1 Yisu pa ndœma toro asœke mbœrœ kœma fœ endje adœke endje shi gbɨ lœ kœza avwala, endje gbɔgbɔ dɔkɔngɔ nene. 2 Tshe pa fœ endje adœke: «Anga ayi kœwa ngbanga á tshe kpakpa awa Ndjaba nene yé á lɨlɨ ndje œsœ uzu bale nene, sœ lima ɓa lœ anga ongbo bale. 3 Yé anga yashe koya sœ lima kœna ga ndœ ye ɔlɔ dœ ɔlɔ kœpa fœ she adœke: “Wa ngbanga ugurutœ mœ dœ ayingba mœ asœke kane.” 4 Katshatsha ayi kœwangbanganœ sœ ɓa lima kœvwaratœ ye, yé tshe sœ kœpa dœ tœ ye adœke: “Ataa mœ kœkpakpa awa Ndjaba nene yé á kœlɨlɨsœ azu nene, 5 kashe ɓata á yashe koya asœ sœ kœndanga mœ, mœ wa ɔtshɔ ngbanga fœ she mbœrœ á tshe kpa kœkwakwatœ ye ndœ kœtshanga kumu mœ nene.”»

6 Yé Gbozu kpa kœpa ga pa nœ adœke: «'E dji o'o á ayi kœwangbanga á tshe sœsœ ndjii nene, sœ kœpa tœnœ dœ ɔtshɔnœ kane! 7 Yé dœ mara ataa, Ndjaba œ wa ɔtshɔ ngbanga ga tœ azu á tshe ke endje á endje sœ kœkɨ ga tœ ye butshɔ dœ ɔlɔ nene a? Tshe gbeletœ ye ndœ kœtɨ kane endje ga lafo ye a? 8 Mœ sœ kœpa fœ 'e ngbɨ adœke: Tshe wa ɔtshɔ ngbanga fœ endje katsha ye. Kashe lɔkɔ á Gbolo nœ uzu œ kwa bala, tshe gbɔ azu á endje sœ dœ kœyindœrœ ga ndœ Ndjaba pa ɔshɔ zœ a?»

9 Tshe kpa pa ndœma toro asœke fœ anga azu á endje sœ kœgbe adœke œne sœ ndjii tœ ala Ndjaba, yé á sœ kœgu œsœ anga endje adœke: 10 «Anga azu bisha na lima ga lœ Tepelo ndœ kœza avwala; anga bale kœdœ Farisayi yé anga kœdœ ayi kœko ngendja lapo. 11 Farisayinœ ka ga lafo, œ sœ lima kœza avwala tœ upu nœ ye dœ tœ ye adœke: “Uu Ndjaba, mœ sœ kœdonga ɓœ mbœrœ mœ sœsœ ɓata anga azu nene, endje kœdœ aayi angba, aayi djingili, aayi angba budu, mœ sœsœ ndje ɓata ayi kœko ngendja laponœ á tshe sœ ɓa e asœ nene. 12 Mœ sœ kœyotshelœma mœ olo bisha lœ pɔsɔ bale, yé œ sœ kœto œrœ bale lœ ndjokpa lœ œrœ nœ mœ kɔ á mœ sœ kœgbɔ tœnœ fœ ɓœ.” 13 Ayi kœko ngendja lapo sœ œnœ ye zara; tshe yiyi lima ndœ kœmesho ga lafo nene, kashe tshe sœ kœda okoro ye yé œ sœ lima kœpa adœke: “Uu Ndjaba, wu oyo mœ dœ ekpe uzu á mœ sœ asœke.”

14 «Yisu kœpa fœ endje adœke: “Mœ sœ kœmɨndœ nœ fœ 'e, ayi kœko ngendja lapo wuta lima ndjii tœ ala Ndjaba lɔkɔ á tshe gu ga ndœ ye, kashe œ dœ́dœ́ Farisayinœ nene. Gbambanœ nene, uzu kɔ á tshe tɨtœ ye dœ tœ ye ga lafo, Ndjaba œ ku she ga atɨ, kashe tsheneke á tshe zatœ ye ga atɨ, Ndjaba œ tɨ she ga lafo.”»

15 Azu sœ lima kœna ndje dœ aaya agbolo fœ Yisu mbœrœ adœke tshe to kane ye ga pa endje. Kœwu ataa, ayambarœ sœ lima kœgeta endje. 16 Kashe Yisu e agbolo ga ndœ ye, yé á kœpa adœke: «'E katœ agbolo dœ́ endje na ga ndœ mœ! 'E kɔkɔ endje nene, mbœrœ ogo Gbozu Ndjaba sœ mbœrœ azu á endje sœ ɓata endje. 17 Mœ sœ kœpa dœ adjapu fœ 'e adœke: Uzu neke á tshe yiyindœ ogo Gbozu Ndjaba ɓata gbolo nene, tshe li bala ga zœ nene.»

18 Anga gbozu tshapa ayuda bale yu Yisu adœke: «Ɔtshɔ ayi kœyisœrœ, œrœ gaɗe dá mœ kœmbœrœ á kœgbɔ soro á ka nene a?» 19 Yisu kœpa fœ she adœke: «Mbœrœ gaɗe á ɓœ e mœ ɔtshɔ uzu a? Uzu bale sœsœ dœ ɔtshɔnœ nene, kolœ Ndjaba kutɨ ye. 20 Ɓœ wusœ awa o'o ye: “Mbœmbœrœ angba budu nene, wowo uzu nene, zɨzɨ angba nene, papa wala ga pa uzu nene, lɨsœ aba zœ dœ pe ayi zœ.”»

