1 Kamongome Mosese lamaiyuo lao, Kana wambo dopale ingyuo embame kana lama kunjo wasape. Wasarene dokopa kana wambo embame pyao poro leene dolapona pii paleyamo dupwa nambame dee kamba pyao retaro. 2 Rakya yangama rapa rapa pipala yuu kyau Sainai dokona epo ketae nambapa role pyao kararamba. 3 Wambu mende role pyao epa nara. Dee yuu kyau dupwana mendasape wambu mende kara narami. Mena sipisipipi panda mena bulamakaope dupwame yuu kyau wangu kipwa kipwa isako nao pii nana, leya. 4 Dokona lao Moseseme kana lama kamba kunjo wasiya. Wasapala Kamongome lamaiyamuli pyuo wamba yangama dokopa yuu kyau Sainai dokona soo pulyuo peya.

5 Dokopa Kamongo baa kopa rakapana isa epo dokona baapa role kareya. Karo dokopa banya kingi poo pyasi Kamongo doko leya. 6 Dokopa Kamongome Mosesena lenge kambusa papala kee lao lao, Namba Kamongo doko Anatu kondome kumuo nyiso karenge. Dopa pyuo karo dokopa namba waiya lao imbwa nange. Dee namba yaki nyii nao mona retenge renge andake doko nakama keta palyingi. 7 Nambame nakamana para pyasi dupwana mendeme mende manjipa pyuo penge ama malu soo kaeyo dupwa keta lalu lao leyonde pyuo pyuo koo pingi peparae kame sakamyuo karenge. Dopa pirunupape endangi rakangepe koo piraminyi dokona palyuo nambame nakamana ikinyingi wanengepe apusingipi kauwangepe dee dupwana para pyasi wambu rara lama manjiraminyi dupwape randa malisa nao mairu.

8 Mosese baa waiya lao yuu dokona wapambu pii pyaro piso Anatu lakandeya. 9 Lakando baame lao, Kamongo embame namba kando angi rae mairi ramo doko namwa pipya emba role pyao mona ipu lao piso silyu. Wambu dapwa mona kana pokolyaminyipape embame namwana koo peparae nyuo kame sakapala namwa emba rangena wambu ingyuo manjo nyepe, leya.

10 Leyamo dokopa Kamongome Mosese lamaiyuo lao, Epapu nambame Isaraele wambu dupwa keta kana minyuo lalu lao lenge pii doko retelyo. Nambame yuu muu dakenape mendasa wambu rara palaminyi dupwa ketape yulu pii nangende Isaraele wambunya lenge kambu dokona piru. Nambame yulu mende wambu kando yamarangyuo kararaminyi doko nakamana lao pyakaro dokona wambu peparaeme namba Kamongo dokome aki yulu andake lapo pilini lao kandarami. 11 Nambame nakama epapu mawa pii jilyu dupwa warombo soo karalapape. Nakama paraminyi dokona nambame wambo pao Amo rangepe Kenane rangepe Iti rangepe Perasi rangepe Ipi rangepe dee Jepusi rangepe peparae neta pyao ralinyi nembaro. 12 Kando pupwape. Papala nakama yuu dokona range wambu dupwa pipya pelyaminyi pii lalu lao laa nalapape. Dopa pirami ramo nakama randa nyuo koo keta pao konena lyakaro karele lasarami. 13 Dopa pyuo kara nao nakamana nenge kiso maingi kana pyare dupwa lalyuo nembalapape. Nakamana isa pote poo pyasi lenge dupwa pyao lalyalapape. Lalyapala dee nakamana isa lapo kando Asera enda anatu lenge doko pyakepo muu muu pinyi nembo pipwape.

14 Nakamame anatu wakale lapo lakanda nalapape. Namba Kamongo dokome nambana wambu dupwa yulu kopetame dopale dupwa pinya lao yaki nyii nao nakama nambana iki ingyuo karamili yaka lao suu pilyu. 15 Doko wambu dupwame mee bange anatu lenge doko mena pyao kiso mainya lao nakama dokona role pyao yalya kando pisala ipupwa lao piso seraminyi dokopa wambu dupwana anatu nenge kisaraminyi doko walu lapala nyuo nasaramiŋi dokona yuu range wambu dupwa kando pii lalu lao laa nalapape.

16 Dokona nakamana ikinyingi dupwame yuu wakale range enda dupwa nyerami ramo enda dupwame nakama kata koo dokona lanyuo paraminyisa nakamame namba angi suu pyaa napala mee bange anatu kyambo lenge dupwa lakandarami ingilyamo.

17 Nakamame kana golope kulingipi dupwame mee bange anatu lao wasapala lakanda nalapape.

18 Nakama Borete Isi Pyambwa Nange Nenge Nenge yuu gii doko minyuo karalapape. Karapala nambame langiyunuli pyuo nakama borete isi pyambwa nange doko kana Apipi dokona yuu yanda ipingi dusipana narami. Kana Apipi dokona nakama yuu Isipi yaki nyuo epeyaminyi dokona ingyuo narami.

