1 Afarisayi dji lima ndœ nœ adœke Yisu sœ lima dœ ayambarœ waa yé œ sœ kœza batisimu fœ azu kœropa Yowane. 2 Kashe Yisu dœ tœ ye zaza lima batisimu fœ azu nene, ayambarœ nœ ye dá sœ lima kœza batisimunœ. 3 Ɔlɔ á Yisu dji o'onœ á endje sœ lima kœpa tœnœ, tshe katœ ogo Yuda tɨ yé œ gu ga lœ Galilayi. 4 Andaa tœ kœgu she ga zœ, œ li lima adœke tshe ro tɔ lœ ogo Samariya. 5 Tshe wuta ndoo dœ anga tshalakpɨ Samariya á ɨ'ɨrɨnœ kœdœ Sishare. Sishare sœ ndoo dœ kɨndɨ á Yakobo za lima fœ gbolo nœ ye dœ Yozefu. 6 Œtœnœ kœdœ ndje osho á kudu ungu nœ Yakobo sœ tœnœ. Yisu mɔ lœ ana, yé œ sœ ga atɨ ga tœ ama kudu ungunœ. Œ sœ lima ndoo dœ kakpi ɔlɔ.* 4.6 Kakpi ɔlɔ yindœ kœpa adœke ada ɔlɔ mindu dœ bale lindœ mara kœdɨ ada ɔlɔ nœ azu Roma.

7 Anga yashe Samariya bale na ndœ kœsu ungu á Yisu pa fœ she adœke: «Su ungu fœ mœ dœ mœ ndjo.» 8 Ayambarœ nœ ye kɔ wuta lima ga lœ ongbo mbœrœ kœpara kœzɨrœ. 9 Yashe Samariyanœ kœpa fœ Yisu adœke: «Œɓœ kœdœ uzu Yuda, mbœrœ gaɗe á ɓœ eshondœ ungu kœndjo ɓa ndœ œmœ dœ́ uzu Samariya?» Mbœrœ Ayuda mbœmbœrœ ɓalima ayo dœ Asamariya nene ma! 10 Yisu kœgi fœ she adœke: «Œdœ ɓœ kœwu má sœ œrœ á Ndjaba œ to, œdœ pe uzu á tshe esho ndœ ungu kœndjo ndœ zœ asœke; œɓœ dá yu má she ndœ ungu yeka á tshe su má ungu á za soro fœ azu fœ ɓœ.»

11 Yashe Samariya kœyu she adœke: «Gbozu, ɓœ sœsœ dœ œrœ kœsu dœ ungu nene, yé kudu ungunœ li waa, ataa ɓœ gbɔ ungu á za soro fœ azu ɓata ma a? 12 Ata 'a dœ Yakobo dá za kudu ungunœ asœke fœ 'a. Tshe ndjo ndje lima ungunœ œshe dœ agbolo nœ ye œdœ pe ayarœ nœ ye. Ataa ɓœ gbe adœke ɓœ ropa ye ye a?»

13 Yisu gi fœ she adœke: «Uzu kɔ á tshe ndjo ungu asœke, tshe kpa sœ dœ ogo ungu. 14 Kashe uzu á tshe ndjo ungu á mœ su fœ she, tshe kpa sœ dœ ogo ungu nene. Gbambanœ nene, ungu á mœ su fœ she œ sœ lœ ye ɓata kumu ungu á za soro á ka nene.» 15 Yashe Samariya kœpa fœ she adœke: «Gbozu, su ungunœ á ɓœ pa tœnœ asœke fœ mœ, adœke ogo ungu kpa mimi mœ nene yé mœ kpa nana kpœke ndœ kœsu ungu nene.»

16 Yisu kœpa fœ she adœke: «Na œ e akɔ zœ dœ́ 'e kwatœ 'e dœ she ɓa ke.» 17 Yashe Samariya pa fœ she adœke: «Mœ gugu dœ yakoshe nene.» Á Yisu kœpa fœ she adœke: «Adjapu adœke ɓœ gugu dœ yakoshe nene. 18 Gbambanœ nene, ɓœ ɨ ayakoshe mindu yé tsheneke á ɓœ sœ dœ she ngɔngɔ asœke dœ́dœ́ akɔ zœ nene. Ɓœ pa adja o'o.»

