1 Manda anga olo, Yisu kwatœ ye ga lœ Kaparnawumu yé azu dji adœke tshe sœ ɓa sœnda. 2 Azu ngbɔtœ endje ndjoro ɓa sœnda tɔ ga lœ talamanda œrrr yaba yaba tɔ ɓa shu. Anga ɔngɔrɔ osho sœsœpe nene yé á tshe ka yeka á sœ kœyisœ œrœ fœ endje. 3 Anga azu vana za uzu ada ye tshu tshakudu ye œ na dœ she fœ Yisu. 4 Kolœ mbœrœ kœngba azu, endje lili kœwuta dœ she ɓa tshatshu Yisu nene. Endje ɔ, œ kɔrɔ ogoro ɓa pa anda kpœtœ osho á Yisu ká tœnœ yeka á yi uzunœ á ada ye tshu asœmœ dœ kondja nœ ye kɔ tara tœnœ ndjii ga tshatshu ye. 5 Yisu wu kœyindœrœ nœ endje, œ pa fœ uzunœ á ada ye tshu adœke: «Gbolo nœ mœ, mœ djerœndœ ekperœ nœ zœ ye.»

6 Anga aayi kœyisœ awa akwanœ á ndje lœ ga atɨ tœ œsœnœ tetœ kœgbetshelœ endje adœke: 7 «Mbœrœ gaɗe á uzunœ asœke œ pa mara o'o ata a? Asœke kœdœ kœgu œsœ́ Ndjaba nene a? Œɗe dá li tœ kœdjerœndœ ekperœ a; œ dœ́dœ́ Ndjaba kutɨ ye nene a?» 8 Yisu wu lima sœ gbetshelœ nœ endje kpa, á yu endje adœke: «Mbœrœ gaɗe á 'e gbe o'o tœ lɔsu 'e ataa a? 9 Kœpa fœ uzu adœke: “Mœ djerœndœ ekperœ nœ zœ ye”, too ndje kœpa adœke: “Aalafo, œ za kondja nœ zœ yé œ na ana”, o'o neketa dá ga a? 10 Mœ pa o'onœ asœke mbœrœ 'e kœwusœ nœ adœke kpœpa ɔshɔ asœke kɔ, Gbolo nœ uzu dá sœ dœ gbɔgbɔ mbœrœ kœdjerœndœ ekperœ». Yé á tshe kœpa fœ uzunœ á ada ye tshu adœke: 11 «Mœ pa fœ ɓœ, áalafo œ za kondja nœ zœ yé œ gu ga ndœ zœ!» 12 Gbɨkɨvwɨgbɨ, ayi koɓanœ aalafo, œ za kondja nœ ye, œ wuta ngarrr dœ ala azu kɔkɔ á endje sœ lima tœ œsœnœ. Œ te egerœ o'o lœma azu kɔ yé uvuru endje kpa lœ nœ. Endje donga Ndjaba, œ pa adœke: «A wuwu ɓa lima anga neke bale nene!»

13 Yisu fatœ ye kœgu jerœ ngbɔlɔɔ tœ mangu Galilayi. Azu ndjoro na ga ndœ ye á tshe ka á sœ kœyisœ œrœ fœ endje. 14 Kœsœ kœdɨrœ ataa, Yisu wu anga uzu bale, ɨ'ɨrɨ ye kœdœ Levi, gbolo nœ Alefe á tshe sœ ga atɨ ɓa tœ osho kœyɔ lapo. Yisu vwi o'o fœ she adœke: «Na manda mœ.» Levi áafo yé œ na manda ye.