21 Gbozu tshapa ayudanœ asœmœ kœgi adœke: «Mœ sœ kœmbœrœtœ mœ ɓa lima liakanœ pe lœ gbolo mœ.» 22 Yisu kœdji ataa yé á kœpa fœ she adœke: «Œ sœpe œrœ bale á ɓœ mbœmbœrœ nene: Œrœ kɔ á ɓœ sœ dœ tœnœ, ka œ kurutshelœ ngendjanœ tœ aayi oyo. Ataa, ɓœ gbɔ bala kœgbɔrœ ɓa lafo. Manda nœ, na ga mœ yé œ te manda mœ.» 23 Lɔkɔ á tshe dji o'onœ asœmœ ataa, oyo za she waa, mbœrœ œshe kœdœ lima ayi kœgbɔrœ. 24 Yisu wu adœke tshe sœ lima dœ oyo, œ pa adœke: «Tœ adœke aayi kœgbɔrœ li ga lœ Ogo gbozu nœ Ndjaba, œ sœ tœ ɔgbɔnœ. 25 Gbambanœ nene, agea á ɨ'ɨrɨ ye kœdœ Shamo li kœli tɔ lœ ogoro ɨmbɨlɨ dœ ɔtshɔnœ, kashe œ kpa gbɔ kœrosœ nœ adœke ayi kœgbɔrœ li ga lœ Ogo gbozu nœ Ndjaba.» 26 Azu á endje sœ lima kœdji o'onœ asœmœ yu adœke: «Atamœ, œɗe dá li kœshe tœnœ a?» 27 Yisu kœgi adœke: «Œrœ á azu lili ndœ kœmbœrœ tœnœ nene, Ndjaba œ mbœrœ ye.»

28 Yé Petro pa adœke: «Dji 'a kane. 'A katœ œrœ nœ 'a yé œ te manda zœ.» 29 Yisu kœgi fœ endje adœke: «Mœ sœ kœpa dœ adjapu fœ 'e adœke, uzu kɔ á tshe katœ anda nœ ye, awonœ, ayingɔnœ, abanœ dœ aayanœ too agbolo nœ ye mbœrœ kœzatœ ye ndœ Ogo gbozu nœ Ndjaba, 30 tshe gbɔ œrœ kœropanœ dœ osho asœke. Yé dœ osho á na manda nœ, tshe gbɔ ndje soro á ka nene.»

31 Yisu ko ayambarœ nœ ye ndjokpa dœ bisha, œ pa fœ endje adœke: «'E dji kane, a sœ kœro ga lœ Yerusaleme, yé ɓa zœ dá o'o para á aayi kœgbara o'o su lima tœ upu nœ Gbolo nœ uzu œ mbœrœtœ endje. 32 Endje za she ga tshakane azu á endje wuwusœ Ndjaba nene. Endje mɔ she, endje gu she dœ pe kœtu ngusha ga tœ ye; 33 manda kœsɔ she dœ ndjapa, endje wo she. Yé manda olo votɔ, tshe she lœ akuzu.» 34 Kashe, ayambarœ wuwu lima sœ œrœ bale lœ nœ nene. Ádá o'onœ za lima tœ endje yiwatœ nœ tœ endje ye. Endje djidji lima tshelœ kata o'onœ á Yisu yi lima ndœ kœpa tœnœ nene.

35 Lɔkɔ á Yisu wuta lima ndoo dœ Yeriko, anga ayibula sœ lima ga atɨ ga tœ ama awa, á sœ kœyɔndœ œrœ. 36 Kœdji œsœ azu ndjoro kœro tœ awa, tshe yu lima osho adœke: «Œrœ gaɗe dá sœ kœmbœrœtœ endje asœmœ a?» 37 Endje pandœ nœ fœ she adœke: «Yisu, uzu Nazarete dá ro asœmœ.» 38 Tshe kœta rawa adœke: «Yisu Gbolo nœ Davidi, wu oyo mœ kane!» 39 Azu á endje sœ lima kœna utshunœ, te lima tœ kœgbagbara she adœke tshe sœ koko. Kashe, tshe kpa ta rawa dœ ɔgbɔ adœke: «Gbolo nœ Davidi, wu oyo mœ kane!» 40 Yisu ka, yé œ pa adœke endje na dœ she fœ œne. Lɔndɔ á ayibula sœmœ wuta ndoo, Yisu yu she adœke: 41 «Œrœ gaɗe dá ɓœ yindœ nœ adœke mœ mbœrœ fœ ɓœ a?» Tshe kœgi adœke: «Gbozu, mœ yindœ kpa kœwu osho.» 42 Yisu kœpa fœ she adœke: «Wu osho. Kœyindœrœ nœ zœ she ɓœ ye.» 43 Petœ œsœnœ tshe wu osho, yé œ te lima kœna manda Yisu dœ kœdonga Ndjaba. Kœwu tœnœ ataa, azu kɔ tetœ kœdonga Ndjaba.