19 Á yashe kœkɨ paa adœke: «Gbozu, mœ wu adœke œɓœ kœdœ ayi kœgbara o'o. 20 Aata 'a donga Ndjaba pa kaga asœke, kashe e'e dœ́ Ayuda, 'e pa adœke osho á li kœdonga Ndjaba tœnœ kœdœ Yerusaleme.» 21 Yisu kœpa fœ she adœke: «Yashe, dji mœ kane. Anga ɔlɔ œ tɔ á 'e kpa donga Ndjaba Aba ɓa pa kaga too ɓa lœ Yerusaleme nene. 22 E'e dœ́ Asamariya, 'e sœ kœdonga Ndjaba kashe 'e wuwusœ ye nene. Kashe a'a dœ́ Ayuda, 'a sœ kœdonga Ndjaba neke á 'a wusœ ye mbœrœ kœshe wuta lœ awa nœ Ayuda. 23 Kashe dœ anga ɔlɔ bale, yé ɔlɔnœ tɔ ye, adja azu kœdonga Ndjaba, endje donga she dœ Ɨshirɨ œdœ pe lœ adjapu. Gbambanœ nene, Ndjaba yindœ nœ adœke azu donga œne dœ maranœ asœmœ. 24 Ndjaba kœdœ Ɨshirɨ, yé endje á endje yindœ kœdonga she li kœdonga she dœ Ɨshirɨ œdœ pe lœ adjapu.»

25 Yashe Samariya kœpa fœ she adœke: «Mœ wusœ nœ adœke Masiya, á tshe kœdœ Kristu, œ na zœ. Ɔlɔ á tshe kœna, tshe mɨndœ œrœ kɔ.» 26 Yisu kœgi fœ she adœke: «Œmœ kœdœ she, œmœ á mœ sœ kœpa o'onœ fœ ɓœ asœke.»

27 Dœ lɔndɔnœ asœmœ, ayambarœ nœ Yisu yi kumu endje, yé uvuru endje kpa lœ nœ tœ kœwu adœke tshe sœ kœpa o'o dœ yashe. Kashe anga bale yuyu she nene adœke: «Ɓœ sœ kœpara gaɗe e? Too o'o gaɗe dá 'e sœ kœpa dœ she a?» 28 Yé yashenœ katœ lɔsú ungu nœ ye tɨ kpœtœmœ, yé á kpagu kœpandœ nœ fœ azu ɓa lakpɨ adœke: 29 «'E na dœ́ wu anga yakoshe bale á tshe sœ ɓa e kane, tshe pandœ œrœ kɔkɔ á mœ mbœrœ fœ mœ. Œrrr á tshe dœ ete Kristu a?» 30 Ataa, azu wuta lœ ongbo, œ na ga ndœ ye.

31 Kolœ kpœtœmœ, ayambarœ nœ ye tetœ kœtovworogbo she adœke tshe zɨ œrœ. Endje pa fœ she adœke: «Rabi, zɨ rœgo kane.» 32 Kashe Yisu gi fœ endje adœke: «Mœ sœ dœ kœzɨrœ á 'e wuwusœ nœ nene.» 33 Ayambarœ kœtetœ kœyutœ endje ugurutœ endje adœke: «Ataa anga uzu na dœ kœzɨrœ fœ she a?»

34 Yisu kœpa fœ endje adœke: «Kœzɨrœ nœ mœ dœke: œ li adœke mœ mbœrœ œrœ á ayi kœvwa mœ yindœ nœ, œdœ ndje kœgi akwa á tshe vwa mœ ndœ kœmbœrœ tœnœ ga tœ ndɔngɔlɔnœ. 35 E'e, 'e sœ kœpa adœke: “Œ sœpe yapu vana tœ kœkɔ ngwarœ.” Kashe œmœ, mœ pa fœ 'e adœke, 'e wu kɨndɨ dœ ɔtshɔnœ; leyɔ doro ye œ sœ ndoo tœ kœkɔ tœnœ! 36 Uzu á tshe kœkɔ, tshe gbɔ ngendja tshangba akwa nœ ye, yé tshe ngbɔɓa leyɔnœ mbœrœ soro á ka nene. Uzu á tshe lu leyɔ ga lœ kɨndɨ dœ pe tsheneke á tshe kɔ, endje sœ dœ yanga awa bale. 37 Gbambanœ nene, azu pa anga gbaguru adœke: “Uzu gɨ ngwarœ kashe ayi kœkɔ tœnœ sœ kpi”. 38 Mœ vwa 'e ndœ kœkɔ leyɔ tshelœ kɨndɨ á œ dœ́dœ́ 'e dá djo nene. Anga angbɨ azu dá djo kɨndɨnœ yeka á 'e li ga lœ akwanœ manda endje tœ kœkɔ leyɔnœ.»

