvanuan enǝnoṽ hǝn namǝlasan nametǝlai gai tolǝboii mai namǝlasan hǝn natit gai salǝboi, hǝn b̃elǝboi namǝlasan hǝn natenan.

sǝkul: [esǝkul] Len nasoruan siGot, namilen sǝkul evi sǝkul hǝn namitisau, savi nalotuan.

sikam̃or: [nǝhai sikam̃or] Evi nab̃iltihai nǝda hǝn topǝhapǝhw. Naṽit nǝhai nasikam̃or iyaŋyaŋ o ebisibis nǝboŋ tomen ale nǝvanuan luhanhan gail.

silva: [nasilva] Nametǝlai sua, nǝtau han tomasiav. Nǝboŋ nasilva totaŋ, egǝm motmot. Gegai datukad nakoin lotohun nasilva. Nakoin hǝn naten vatu, nakoin hǝn natwenti vatu mai nakoin hǝn nafifti vatu lohun nasilva.

sinamon: [nasinamon] Nahurhuhai sua nǝb̃on tosusau lotoriŋi len nǝhanian hǝn lǝb̃igol nabus han b̃ivoi.

Sion: Len Nasoruan siGot, lokis nab̃iltivile siTevit hǝn naut a Sion, ale lokis nab̃iltivile Jerusalem hǝn naut aSion am, mai Jerusalem veveu. Ale len nalob̃ulat Ipru, Sion evi alat siGot (Ipru 12.22-23).

Sisa: [aSisa] Naulum̃an ideh toil a m̃o hǝn alat aRom hum tovi kiŋ salit gail, lokisi hǝn aSisa. Ale nǝhes enan tovati egǝm len nǝvanuan toil a m̃o hǝn naut a Rom sutuai tia, nahǝsan aJulius Sisa.

skopion: [naskopion] Len naut egai datokisi hǝn nahuthut, be savi huthut totoh len navis. Evi natuhtit sua tokad narien tomǝlevtor. Ikad nariṽriṽon totibau a m̃o hun nahuh, ale ikad nagilen tobǝlav kǝkereh tolǝboi b̃evin nǝvanuan. Len naut egai datukad natuhtǝte gail ŋai be len naut tiltile lukad nab̃iltihǝte. Nǝboŋ tovin nǝvanuan, navinian elǝboi b̃igol nǝmatan.

slev: [naslev] Nǝboŋ alat a Rom lotob̃al mai alat naut tile, ale lotosǝhor galito, losǝhar nǝvanuan nǝb̃alan isob̃ur dan naut enan vi Rom. Len nǝmaket lop̃ur hǝn galito hum nabuai o nab̃uluk o nabǝaŋ o nǝhab. Nǝvanuan toṽur naslev len nǝmaket etǝgau nǝmauran san. Elǝboi b̃igol timat o riŋi mai naslev pǝhaṽut hǝn arb̃ipas naslev ideh am. Nǝmauran hǝn naslev savi esan, ipat len gai toṽuri len nǝmaket.

sogsog: [sogsog] Naulum̃an o nabuai o nab̃uluk sǝkad nǝdavurhut naloson, husur avan ideh totev kotovi.

sohotut: [isohotut] Datb̃isohotut hǝn datb̃igol natsua, namilen ke datsǝnau savoi be datugol tutut hǝni ale datugol suluṽi.

soltia: [nasoltia] Nǝvanuan tokad nauman tovi nǝb̃alan. Esua len naluṽoh lotob̃al len nab̃iltib̃alan. Datokis naluṽoh enan navǝshǝsoltia.

sor levlev: [isor levlev] Nǝboŋ dattosor len nǝbathusoruan sua, esua isor tarhǝt, togon isor tarhǝte van vǝbar b̃imasil len nǝnauan sidat p̃isi. Len nasoruan b̃onb̃on datuke dibet.

sor vǝsvǝsaii: [isor vǝsvǝsaii] Nǝboŋ gotosor husur natesua nǝvanuan gail lǝsalǝboii, gusor van hǝn gǝb̃igol b̃ip̃arp̃ar len nǝnauan salito.

sor-tastasi-an: [na-sor-tastasi-an] Nǝboŋ lotokot hǝn avan ideh, len nakotan, avan ideh eil, ikel ur nǝsa tosa avan enan togole. Na-kel-uri-an enan evi na-sor-tastasi-an.

sparo: [nǝsparo] Evi natuhman namǝsav tomǝlmǝlah len tan ale hanhan ei. Naut a Vila ikade.

statia: [nǝstatia] Nabǝlavan hǝn nǝstatia evi namita tovi 185.