15 Manda nœ, Yisu sœ kœzɨrœ ɓa sœnda nœ Levi. Azu kœko ngendja lapo ndjoro, dœ pe aayi kœmbœrœ ekperœ sœ lima kœzɨ œrœnœ dœ she awa bale œdœ pe ayambarœ nœ ye, mbœrœ ɨlɨ azu á ndje sœ lima kœna manda ye kœdœ kolœ mara azunœ asœmœ. 16 Yé aayi kœyisœ awa akwa nœ Afarisayi wu Yisu kœzɨ œrœ awa bale dœ ayi kœko ngendja lapo dœ pe azu kœmbœrœ ekperœ, á yu ayambarœ nœ ye adœke: «Mbœrœ gaɗe á tshe zɨ œrœ kpœtœ œsœnœ bale dœ azu kœko ngendja lapo œdœ pe aayi kœmbœrœ ekperœ a?» 17 Yisu dji ataa, œ gi o'o fœ endje adœke: «Azu neke á tshelœ akɔ endje sœ yerœ, endje mbœrœ ogo monganga nene kolœ ayi koɓa dá gbe ndœ kœna kœwu she. Mœ na kœ'e osho fœ azu á endje sœ ndjii nene, mœ na mbœrœ azu kœmbœrœ ekperœ.»

18 Dœ anga ɔlɔ bale, ayambarœ nœ Yowane ayi kœza batisimu dœ pe endje nœ Afarisayi lœ lima kœyotshelœma endje mbœrœ Ndjaba yeka azu na kœyu Yisu adœke: «Mbœrœ gaɗe á ayambarœ nœ Yowane ayi kœza batisimu dœ endje nœ Afarisayi œ yotshelœma endje mbœrœ Ndjaba yeka á endje nœ zœ vwara má tœ endje kœmbœrœ awa bale a?» 19 Yisu gi fœ endje adœke: «Œdœ uzu kœto yashe á kœ'e anganœ ndœ angbonœ, endje yotshelœma endje ye a? Bale nene! Ɓata akɔ yashe sœ kpœtœ œsœnœ dœ endje, endje yotshelœma endje nene. 20 Kashe lɔkɔ á endje kœza akɔ yashenœ ugurutœ anganœ, ɔlɔnœ á endje yotshelœma dœmœ.

21 «Uzu zaza tafo lœba œ pi ga pa ongboro lœba nene. Œdœ tshe kœmbœrœ ataa, tafo ndœma lœbanœ œ suru tshelœ ongboronœ, yé ogoronœ œ kpa gerœ kœropa ongboro ogoronœ má utshunœ. 22 Awa bale, uzu susu tafo ipi va va va ga lœ ongboro anga nene. Ete nene œ kœsœ adœke ipinœ yuuyu, tshelœ anga œ kpa kiri kiri; á kœde, ipinœ œ tu kpa ga lœ ɔshɔ. Ipi dœ anga kɔkɔ œ ro ye, a wusœ nœ adœke tafo ipi li dœ tafo anga.»

23 Dœ anga lɔkɔ sabata bale, Yisu dœ ayambarœ nœ ye ro tɔ lœ kɨndɨ ble. Ayambarœ nœ ye yopa kœsɔ ogboro kumu ble na tœnœ ɨndɨrɨ ala awa. 24 Yé Afarisayi yu she adœke: «Wu œneke kane, mbœrœ gaɗe á ayambarœ nœ zœ œ mbœrœ œrœ neke á lili adœke azu mbœrœ dœ olo sabata nene a?» 25 Yisu gi o'o fœ endje adœke: «'E dɨdɨ damba la mbeti dœ ádá œrœ á Davidi mbœrœ lima, dœ ɔlɔnœ á ogo li tœ ye dœ azu nœ ye á endje gugu dœ kœzɨrœ nene a? 26 Tshe li ɓa lœ anda nœ Ndjaba, á zɨ rœgo á endje ko fœ Ndjaba dœ lɔkɔ nœ Abiatare á li kolœnœ adœke egerœ nganga Ndjaba kœzɨ, á Davidi zɨ yeka á kpa to ndje udunœ fœ azu nœ ye.» 27 Yisu kpa pa fœ endje adœke: «Ndjaba mbœrœ lɔkɔ sabata mbœrœ uzu, tshe mbœmbœrœ uzu mbœrœ lɔkɔ sabata nene. 28 'E wu ádánœ á sœ adœke Gbolo nœ uzu kœdœ ayengɔ lɔkɔ sabata.»