39 Ɨlɨ azu Samariya kpœlœ ongbonœ asœmœ sœ lima dœ kœyindœrœ ga ndœ Yisu mbœrœ o'o á yashenœ pa adœke: «Tshe pandœ œrœ kɔ á mœ mbœrœ, fœ mœ.» 40 Ádánœ ataa, lɔkɔ azu Samariya na lima ga ndœ ye, endje kɨ lima ga tœ ye adœke tshe sœpe dœ œne. Yisu mbœrœ lima kpœtœmœ olo bisha. 41 Anga azu kpi ndjoro kpa sœ ndje lima dœ kœyindœrœ ga ndœ Yisu mbœrœ o'o á tshe sœ lima kœpa tœnœ dœ tœ ye. 42 Endje pa lima fœ yashenœ adœke: «Ngɔngɔ asœ, 'a sœsœ dœ kœyindœrœ ga ndœ ye kolœ mbœrœ o'o á ɓœ pa fœ 'a nene. 'A sœ dœ kœyindœrœ ga ndœ ye mbœrœ 'a dji ndje o'o á tshe pa dœ tœ ye. Yé 'a wusœ nœ adœke œshe kœdœ adja ayi kœshe azu tshapashɔ.»

43 Manda kœlo olo bisha kpœtœmœ, Yisu áafo œ na ga lœ Galilayi. 44 Tshe pa lima dœ tœ ye adœke: «Azu lɨlɨsœ ayi kœgbara o'o ɓa lœ ogo nœ ye nene.» 45 Ɔlɔ á tshe wuta ga lœ Galilayi, azu sœ dœ yanga mbœrœ kœwuta she ga lœ ogo nœ endje; mbœrœ á endje na ndje lima ndœ angbo pake ɓa lœ Yerusaleme, yé œ wu œrœ kɔ á tshe mbœrœ lima.

46 Tshe kwa lima tœ ye ga lakpɨ Kanana lœ ogo Galilayi ɓa tœ osho á tshe fa lima ungu tœ vinu. Ɓa zœ, anga gbozu tshapa akwa nœ lita bale lakpɨ Kaparnawumu sœ lima dœ gbolo yakoshe nœ ye á tshe sœ dœ koɓa. 47 Ɔlɔ á tshe dji adœke Yisu to ɓa lœ ogo Yuda œ na ga lœ Galilayi, tshe na ga ndœ ye, yé œ kɨ fœ she adœke tshe na œ she gbolo nœ œne á tshe yindœ kœtshu tœnœ. 48 Yisu kœpa fœ she adœke: «Œdœ 'e kœdjidji má ndœ ambárá afá œdœ pe ɔtshɔ akwa á azu pandœ nœ gooo asœke nene, 'e sœ má dœ kœyindœrœ ga ndœ mœ nene.» 49 Yé gbozu akwa nœ litanœ pa fœ she adœke: «Gbozu, wuta ga ndœ mœ utshunœ adœke gbolo nœ mœ kœtshu.» 50 Yisu kœgi fœ she adœke «Gu zœ, gbolo nœ zœ she ye.» Yakoshe kœyindœ o'o á Yisu pa fœ she, yé œ gu da ye. 51 Tshe sœ damba tœ awa kœgu she atake, aayi akwa nœ ye kœna para tshatshu ye á kœpa fœ she adœke: «Gbolo nœ zœ she ɓamama ye.» 52 Tshe yu endje adœke, gbolo nœ œne she dœ ada ɔlɔ gaɗe e? Endje kœpa fœ she adœke: «Ada ɔlɔ bale manda kakpi ɔlɔ† 4.52 Ada ɔlɔ bale manda kakpi ɔlɔ: Œ yindœ kœpa adœke ada ɔlɔ ndjokpa dœ votɔ lindœ mara kœdɨ ada ɔlɔ nœ azu Roma. libi dá koɓanœ katœ ye.» 53 Aba gbolonœ kœwusœ nœ adœke kolœ dœ ada ɔlɔnœ asœmœ libi dá Yisu pa fœ œne adœke: «Gbolo nœ zœ she ye.» Ataa, œshe dœ pe azu tshasœnda nœ ye kɔ endje sœ dœ kœyindœrœ ga ndœ Yisu.

54 Asœ kœdœ bisha ambárá afá á Yisu mbœrœ lɔkɔ á tshe to ɓa lœ Yuda á kwatœ ye ga lœ ogo Galilayi.