Pákén Enjil cha
Markásay
kalamá
Markásay Enjilay pajjár
É ketábay nebisók, Markás, Issá Masihay morid Shamun Petrosay sangat o cha bongéji kelisáay báwarmandán yakké at. Kásedáni Káray ketábá, lahtén jágahá Markásay nám átkag ke Petros o Pulosay sangat ent. Báwar esh ent, hamá wahdá ke Markás, Petros o Pulosay hamráhiá Rumay shahrá nendók butag, áiá pa Rumay shahray jahmenendén darkawmán é ketáb nebeshtag. Lahtén zántkáráni hayál hamesh ent ke Markásá, Issáay bárawá bázén yáddáshté cha Petrosá zortag.
Chárén Enjiláni tahá, Markásay ketáb cha á degarán gwandhter ent. É ketábá, Issá Masihay Hodáwandi, cha áiay mójezah o hayrán kanókén kárán pésh dáraga bit.
Markásay Enjilá, mardománi démá Issáay áyag, Jalilay damagá áiay tálim o kár, dém pa Urshalimá rawagay wahdá áiay dátagén sar o sój, Urshalimá áiay goddhi rócháni sargwast, mark o padá zendag bayag nebisag butagant.
1
Pákshódókén Yahyáay kolaw
(Mattá 3:1–12; Luká 3:1–18; Yuhanná 1:19–28)
1 Issá Masih, Hodáay Chokkay wasshén mestágay* 1:1 Mestág, bezán wasshén hál, bashárat. bongéj† 1:1 Bongéj, bezán bendát, shoru. o shoruhát.
2 Anchosh ke Eshayá Nabiay Ketábá nebeshtah ent:
Bechár, man wati kásedá cha taw pésar ráha dayán
ke á, tai ráhá tachk o tayára kant.
Hodáwanday ráhá tayár o
áiay keshká rást o tachk bekanét.§ 1:3 Band 2–3, bechár Maláki Nabiay Ketáb, bahr 3, band 1; Eshayá Nabiay Ketáb, bahr 40, band 3.
4 Pákshódókén Yahyá gyábáná záher but o gwánki jat: “Cha wati gonáhán pashómán bebét* 1:4 Pashómán bayag, bezán tawbah kanag. o pákshódi bekanét ke bakshaga bét.” 5 Mardom, cha Yahudiahay sajjahén métag o kallagán o cha Urshalimay shahrá áiay kerrá shotant. Wati gonáháni pashómániesh záhera kort o Yahyáyá Ordonay kawrá pákshódia dátant.† 1:5 É Yahyá at ke pákshódia dáti. 6 Yahyáyá cha oshteray pothán gwaptagén póshák gwará at o póstén kamarbandé lánká bastagati. Áiá, madag o gyábáni bénaga‡ 1:6 Bénag, bezán asal. wárt. 7 Yahyáyá jára jat o gwashti: “Cha man o rand, mardé kayt ke cha man báz zórákter ent o maná é láheki ham nést ke kóndhán bekapán o áiay kawshbandán bebóján. 8 Man shomárá gón ápá pákshódia dayán, bale á shomárá gón Hodáay Pákén Ruh᧠1:8 Hodáay Pákén Ruh, bezán Ruholkodos. pákshódia dant.”
Issáay pákshódi o chakkás
(Mattá 3:13—4:11; Luká 3:21–22; 4:1–13)
9 Á róchán, Issá cha Jalilay damagay shahr Náserahá átk o Ordonay kawrá Yahyáay dastá pákshódi dayag but. 10 Anchosh ke á cha ápá dar áyagá at, disti ke ásmánay dap pach but o Hodáay Pákén Ruh kapótéay dróshomá* 1:10 Dróshom, bezán shekl. átk o áiay sará ér nesht. 11 Cha ásmáná é tawár átk: “Taw mani dóstén Bacch ay o man cha taw báz wassh o razá án.”
12 Hamá wahdá Pákén Ruhá Issá gyábáná rawán dát.† 1:12 É Pákén Ruh at ke Issái rawán dát. 13 Á, tán chel róchá gyábáná mant o Shaytán áiá báz chakkásagᇠ1:13 Chakkásag, bezán ázmáesh kanag, emtehán gerag. at. Ódá jangali jánwar ham gón áiá hór atant o préshtagán áiay hezmat kort.
