JEREMAYA
Poropeta akali Jeremaya lenge doko baa ee kana 620 W.K. dopale dokopa piso pyuo pao 600 W.K. dopale dokopa wambu dupwa lasaka pyuo lao kareya. Anatunya wambu dupwa lamaiyamo dokopa nakamana yulu koope dee Anatu kaepala bange wakale dupwa kingi leyaminyipape dokona lao moŋo nyuo range kokwa soo kararami dopa lao repe repe lao kareya. Yuu Bapilone range wambu dupwa nakamana kiŋi Nepukatenesame yuu taone mupwa Jerusaleme dokona epo pyao ralipala nyuo pyuo tembole anda andake doko kiso pyao Juta wambu malu nakamana kiŋi dokomoo yuu Bapilone dokona lanyuo peyamo arome pii doko akali Jeremaya dokome lapala ee kana malu mee epo papeyamo enakana range kandeya. Jeremaya baame wambu lanyuo peyami dupwa yuu rakyame dokopa kamba epo namwana yuu taone mupwa Jerusaleme dee range waso pirami lao nolako leya.
Buku dake mendaki sipyamopape pii kisima liti pyuo pyasi palamo.
1. Rombo 1-25 Anatumi kiŋi Josaya lengepe kiŋi Jiyoakwimi lengepe dee kiŋi Setakaya lengepe dupwame Juu wambu iso kareyaminyipa Anatumi nakamape wambu peparaepe waili pii lamaiyamo dusipa pyasi palamo.
2. Rombo 26-45 Jeremayana pepa pyao nyisingi akali Baruku lenge banya arome pii lapo palyo Jeremayana nolako leya pii lapo palyo dee Jeremayana yulu andake lapo dakena pyasi palyuo pilyamo.
3. Rombo 46-51 Dakena Anatunya waili pii yuu rara wakale wakale wambu dupwana lao pyasi palamo.
4. Rombo 52 Arome pii kuki yuu Jerusaleme isa peyamo dokopa wambu malu anjepala yuu Bapilone dokona lanyuo peyaminyi dokona lao pyasi palamo.
Jeremaya baame banya wambu dupwa koo pyuo kareyaminyipa Anatunya kote pii lara lamaiyuo yulu piyamopape wambu dupwa kando mona reto karapala yulu doko epe naso piya. Buku dakena pii malu dokona Anatumi banya kote pii lao Jeremaya nembena leyamosa Jeremayana mona dokona Anatunya pii isare rele leyamosa Jeremaya baame kunjalana saka naya. Buku dakena pii rungi rungi pyao Jeremayana randa nyingi gii epo pao otaramopa enako dokopa rengyana pira, leya. Yuu rengya dokopa Anatupa banya wambu dupwa dee kana minyaraminyipa Anatunya mana lenge akali dupwa kara naraminyipape wambu dupwana mona dokona Anatunya pii doko pyasi palyaramo dokopa nakama Anatu laramuli pyuo maso piramiko, leya (rombo 34:31-34).
1
Poropeta Akali Kingi Jeremaya Lenge Dokome Pii Leyamo Doko
1 Pii dapwa akali Jeremaya Ilikayana ikinyingi doko pii leyamo dupwa palamo. Ilikaya baa yuu taone Anatote lenge akali Benjamena yuu lili dokona purisi yulu pyuo karenge. 2 Akali Josaya Amonena ikinyingi doko Juta wambunya kiŋi ee kana akalisa ipisu rema kareyamo dokopa Kamongo dokome Jeremaya keta pii lamaiya. 3 Dee Josayana ikinyingi Jiyoakwimi baa kiŋi kareyamo dokopa Kamongo dokome kambako pii lamaiya. Dokopa Kamongome baa enakana yuu malu mee pii lamaiyamo pao Josayana ikinyingi akali Setekaya dokome isiyamo pao ee kana akalisa ipisu mendaki ingiya. Ee kana dokona kana kingi paki dokopa Jerusaleme wambu dupwa karapusi ingyuo puu maiyuo nyuo peyami.