Stoik: Nǝvanuan galevis lotodǝlomi ke nǝvanuan ŋai ikad nǝnauan tonor hǝn b̃ekǝta tǝban gai sǝb̃on. Lunau ke nagot evi natit p̃isi len navile a pan, ale nǝvanuan p̃isi mai natit p̃isi lop̃itp̃itoṽ.

sukapak: [nasukapak] Natuhtite tomǝlmǝlah ale niben ikad navurun. Ikad nǝwei hum navǝvǝlas. Ikad nasukapak lototoh sǝb̃olito ale ikad galevis am lototoh b̃onb̃on len navǝshǝte, ale lotoum b̃onb̃on. Galenan loum hǝn naim, ale b̃urhulon naim ehum naim sevǝvǝlas. Len naim lusah tuan natit tohehe masuṽ dattokisi hǝn nǝhani.

talent: [nǝtalent] Nǝtalent nasilva evi nap̃urp̃uran hǝn nauman hǝn nasihau tovi 15. Nǝtalent nagol etibau vǝha-30 sǝhor nǝtalent nasilva.

tav: [nǝtav] Nǝman sua tohum navimal be epǝhapǝhw.

tehan: [natehan] Nǝboŋ nǝvanuan toteh, igol nǝsa hǝn toteh ale iteh mabe? Len naṽide enan datusor husur natehan san.

tenarius: [natenarius] Evi nakoin sua ta Rom, alat a Jutea lotoṽur nǝtaks salit hǝni. Evi nǝvat nap̃urp̃uran hǝn nauman hǝn nǝmariboŋ tosua ŋai.

til: [natil] Naluhai sua nǝb̃on tosusau. NaJu gail loriŋi len nǝhanian.

tin: [natin] Nametǝlai sua tomǝdmǝdau, nǝtau han tomasiav. Natin sǝtaŋ. Len naut a Vanuatu natin, naieh tuna topat b̃urhulon, loum hǝni hǝn natin.

tiv-dalusi-an: [na-tiv-dalusi-an] AGot ikel na-kel-gati-an sua mai aApraham mai nǝpasusan san van vǝbar aMoses. AGot ike, naulum̃an san gail lǝb̃etiv dalus navunut salit mai sinatulit gail hǝn b̃imasil ke lotodam̃ hǝn na-kel-gati-an siGot, dereh gai tetǝgau gat na-kel-gati-an san (Gen 17.10-14; Lev 12.3).

tivtiv tan: [etivtiv tan] Nǝboŋ nab̃uluk toliv nǝhai tivtivtan van, etiv nǝtan gol nǝtan esǝŋav, ale eutaut hǝn nǝvanuan b̃imabul namisurhut gail lan.

toŋki: [toŋki] Ehum nahos be nǝdariŋan arobǝlav.

topas: [natopas] Nǝvat nǝtau han toyaŋyaŋ ale tomasil.

trahma: [nǝtrahma] Nakoin tovi nap̃urp̃uran hǝn nauman hǝn nǝmariboŋ tosua.

trakon: [nǝtrakon] Ehum nab̃iltim̃at totibau o nab̃iltimǝhob totibau tokad nǝhabǝlan. Len nasoruan siGot akis nǝtrakon evi Setan.

trampet: [nǝtrampet] Natsua lotoum hǝni hǝn nametǝlai, ale nǝboŋ lotoṽuv lan, iwal sǝhor nǝwalan hǝn nahǝmadu.

tret: [natret] Nǝhau tomanivǝniv lotosǝsod hǝni.

tsen: [natsen] Nǝhau todaŋ tovi metǝlai. Ikad nariŋ tosuhud nariŋ togon van van ebǝlav.

tunusi: [etunusi] Nǝboŋ dattogol natideh o dattokel natideh nǝvanuan tile tolǝŋon tosa sile, datotunus nǝvanuan enan. Nǝlon avan enan imabe? Hum ma nǝlon topaŋpaŋ, hum ma nǝlon sǝdaŋ am, hum ma tololosa, be nǝlon isa.

