1 Nambana Anatu emba kiŋi ingyuokarene doko embena yulu andake dupwa nambame lao panaro.

Nambame embena kingi dokona ange lao karalu kararo.

2 Yuu peparae nambame ateŋa lao embapa sangyu lao kararo.

Nambame embena kingi dokona lakando puu paro.

3 Kamongo doko wakasa ingyuo dokome kamame ulipili lakandapengele ingilyamo.

Baa mupwa wakasa ingilyamo doko mendeme kapa soonyepa nara.

4 Embame piinyi dupwana wane manjo parami dupwame kaeya nao lao puu pao parami.

Nakamame embena yulu keyange porai piinyi dupwana polo lamairami.

5 Akalimi embena neta renge yulu wakasa dokona lao polo lamairami.

Dokopa nambame embena yulu keyange dokona suu pyaokondali pyuo kararo.

6 Akalimi embena yulu porai dupwana aromepyao laraminyipa

nambame emba apa pyuo wakasa dokona polo laro ingilyamo.

7 Nakamame embena yulu elyape pingi dokona lamaiyuo dokopa

emba anjiki pingi dokona lao kenane dupwa pyarami.

8 Kamongo doko baame mona reto sakame kumuo karenge.

Waiya lao imbu singi nyii nao meemona reto puu penge.

9 Baame wambu lapo iki angi angi lao yulu keyange pii nange.

Baame wasiyamo dupwa peparae kondome kumuo nyiso karenge.

10 Wasiinyi dupwa peparaeme Kamongo emba lakandarami.

Dee embena wambu dupwame emba kando sangyu larami.

11 Embame embena kiŋi yulu neta renge dokona lao larami.

Dee embena poraidokona lao laramiko.

12 Dopa pyuo lao dokopa embena yulu andake dokope

embena isingi yulu neta renge keyange wakasa dokope soo nyeramisa pira.

13 Embena isingi yulu doko ota naramopa

emba kiŋi ingyuo karo puu pare.

Kamongo dokome yulu pira letamo dupwapipala kaenge.

Banya yulu pilyamo dupwa peparae keyange ingingi.

14 Baame randa nyerami dupwa nyiso

dee isa parami dupwa nyuo minyalyuo pira.

15 Wasiinyi lete karaminyi dupwame Kamongo emba iki kando karaminyi.

Dee nenge yano pilyamo dokopa embame nenge maingi.

16 Embame kapa naraminyili pyuo maiyuo

dee nakamana yano pilyamo karenge dupwa sikya pinyi pyambungi.

17 Kamongo baame yulu pilyamo dupwa rolae dokonako pingi.

Baa wambunya lao sakame kumuo yulupyakamyuo karenge.

18 Wambu dupwame baa keta kulisa palyuo kee letaminyi dupwa peparae keta

baa repeta karamo.

19 Wambu baa ketae pyambungi dupwana yano pilyamo karenge dupwa maingi.

Baame nakamanaee laminyi doko soo nyepala pyuo nyisingi.

20 Mendeme baapa mona retaminyi dupwa peparae nyuo arapunya palyuo

baapa koo pingi dupwa peparae kokwa sinyi nembo pira.

21 Nambame yuu peparae Kamongo doko lakandaro.

Kimbu karenge kata papingi dupwa peparaeme banya kingi poo pyasi dokona lakando karalu karena.