Chár máhigiray lótháénag
(Mattá 4:12–22; Luká 4:14–15; 5:1–11)
14 Cha Yahyáay dazgir bayagá rand, Issá Jalilá shot o Hodáay bádsháhiay wasshén mestágay jári jat o 15 gwashti: “Wahd átkag o rasetag. Hodáay bádsháhi nazzik ent. Nun pa del cha wati gonáhán pashómán bebét o Hodáay wasshén mestágay sará báwar bekanét.” 16 Issá, Jalilay mazangwarmay§ 1:16 Mazangwarm, bezán daryáchah. lambá* 1:16 Lamb, bezán dámon, kerr. rawagá at ke do máhigiri dist, Shamun o áiay brát Andriás, ke pa máhigiriá wati dám o máhórán gwarmá chér géjagá atant. 17 Issáyá gón áyán gwasht: “Byáét, mani randgiriá bekanét o man shomárá anchosha kanán ke máhig geragay badalá, mardománi delá shekár bekanét.”† 1:17 Delay shekár kanagay maksad mardomán Hodáay ráhá árag ent. 18 Áyán hamá damáná wati dám yalah dát o áiay hamráh butant. 19 Issá ke kammé démá shot Zebdiay chokk, Ákub o áiay brát Yuhannái distant, ke bójigᇠ1:19 Bójig, bezán lánch, yakdár, kashti. neshtagatant o wati máhórán sráchag§ 1:19 Sráchag, bezán dámay dóchag o addh kanag. o sharr kanagá atant. 20 Anchosh ke Issáyá á distant, gwánki jatant. Á doénán, wati pet Zebdi gón kárendahán bójigá yalah dát o Issáay hamráh butant.
Ganókéay jennay kasshag
(Luká 4:31–37)
21 Issá o áiay morid Kaparnáhumay shahrá shotant. Shabbatay róchá* 1:21 Shabbatay róch, hamá Shambeh ent, bezán Yahudiáni kár nakanagay róch. Issá kanisahᆠ1:21 Kanisah, bezán Yahudiáni parasteshgáh. shot o mardomi tálim dátant. 22 Mardom cha áiay dars o sabakán hayrán atant, chiá ke áiá Sharyatay zánógeráni‡ 1:22 Sharyatay zánóger, bezán dini álem o Mussáay Sharyatay zántkár. paymá darsa nadát, gón wák o ehtiáré dars o tálima dát. 23 Hamé wahdá, kanisahay tahá yak mardéá ke áiá jenné per at, kukkár kanáná gwasht: 24 “Oo Issá Náseri! Tará gón má che kár ent? Átkagay ke márá gár o tabáh bekanay? Mana zánán taw kay ay, taw Hodáay gechén kortagén hamá Pákén ay.” 25 Issáyá jenn hakkal dát o gwashti: “Wati dapá bedár o é mardá yalah day.” 26 Jenná á mard sakk pretk o zhámbalént§ 1:26 Zhámbalénag, bezán chizzéay gerag o pa trondi sorénag o larzénag. o kukkár kanán cha áiá dar átk. 27 Mardomán pa hayráni watmánwatá gwasht: “É chónén habaré? Gwashay nókén tálimé, gón choshén wák o ehtiáré ke jennán ham hokma dant o jenn ham áiay habará mannant.” 28 Dér nagwast ke Jalilay sajjahén kerr o gwarán, Issáyá nám dar áwort.
Nádráháni drahbakshi* 1:28 Drahbakshi, bezán dráhi o salámatiay bakshag, Arabi o Pársiá “shafá”.
(Mattá 8:14–17; Luká 4:38–41)
29 Issá, anchosh ke cha kanisahá dar kapt, Ákub o Yuhannáay hamráhiá Shamun o Andriásay lógá shot. 30 Ódá, Shamunay wassig tapig at o nepáday sará waptagat. Anchosh ke Issá lógá átk, nádráhay hálesh dát, 31 Issá nazziká shot, áiay dasti gept o pádi kort. Áiay tap kapt, á wassh but o áyáni hezmat kanagá lagget.
32 Bégáhá rónendᆠ1:32 Rónend, bezán hamá némag ke rócha nendit, magreb. rand, mardomán wati nádráh ke áyáni nyámᇠ1:32 Nyámá, bezán myáná, darnyámá, tahá, tóká. ganók o jenni ham hastat, Issáay kerrá áwortant. 33 Shahray sajjahén mardom, lógay dapá mocch butant. 34 Issáyá bázéné dráh kort ke dhawl dhawlén nádráhián geptagatant o bázén ganókáni jenni kasshetant, áiá jenn pa habará naeshtant, chiá ke jennán á pajjáha áwort.§ 1:34 É jenn atant ke Issáesh pajjáh áwort.
