1 Kamongo emba yuu peparae namwanaanda angingyuo karenge.

2 Yuu kyau dupwa wasapa nao karowape

dee yuu muu peparae ingyalana karowape

Anatu emba letena renge palyuo Anatu ingyuo karalu karengepya.

Dokoko Anatu ingyuo karo puu parepya.

3 Emba akali dupwa siyamo nyiinyi mare dokona range pao sinya leepya.

Embame dee range alowa pyuo yuu inginyi pyambuipya.

4 Ee kana taosande dupwa embame kandelene dokopa mee yuu gii mendaki ingingipya.

Kwuaka yuu gii pupya kandapi dopale ingingipya.

Yuu gii mee kukwamuu dopale ingingipya.

5 Embame akalinya karenge gii doko pyarapanyi nembengepya.

Kumulyaminyisa karenge gii dolapo mee kombeyame ingingipya.

Nakama rambinya pipyae raiya doko mee yangama kondalamuli pyuo andarekara nao kumuo pengepya.

6 Nakama isa jinginya mendeke yangama dokopa rao pee lapala

alemanji olo kope lao kumunginyili pyuo penge.

7 Embena imbu singi dokome namwa pyao kokwa sinyi nembapyamo karamano.

Embena imbu singi wakasa nyipisa namwa pako karamano.

8 Embame namwana koo dupwa kapa kandanyi nembo karene.

Namwana koo yalu pyuo pilyamano dupwa kapa kanda nare ingya nalyamo.

9 Namwa lete karenge renge doko embena imbu singi dokome andare kara nange.

Namwa mee yuu kanda pele pele pipala pengelamo.

10 Ee kana akalisakao pao akalisa yanda ipingi iki dusipa angi karamano.

Kararama ingilyamo dee namwa porai ingyuo kararamande ramo doko ee kana akalisa mange lama ingyuo kararama ingyara.

Dopa pyuo kararamanopape dolapona angi mende ingya napala mona nembengepe dee randape dupwanako mapyaramo kararamalyamo.

Dopa pipala andare kara nao otarama ingilyamo.

11 Emba dopa pyuo renge palyuo imbwualene lao angi apimi soo pakana palyuo silyase?

Embena pakao imbwange renge minyuo epenge doko apimi pakame kumapala soo otengese?

12 Yuu gii langa andare see naralyamo lao mana langirinyipa

mona palenge akali ingyuo soo manjo karamwali yaka.

13 Yuu gii akipare embena imbu singi doko mee serase?

O Kamongo, embena kendemande dupwa kando sakao karape.

14 Yangama peparaena embena mona reto karalu karenge renge dokome pakapyakape.

Dokopa kenane pyao raeme kumuo karalu kararama ingilyamo.

15 Namwana ee kana randa nyepala monarena londeta ingyuo kendao karalu kareyama kande dokona suu pyao

rae maingi renge doko dopale manda manjo jepe.

16 Namwa embena kendemande dupwame embenayulu doko porainya renge kuiyuo pirinyipa kandenale.

Namwana jingi parape dupwame embena neta rengena yulu porai doko kandenale lao piri.

17 Namwana Kamongo Anatu embena elyape renge doko namwa keta palena lapala

pirama laramano dupwa peparaena kapa palyinyi pyambwakape.