1 Kamongo baa elyapeko doko karapyamopa

banya mona retenge doko kulisa ingyuo silyamo dokona

baa ange lao karamana.

2 Pii wamba ange lamwa dusipwako nyepala baa lakando dee larami ingilyamo.

Nakama baame kyawa lete nyiyamo wambu dee yanda pimwai nenge rekya lao nyiyamo wambupi dupwame

baa keyange ingyuo banya monaretenge kulisa ingyuo pelyamo lao lakandapa pyuo kararami.

3 Nakama dono yuu muu wakalemana neta pyakaenge neta yalyingi donorena dulurenape

piso nyuo epeya.

4 Nakama lapo yuu muiyane kata see nangedokona paeyo karo

yuu taonena palyuo kararama lao panya kata koto saka nayamipya.

5 Dopa pyuo karo nakama lopome kumuo ipwa nano pipala suu pyao kareyami dupwa

mende pii naraŋa kae lapala yaki nyuo kaeyamipya.

6 Dopa pyuo karapala nakama rangena randa nyiyaminyi dokona

Kamongome nyisinya lao kyakale leyamisa nyisiyapya.

7 Baame nakama taone palyuo kararami kata rolae dokona nyuo nembeyapya.

8 Nakamame Kamongo banya mona reto puu penge dokona baa ange lao dokopa

yulu keyange nakama keta pyakamyuo karamo dupwana baa ange lapenge ingilyamo.

9 Baame ipwa nano pilyamo karelyaminyi dupwa sikya pinyi pyambuo

dee lopange dupwa keyange dupwame iki pyasu makaro sinya lenge.

10 Lapo dupwa iminjingi dokona eŋa paa nayamo

sanepuumi kiimbwasi randa nyuo kareyami.

11 Anatu Porai Wakasa dokonalowa kamba lenge ingyuo

dopa pinya dapa pinya lao mana lalamo kata doko yaki nyuo karapala randa nyiyami.

12 Nakama yulu marakai pipala yongo kisinyi nembeyami.

Nakamame isa peyaminyi dokopa mendeme nyisa naya.

13 Dopa pyuo karapala nakama rangena randa nyiyaminyi dokona

Kamongome nyisinya lao kyakale leyamisa nyisiyapya.

14 Baame iminjo eŋa paa nayamo kareyaminyi dokona piso nyuo epeya.

Baame puu sane dupwa pyao rokao sinjimu inginyi nembo nyuo epeya.

15 Nakamame Kamongo banya mona reto puu penge dokona baa ange lao dokopa

yulu keyange nakama keta pyakamyuo karamo dupwana baa ange lapenge ingilyamo.

16 Baame kambu kana poraimi dowa wasisi dupwa pyao lalyapala

aene isa dupwa pyao muu pinyi retenge.

17 Wambu lapo kopyali ingyuo nakamana koo piyaminyi dokona

anga pyao dee randa epeyamo doko yasuko neyami.

18 Nakama nenge dupwa ipyapala naa napala

repeta kumuo panya piyami.

19 Nakamana randa epeyamo dokona mona randapala

Kamongo lamaiyuo nyisinya leyamisa nyisiya.

20 Banya dopa pyuo pinya lao lamaingi pii dokome pyuo nyepala

malu anda palenge dokona pyuo nyiya.

21 Nakamame Kamongo banya mona reto puu penge dokona baaange lao dokopa

yulu keyange nakama keta pyakamyuo karamo dupwana baa ange lapenge ingilyamo.

22 Nyisiyamo dupwana peparae suu pyao banya kingi lakandelyamano lao dokopa

sangyu lao mena pyao kiso maiyuo dee kenane rae maiyuo pingi dupwa pyao kararami.

23 Wambu lapo ipwa sipu yulu pingi dupwa kota pete dokonako

yulu pyuo yole nyuo nao paleyami.

24 Dupwame Kamongome dopa pyuo yulu andake doko piyande silyamo lao

banya kingi mona doko ipwa kotana paleyamo kandeyami.

25 Baame dopa pinya leyamosa porambaiye andake doko pyaka soo minyapala

ipwa kota doko minyuo kasakole minyinyi reteya.

26 Ipwa sipu dupwa kota petena ketae sepala paleta isa peyamosa

kumulyamano lapala mee kikurenge kareyami.

27 Nakama ipwa biya napala pili lao lukumao sepala

nakamana yulu mora petenge renge doko mee inginyi nembeyami.

28 Nakama rangena randa nyiyaminyi dokona

Kamongome nyisinya lao kyakaleleyamisa nyisiyapya.

29 Baame ipwa kotana raiya pambake doko lambo lao serao

dee pete kasakole minyuo pyakalya pyakana pingi doko pyai naopiya.

30 Ipwa kota lambo lao siyamo dokopa rae maiyami.

Nakama epana suu pilyaminyi kipwa kipwa dokona lanyuo epo peeya.

31 Nakamame Kamongo banya mona reto puu penge dokona baa ange lao dokopa

yulu keyange nakama keta pyakamyuo karamo dupwana baa ange lapenge ingilyamo.

32 Anatunya wambu malu palyuo larami panda dokona baa kamame wakasa ingilyamo dokona lao lamairami.

Dopa pyuo dee lita akali wato lenge dupwa pisarami dokona lenge kambu sera dokona karo lakandarami.

33 Kamongome ipwa pona dupwa sokwao kee maro lao

dee guu lenge dupwa pyakalyuo epa nana lao piya.

34 Baame wambu koo pingi dupwa yuu dokona paleyaminyisa kandapala

yuu amenge pingi dupwa nyuo kwaeyo mee ketange pyanyi nembeya.

35 Baame yuu muiyane dupwa nyuo ipwa pete sinyi pyambuo

dee oo lasi dupwa nyuo ipwa guu lanyi peeyo piya.

36 Baamelopange wambu dupwa yuu dokona yuu nyuo palyuo

taone andake palyuo kararami doko pyuo wasinya lao piya.

37 Nakamame waingi dupwa randa laoisa girapo dupwa wara pyuo piyaminyi dokopa

angi ando jingi dupwa kakanapiyamo lyuo nyiyami.

38 Baame banya wambu dupwa elyape keta pisiyasa wane wai kisiya.

Dee nakamana mena bulamakao dupwa wai kiso andakyuo piya.

39 Wambu Anatunya wambu pyao isa palyuo kilya kandele lao

isa nenge kara nange dokome suu leyamisa yasu nao karenge dokopa

40 Anatu baame nyisu petenge wambu dupwa epe kanda napala

yuu muiyane kata see nange dokona ralinyi palyiyasa mee ralo papyuo kareyami.

41 Baame pendewa mona kondo petenge dupwa kiiramo nyepala

ree paludoko mena ingyuo wai kisinya lao andanyi nembeya.

42 Dokopa rolaepingi dupwame doko kandapala rae mailyaminyipa

koo pingi dupwa muu rakaro singi.

43 Wambu mona palenge dupwame dake doko mende lyamolao suu pyao karena.

Dopa pyuo Kamongona kare kare soo mona retenge dokona suu pyapala mona kumuo maiyuo karena.