Enjilay wasshén mestágay jár
(Luká 4:42–44)
35 Sabáhá máhallah ke angat tahár at, Issá pád átk, cha lógá dar kapt, yak gestá* 1:35 Gestá, bezán yak kerr, dur. o panáhén jágahéá shot o dwái kort. 36 Shamun o áiay hamráh pa Issáay shóházá dar kaptant. 37 Wahdé Issáesh dist, gón áiá gwashtesh: “Sajjahén mardom tará shóház kanagá ant.” 38 Issáyá gwasht: “Byáét dega némagéá berawén, dém pa kerr o gwaray halk o hankénán, tánke man wasshén mestágá berasénán, chiá ke man pa hamé kárá átkagán.” 39 Gorhá, sajjahén Jalilá tarr o tábi kort, kanisaháni tahá wasshén mestágay jári jat o jenniáni jenni ham kasshet o dar kortant.
Garriéay drahbakshi
(Mattá 8:1–4; Luká 5:12–16)
40 Yak mardé, ke áiá syahgarr† 1:40 Asligén Yunáni zobánay labz, pa syahgarr o bag, bezán jozám o pa dega tahr tahrén garrán ham kár bandaga bit. at Issáay kerrá átk, kóndhán kapt, dazbandi kort o gwashti: “Agan taw belóthay, maná wassh o palgár korta kanay.” 41 Issáyá áiay sará sakk bazzag but, dasti shahárt o á mardi dast per mosht o gwashti: “Mana lóthán, wassh o palgár bay.” 42 Hamá damáná á mard cha syahgarrá dráh but. 43 Roksat kanagay wahdá, Issáyá kaddhan‡ 1:43 Kaddhan, bezán mohrén tákid, hokm. kort o gwasht: 44 “Hozzhár bay. Hechkasá cha é habar o hálá sahig makan. Bale beraw, watá dini péshwáyá pésh bedár o pa wati pák o palgáriá, hamá korbánig ke Mussáay Sharyatá nebisag butag, hayráti bekan tánke pa áyán gwáh o sháhedié bebit.” 45 Bale á mard ke cha ódá dar kapt, wati drahbakshiay habari har jáh sheng o tálán kort. É sawabá, nun Issáyá sarzáherá, hech shahréá shota nakort, dasht o gyábán o gestáén jágahána tarret. Bale angat mardom cha har némagá áiay kerrá átkant.
*1:1 1:1 Mestág, bezán wasshén hál, bashárat.
†1:1 1:1 Bongéj, bezán bendát, shoru.
‡1:3 1:3 Gwánk, bezán borzén tawár.
§1:3 1:3 Band 2–3, bechár Maláki Nabiay Ketáb, bahr 3, band 1; Eshayá Nabiay Ketáb, bahr 40, band 3.
*1:4 1:4 Pashómán bayag, bezán tawbah kanag.
†1:5 1:5 É Yahyá at ke pákshódia dáti.
‡1:6 1:6 Bénag, bezán asal.
§1:8 1:8 Hodáay Pákén Ruh, bezán Ruholkodos.
*1:10 1:10 Dróshom, bezán shekl.
†1:12 1:12 É Pákén Ruh at ke Issái rawán dát.
‡1:13 1:13 Chakkásag, bezán ázmáesh kanag, emtehán gerag.
§1:16 1:16 Mazangwarm, bezán daryáchah.
*1:16 1:16 Lamb, bezán dámon, kerr.
†1:17 1:17 Delay shekár kanagay maksad mardomán Hodáay ráhá árag ent.
‡1:19 1:19 Bójig, bezán lánch, yakdár, kashti.
§1:19 1:19 Sráchag, bezán dámay dóchag o addh kanag.
*1:21 1:21 Shabbatay róch, hamá Shambeh ent, bezán Yahudiáni kár nakanagay róch.
†1:21 1:21 Kanisah, bezán Yahudiáni parasteshgáh.
‡1:22 1:22 Sharyatay zánóger, bezán dini álem o Mussáay Sharyatay zántkár.
§1:26 1:26 Zhámbalénag, bezán chizzéay gerag o pa trondi sorénag o larzénag.
*1:28 1:28 Drahbakshi, bezán dráhi o salámatiay bakshag, Arabi o Pársiá “shafá”.
†1:32 1:32 Rónend, bezán hamá némag ke rócha nendit, magreb.
‡1:32 1:32 Nyámá, bezán myáná, darnyámá, tahá, tóká.
§1:34 1:34 É jenn atant ke Issáesh pajjáh áwort.
*1:35 1:35 Gestá, bezán yak kerr, dur.
†1:40 1:40 Asligén Yunáni zobánay labz, pa syahgarr o bag, bezán jozám o pa dega tahr tahrén garrán ham kár bandaga bit.
‡1:43 1:43 Kaddhan, bezán mohrén tákid, hokm.