19 Nakamana wane ane mupwa manjiraminyi peparaepe bulamakao kali mupwape mena sipisipipinya kali mupwape manjiraminyi dupwa peparae nambana ingyara. 20 Dopa piramopape nakamame mena donge wambo mandenge dupwa ropo pyao nyuo mena sipisipi ikyane dupwa panda nyuo kiso jerami. Dopa pyuo kiso jii narami ramo doko dongena mange dupwa minyuo roo pyarami. Dopa pipala nakamana wane wambo mandenge dupwa ropo pyao range nyerami. Dokona mendeme nenge kiso jii napala mee nambana arapu dokona epo maro laa narami.

21 Dokona nakamame yulu pirami lao yuu gii pakinyamange silyamo. Sipyamopa yuu gii yanda ipingi dokona yulu pii nalapape. Dee yuu ape ape pingi dokopape witi jingi lyingi dokopape yuu gii yanda ipingi dokona kamame pii narami.

22 Nakamame witi jingi kanda soo mupwa lyuo nyeraminyi dokopa wambu nenge nao nyuo malu palyingi doko yaki nyii nao minyaro karalapape. Karapala nakamana isa jingi poo relyamo lyuo anda kauwa dokona piso nenge nenge yuu gii doko minyuo karo pipwape.

23 Ee kana yaka lao yuu gii rema larapu nakamana akali dupwa peparaeme namba Kamongo doo Isaraele wambunya Anatu lakandarapu pinya. 24 Nambame nakamana lenge kambu dokona wambu rara dupwa pyao ralinyi nembaparono dokopa nakamana yuu doko konda pyuo andake ingyakaro. Dokopa nakama nenge nyuo malu palyuo naraminyi yuu gii rema dusipana mendemepe nakamana yuu doko nyuo isa palyuo anamasi minya narami ingilyamo.

25 Namba mena pyao kiso jeraminyi dokopa nakamame borete isi pyambwange doko role pyao kisa nalapape. Dee Pasopa Nenge Nenge yuu gii dokona mena pyao kisaraminyi dokona mena injisipi rakya yangamana lao mende reta nalapape.

26 Dokona ee kana yaka lao witi jingi mupwa kanda soo lyeraminyi dupwa Kamongona anda dokona minyuo ipupwape. Dee mena sipisipi ikyanepe mena meme ikyanepe kisaraminyi dupwa endanginya anju ipwange kamuo nyepala pyambuo kisa nalapape, leya.

27 Lapala Kamongo dokome Mosese lamaiyuo, Pii dasipame nambame embape Isaraele wambupi pipya kana minyuo lalu lao leto dokoŋo pyao retape, leya. 28 Dokopa kukwa yuu gii akalisa kisimako korakama yuu gii akalisa kisimako dusipana Mosese baa nenge ipwape naa nao Anatupa role pyao kareyambi. Dokopa baame pii kana minyuo lalu lao lenge mawa pii akalisa dusipa kana para dolapona pyao reteya.

29 Mosese baa yuu kyau Sainai dokona karo mawa pii akalisa pyasi palenge kana para lama soo lupyuo peya. Peyamo dokopa baa Kamongopa pii lao kareyambinyi dokome banya lenge kambu doko yanga paupau leya. Leyamopape baa soo gisa naya. 30 Dopa piyamopa Eronemoo wambu dupwa pipya Mosesena lenge kambu doko yanga paupau lao lepo lepo piyamo doko kandapala nakama repeta panya pakayami. 31 Dopa piyamopape Mosese nakama kee leya. Leyamo dokopa Eronemoo Isaraele wambunya akali mupwa dupwa pipya baa kareyamo dokona peyami. Peyaminyipa Moseseme nakama pii lamaiya. 32 Enakana dokopa wambu peparae Mosese kareyamo dokona sukusa sukusa pyuo epeyami. Dopa piyaminyipa Kamongome yuu kyau Sainai dokona mawa pii maiyamo dupwa peparae wambu dupwa lamaiya. 33 Mosese baame wambu dupwa pii lamaiyuo otapala dokopa komau mendeme banya lenge kambu doko yambe piya. 34 Yuu lapo Mosese baa Kamongona komau anda dokona Kamongo pii lamaila papapu dokopa lenge kambunya komau yambe pingi doko neta nyingi. Dee baa kamanda epo dokopa Kamongome pii lamainya lao lamaingi dupwa peparae Isaraele wambu dupwa lamaipa pingi. 35 Dokopa wambu dupwame banya lenge kambu doko yanga paupau lao lepo lepo pilyamo kandenge. Dokopa banya komau dokome lenge kambu yambe pingi doko pyaro karelyamopa pao yuu gii mendepa Kamongo pii lamaila panya dokopa nyisa nyingi.