Kamongome Jeremaya Baa Kee Leya
4 Kamongo dokome namba Jeremaya langyuo lao, 5 Nambame emba endakinyinya ingi anda dokona wane ingyalana karo dokopa wambo rombo palyiyu. Dee emba manjipa nayaminyipa wambu rara dupwana peparae emba poropeta karare lao wambo rombo palyuo kaeyo, leya.
6 Dopa leyamosa nambame isingi lao, Kamongo Mupwa Andake Wakasa, namba wane ene. Namba pii lalana saka nange, leyo.
7 Dopa leyonopape Kamongome soo nembo lao, Emba wane ene karo laa napala pao nambame lape leto pii dupwa wambu keta lamaiyakape, leya. 8 Dokona lao namba embapa role pyao kyawa minyaroŋo nakamame mende pirami lao paka nyii napipi. Namba Kamongo dokome leto, leya.
9 Lapala enakana Kamongo banya kingi doko pyasinju lapala nambana kambu doko minyandeya. Minyandapala namba langyuo lao, See! Nambame pii emba langilyu dupwa emba kaeya nao lape. 10 Epapu dakepa nambame emba pawa jepala yuu muu wakale wakale dupwa kiŋinya yuu wakale wakalena iso karape lao rombo palyipunu pilyamoŋo. Pyao lalyinyi nembo pyao kokwa sinyi nembo pyao rakapyanyi nembo pyao ralyuo neta kupinyi nembo apa yuu pyao dee minyalyuo pyuo pyuo pupi lao rombo palyilyu kande, leya.
Anatumi Jeremaya Pii Repa Repa Lama Pyuo Lasaka Piya
11 Lapala Kamongo dokome namba piso soo, Jeremaya emba aki kandelepe? leya.
Dokopa nambame isingi lao, Isa mende kingi amene lenge dokona wangya doko kandelyo, leyo. Ipurunya pii dokona kingi amene doko iso kando karenge kuki dopale lenge.
12 Dokopa Kamongo dokome lao, Emba kapa letene. Nambana pii dupwa kinyi angingyuo epelyape lao iso kando karo, leya. Ipurunya pii dokona kingi amene doko iso kando karenge kuki dopale lenge.
13 Dokopa enakana Kamongo dokome namba kamba pii langyuo, Emba dee bange aki kandelese? lao namba piso siya. Dokopa nambame isingi lao, Namba kandelyo doko yuu dulurena sanapenge mendena ipwa bolo pyao karamo doko daerena ingyuo kulimbuo palinya pilyamo, leyo.
14 Wambu rara peparae yuu dakena palaminyi dupwa keta randa doko ipwa ingyuo bolo pyao dorena piso nakama keta epara. 15 Renge dokona wambu dorena ingyuo palaminyi rara dupwa peparae epena lao nambame kee leto. Nakamana kiŋi dupwame yuu Jerusaleme kana kamena kambu dokona nakamana kiŋinya petenge isa dupwa nyuo reto dee kana kame dokona awali lao reto pirami. Pipala Juta yuu menge taone karenge dupwana opetaeko awali lao pirami. 16 Nambana wambu dupwame yulu koo pyuo namba kame sepala yaki nyilyaminyi dokona nambame nakama randa mairu. Nakamame anatu wakale dupwa mena pyao kiso mailyaminyi dee mee bange anatu lao kingimi wasapala lakandelyaminyi. 17 Jeremaya, rapa rapa pipala namba emba pii peparae lape lao pii langilyu dupwa nakama pao lamaipi. Epapu nakama kando paka napipi. Epapu emba pakare ramo nakama pipya role kararaminyi dokopa emba pakanyi pyambwasasaroŋo paka napipi. 18 Jeremaya, emba see. Wambu peparae yuu dakena range dupwamepe Juta kiŋi dupwamepe akali mupwa dupwamepe purisi dupwamepe dee wambu dupwamepe emba kando pimwaiyuo larami. Dopa laraminyipape yuu taone porai ane isame pingi dee kone kaname kana kame awali lao pingi porai dopale ingyuo wambu dupwa nyuo isa palyuo emba karalase lao nambame porainya renge jilyu. Nakamame emba nyuo isa palya narami. Nambame emba role karo konambe ingyuo alya minyaronopa karare. Namba Kamongo dokome leto, leya.