ut Tolo Masuṽ: [Naut Tolo Masuṽ] Naim siGot ipat len nab̃iltivile Jerusalem. Naim siGot ikad naholǝvat todar visi. Ale len naim siGot ikad narum̃ eru. Narum̃ bopita, lokisi hǝn Naut Tolo, ale narum̃ tarhǝb̃iltikaliko lohoim, lokisi hǝn Naut Tolo Masuṽ. Avan ideh salǝboi b̃eb̃is ei, be ab̃iltihai tutumav elǝboi b̃eb̃is vǝha-sua len nasihau ṽisusua.

vaipa: [nǝvaipa] Evi nǝm̃at tosa. Nǝboŋ tohat avan ideh nabehi han igol avan enan imat.

vanuan Nanoran: [Nǝvanuan Nanoran] Nǝhes sua nasoruan siGot tokis aYesu hǝni husur gai inor buni.

vanuan nǝtaks: [nǝvanuan nǝtaks] Nǝvanuan tolavlav kuv nǝvat dan nǝvanuan gail m̃os nǝgavmen a Rom.

vatvat viri: [ivatvat viri] Nǝboŋ gototoh vir natesua hǝn b̃evisi, ale golǝboi tia ke dereh tevisi, be gǝsalǝboi nǝboŋ o namityal han, guvatvat viri. Len nasoruan b̃onb̃on datuke hop o ekspek.

vilesir: [navilesir] Natsua togol nǝvanuan imat ale pelan han nǝvanuan galevis am, ale sǝdareh isob̃ur lumat. Len nasoruan siGot, len naut galevis navilesir evi namǝsahan, len naut galevis am evi natideh tosa masuṽ nǝvanuan isob̃ur lotomat lan.

vinika: [navinika] Nǝboŋ nǝwain topat tobǝlav, nǝdaŋan eb̃uer am ale egǝm kon. Nabus han ikon sǝhor nalǝman.

violan (hǝn natutumavan): [naviolan (hǝn natutumavan)] Nǝboŋ alat a Israel lototutumav, lotutumav hǝn narivatǝvat lǝsǝkad natideh tosa len gail. Lotutumav hǝn nǝtav gail, nawit mai nǝwain am. Natit p̃isi lototutumav hǝni evi naviolan hǝn natutumavan.

vus beltaŋ: [navus beltaŋ] Evi natit tokad nǝhau gail nǝvanuan toram̃ram̃e hǝni hǝn b̃igol nǝwalan ale nǝvanuan lokǝkai husuri sum̃an alathutai lotokǝkai husur nakita mai napes.

ṽisusua: [aṽisusua] Ahaṽut ideh b̃ikad anatun ulum̃an tosua ŋai, datokisi hǝn aṽisusua setǝman.

ṽisusua: [naṽisusua] Namǝtas o nǝwei tokad namǝtan tosua ŋai.

wain: [nǝwain] Len naut a Jutea lupal dasdas naṽit nakrep hǝn nasuhute b̃isel. Nasuhute topat tobǝlav kǝkereh esǝsaruṽ ale egǝm vi wain.

waks: [nǝwaks] Natsua lotoum hǝn nǝkadel hǝni. Nǝboŋ togǝm vi wai, nǝwai nam̃ial bolai.

wes: [nawes] Govi wes nǝboŋ gotovi lan naut namityal tomasur lan.

wik: [nawik] Len nasoruan siGot nawik evi nǝmariboŋ lotomǝlevru.

wit: [nawit] Nawit evi liol sua tokad namisurhute. Nǝvanuan lolis dasdas namisurhuwit gail hǝn b̃egǝm vi flaua hǝn lǝb̃ipan bǝta hǝni.

wolf: [nawolf] Ehum nab̃iltilipah katkat towael.

yok: [nayok] Nǝhai lotoriŋi len nab̃uluk eru hǝn arb̃ib̃on hǝn arb̃eum b̃onb̃on. Ikad nayok tile am tovi nǝhai topat len nǝbathuvǝson nǝvanuan natit tomǝlas totahǝtah tarhǝte ale natit tile totahǝtah tarhǝte.