1 Nambame yuu peparae Kamongo kando ange lao kararo ingilyamo.

Baa kaeya nao lakando karalu kararo.

2 Baame yulu piyamo dupwana suu pyapala lakandaro.

Randa nyuo koo keta palaminyi dupwa sepala rae maiyuo parami.

3 Kamongo baa wakasa ingyuo karamo lao namba lamailyu dokona lamaiyuo

banya kingi doko role pyao lakandamanale.

4 Nambame Kamongo lao loma soo piso siyunu dokopa dokona isingi langiya.

Nambana paka renge dupwana baame namba kiiramo neta nyiya.

5 Koo keta palyaraminyi kararamidupwa baa kandalyuo kando rae mairami.

Nakama isa nembenge dupwame dee laa nalu nao naraminyi kararami.

6 Range nyisarami ingya nange dupwa baa nyisinya larami dokopa nyisingi.

Baame nakamana randa epelyamo dupwana kyawa minyuo nyiso karamo.

7 Kamongo banya pii rape rape lao minyingi dupwa iso karo

banya aŋala dokome randa epelyamo dokopa kyawa minyuo karenge.

8 Kamongo doko baa apa pyuo keyangelao emba range kotapala apiyakalepe lao nakanjo soo kandare.

Kamongo baakando nyeparamo doko kyawa minyara panda doko nyilyamo doko rae maiyuo karenge.

9 Banya wambu dupwa banya pii rape rape lao minyuo karena.

Dopa pyuo karaminyi dupwa yano pipyamo dupwa nakama keta palira.

10 Mena laene dupwa nenge yano pilyamo dokopa mee lopome kumungi.

Dopa pingi dokona wambu banya pii warombo singi dupwa mende yano pyuo yangya nange.

11 Wanyane wambu nambana puu minyingi dupwa epo namba apa letepe lao sela ipupwa.

Dokopa apa pyuo Kamongo ketae pyambuo kararami lao mana langiru.

12 Emba raeme kumuo karapuli yaka lao suu pilipi daa?

Emba karo yaku napala rae maiyuo kumalana suu pilipi daa?

13 Doko ramo doko kyambo pii laa nalu nao napala mata kando lenge dupwa yama pyuo minyuo kaeyare.

14 Koo dupwa mata maiyuo kaeyo keyange pipi.

Mona kyuu lao singi renge dokona reoe lao yulu poraiyuo pipala koto nyere.

15 Kamongome waso rolae pingi dupwa kandokondali pyuo kandaro karo

nakamana mona rando lenge doko soo karenge.

16 Dopa pipyamopape koo pyuo karenge dupwa baame kando epe nasepala mata maiyuo karenge.

Renge doko nakama kumarami dokopa wambu dupwame kame soo kaena lao pingi.

17 Akali rolae pingi dupwa Kamongo kyakale lenge doko sakaro karenge.

Randa epelyamo dupwa baame kunjinyi nembo nyingi.

18 Wambu baa rangena yulu dokona uki minyuo pelyasa dokona isa pwuamano lao sepala mona nembenge dupwa keta Kamongo doko repeta karenge.

Dee keyange eparali dupwa isa pwuamo lao suu pilyaminyi dupwa baame minyalyingi.

19 Akali keyange doko keta randa malu nyilyamopape

Kamongo dokome baa nyisingi.

20 Kamongo baame akali keyange doko koo keta paa nana lao rapu pyuo kararamopa

banya kuli dokona mendakipi koko pyaa nara.

21 Koo pinginya renge dokome yulu koo pingi dupwa pyao kumakara.

Wambu yulu rolae pingi dupwa kando awa naraminyi wambu dupwa randa nyerami.

22 Kamongome banya kendemande ingyuo dupwa kyawa lete nyingi.

Baa keta pao alya minyingi dupwa koo keta pali nana lao reto karenge.