8
Yisu kœdœ egerœ nganga Ndjaba nœ azœ
1 Andaa, gilida o'o nœ azœ á a yindœ kœpa tœnœ kœdœ mara egerœ nganga Ndjaba á a sœ dœ she, œshe á tshe sœ ga atɨ ga tœ kuni ngande tshagbozu nœ Ndjaba ɓa lafo, 2 ɓata ayi akwa nœ adja œyerœ osho œdœ œnœ adja gbanda tande á Gbozu mɔ, kashe œ dœ́dœ́ uzu dá mɔ nene.
3 Endje za egerœ nganga Ndjaba kɔ ga tœ akwa mbœrœ kœto kœtorœ œdœ tokóró. Mbœrœ tœnœ ataa, œ sœ dœ ádá waa ye adœke tshe sœ dœ œrœ kœto tœnœ. 4 Œdœ Kristu kœsœ lima ɓa pa ɔshɔ, tshe dœ má nganga Ndjaba nene. Gbambanœ nene, anga anganga Ndjaba á endje sœ kœko kœtorœ lindœ awa akwa, sœ zœ. 5 Kashe endje sœ kœdonga Ndjaba ga tœ ɨshirɨ œrœ, ga tœ desherœ á sœ kœma adjapu nœ tshalafo. Mbœrœ tœnœ ataa dá Ndjaba za lima o'o fœ Moyize utshu nœ kœmɔ gbanda tande. Tshe pa fœ she adœke: «Wu, mbœrœ kɔ lindœ mara á mœ yi lima sœ nœ fœ ɓœ ɓa pa kaga.» 6 Adjapu, tshe sœ kœmbœrœ akwa á ropanœ kɔ, mbœrœ œshe kœdœ uzu ɓa uguru ɔtshɔ ayo á ka ga pa ɔtshɔrœ á Ndjaba pa lima tœ nœ.
7 Œdœ endje kœgbagbagbara o'o tœ upu nœ ayo neke lima utshunœ nene, ádá nœ kœyapa tœnœ dœ bishanœ œ gu má nene. 8 Kashe tœnœ kœdœ kœgbagbara osho dá Ndjaba sœ kœgbagbara dœ azu nœ ye lɔkɔ á tshe sœ kœpa adœke:
«Gbozu pa adœke, dœ olo á na manda nœ,
á mœ lu tafo ayo ugurutœ mœ dœ azu Israyele
œdœ dœ azu ogo Yuda,
9 œ sœsœ ɓata ayo á sœ lima ugurutœ mœ dœ aata endje
lɔkɔ á mœ ko endje dœ kane mœ
mbœrœ kœko endje ga ushu lœ ogo Ezipito nene.
Mbœrœ endje dœ tœ endje, endje mbœmbœrœtœ endje lima lindœ ayo nœ mœ nene.
Gbozu pa adœke: œmœ ndje, mœ katœ endje tɨ ye.
10 Gbambanœ nene, wu ayo á mœ lu bala dœ azu Israyele
manda olonœ asœmœ dœke:
ndœ kœza awa akwa nœ mœ,
Mœ su bala awa akwa nœ mœ
ga lœ gbetshelœ nœ endje œdœ ga lɔsu endje.
Mœ te bala Ndjaba nœ endje,
yé endje te bala azu nœ mœ.
11 Uzu bale ugurutœ endje œ yisœ œrœ nene fœ yanganœ too fœ ayanœ adœke tshe wusœ mœ,
mbœrœ endje para,œ wu bala sœ mœ ye,
kœto kpœtœ aaya azu œrrr ga tœ agboro azu.
12 Gbambanœ nene, mœ djerœ bala ndœ ekperœ nœ endje,
yé mœ kpa kwatœ mœ kœtondœ nœ bale nene.»
13 Dœ kœpandœ tafo ayo, Ndjaba fa œneke utshunœ tœ ongboronœ. Andaa, œneke á fa ongboro œrœ yé á gbɔ ye, sœ ndoo kœyiwa tœnœ.