1 Akali mendeme enda nyepala piso enakana koo mende paliramo kandapala nyii nalana suu pyara ramo doko ramanyi nembenge pepa pase doko pyao maipala banya anda yaki nyuo pena lao nembara. 2 Dopa pirasa pao akali mendeko nyera. 3 Nyeramo akali dokome dopako pyuo nyii nalana suu pyapala ramanyi nembenge pepa pyao maipala banya anda yuupi yaki nyuo nembara panda akalingi baa kumara ramo 4 renge dolapo laparaena ingyuo akali wambo nyiyamo nembeya dokome dee kamba baa nyii nara ingyara. Doko enda baa Anatunya lenge kambu dokona poo pyasi ingyuo pisa nange lao suu pyara. Baa kamba range dee nyera ramo dokopa Kamongona lenge kambu dokona koo ingyuo parasa pira. Nakamana Kamongo Anatumi yuu jilyamo dokona yulu koo andake dopale mende pii narami ingilyamo.

5 Dokona akali mende enda ene nyepala dokopa baa yanda singi ami dokona pena laa narami dee gapomane yulu andake dupwa pela paope pii nara. Dopa pyuo baa ee kana mendaki ingyuo yulu yaki nyuo anda karo kaeyara. Dopa piramo dokome etenge rae mainyi pyambwarasa pira.

6 Akali mendeme kana jii lao kee lara ramo maipala dokopa embame lalu lao lao kana doko yano pyakareŋe lao suu pyao kararaŋa banya kenapa pyao injingi kana para lama dolapo jinya lao nyakami nare. Dopa pyuo nyakamiri ramo dokopa banya ree palu dupwame kenapa pyao injelana saka napala lopome kumarami.

7 Mendeme Isaraele akali range yango dokona mende nyuo mee banya karapusi ingyuo kendemande yulu pyakana laope panda yuu wakale lapona karapusi ingyuo kendemande yulu pira lao maipala kana ropo pyao nyera ramo doko baa pyao kumakapenge. Dopa pyuo pirami kata dokome yulu koo doko ramanyi nembaramisa pira.

8 Nakamana yongo dokona rete rapa piya kande dokopa Lipae akali purisi yulu pilyaminyi dupwame langiraminyili pyuo moko minyuo pipwape. Nambame nakama pii maiyu dupwa peparaena palyuo pipwape. 9 Nakama Isipi karo epapeyami dokopa Kamongo dokome Miriame keta apa piya kandese lao suu pyalapape.

10 Akali mende bange yano reto maipala dokopa baame isingi emba jeroŋo lao lalu lao leyamo komau doko banya anda andakare dokona nyela paa nare. 11 Baa range dokome minyako epena lao kamanda mee isaro karape. 12 Baa akali pendewa ramo doko baa kukwa dokona komau doko mee retaro karakami napipi. 13 Kukwa dupwana yaka lao range maiyakamiri. Dopa pirinyi dokopa baame raeko maiyuo reto luu palenale. Rae maiyuo paramo doko nakamana Kamongo Anatu dokome nakama epe kandenale.

14 Yulu pingi akali Isaraele rangepe panda yuu wakale rangepe pendewa ingyuo bange reta nange mende banya yolena suu pyao yulu andake piyasa dokona kana doko panga soo nyakami napipi. 15 Yuu gii yaka lao neta anda peya kande dokona aopa banya yulu dokona yole maipi. Baa mone dokoko nyelana suu pyale pyale yulu pira ingilyamo. Daaŋa lao embame baa yole mai nare ramo dokona lao baame saka renge doko Kamongo lamairasa koo doko emba keta palira ingilyamo.

16 Wane wanakepe dupwame koo mende pirami dokopa endangi rakangepe dupwa pyao kumaka narami. Dee endangi rakangepe dupwame koo mende pirami dokopa wane wanakepe dupwa pyao kumaka narami. Dopa pii naraminyipape wambu koo piramo doko baa range banya koo dokona yano nyuo kumara.

17 Nakamame wane wanake muiyane dupwape dee wambu yuu wakale range karala paenge dupwape bange nyeraminyi dupwa daaŋa lao kata rokakami narami. Enda waiya bange yano reto maipala isingi jeraŋa lao banya komau nyakami nalapape. 18 Nakama Isipi dokona karapusi paleyaminyipa Kamongome nakama kiiramo nyiya kande lao soo karalapape. Renge dokona lao mawa pii dake jilyu kande.

19-21 Nakamana ee wambu piramo isa jingi witi pyaraminyi dupwana lapo isa pao siya kande dupwa kapu kyuo nyela paa narami. Dopako pyuo nakamana isa olipi jingipi panda isa girapo jingipi lyiyami kande dokopa lapo kakana sera dupwa dee kamba nyela paa narami. Dopa pyuo witi isa pao seramopape isa olipi jingipi mee kakana seramo nyii naraminyi dupwape yuu wakale rangepe wane wanake muiyanepe enda waiyape dupwana ingyuo sakamira. Dopa piraminyi dokopa nakamana Kamongo Anatu dokome yulu peparaena nyiso elyape keta pisara. 22 Nakama Isipi dokona karapusi ingyuo kendemande yulu pyuo paleyami kande doko kame sisaramano kando lao soo soowako pyuo karalapape. Renge dokona lao nambame mawa pii dake jipunu pilyamo.