Paul Nunda Reta Amboda, Tesalonaika Embokena Gefusira, Amo Eviri.
Paul nunda reta gitida, Tesalonaika embokena gefusira ainda amboda, nu itako kaifa edo, sekago ghaeko daba aminda nemokena gefusira. Bajari anakora jovereghe furariá sise oju usera aindae, nu sekago geka evia gefuse, Bajari da furari Sifo kau mavegori, ava se disugusira.
Paul Nunda Reta Amboda Tesalonaika Embokena Gefusira, Ainda Mendo Mendo Mo Eviri.
1:1-2 Paul natofo ategi usira.
1:3-12 Namonde Bajari da javoda mema itatamarera amo, evevari, jo eko iraeri.
2:1-17 God sari, nunda Asisi Kakara enda eminda irira ava darigari, Satan da fakina sekago isagha ari ainda amboda, Bajari jovereghe furarira.
3:1-15 Kuristini da irariri.
3:16-18 Paul ne ategi edo, tano usira.
1
1 Arie, nanda nano namendi! Namane Paul, Silas, a Timothy aimi, ne ategi beká ava erera. Ne reighi Tesalonaika aminda God da natofo edo ireva ava, namane ategi roro beká ava erera. Ne Bajari Iesu Keriso de dabade tatedo, God Afa da tofo edo ireva aindae, ne ategi beká ava erera. Yari budo givu!
2 God Afa a Bajari Iesu Keriso nemokena sonemba a dubo jama mutoro baove!
1:3-12 Ategi Da Sifo Mo, Kau Emingori.
3 Nenda tumondari baji mindafu ari dae erira, a ne tofo tofo dubo bu gogoghombari dae ereva, aindae namane evovodae nemo kotise, God Afakena aiyakoe sise irarera. 4 Kotugo, namane daba aindae sedo, God da ekaresia+ mendenikena nenda javo jigheoro ereraira. Ne mema a bouvu itatameraeva, a evetu genembo mendeni nemokena bouvu futuse, fakarago eoro mema itatameraeva ainda jokáda, ne durumugedo tumonduse ireva. Aindae namane nenda javo jigheoro ereraira. 5-6 Ne mema itatamuse ireva ava namane gido, kasama erera: God da kotari nemokena eveva vanembori. Ainda beká mo: ne mema oroko itatamuse ireva aimi, nemokena fakina futururari, ne inono aovo gido, God nendae ‘eveva’ sise, sari numokena yama irovo, ne kaifa use irarira. Tuka aindae, ne mema itatamuse ireva. God bekáda bekáda use, evetu genembo oroko nemokena bouvu futuse fakarago eraera aikena, mino use, bouvu futuse fakarago ari, ne mema itatamarera. 7 Ne mave oroko mema itatamuse ireva ava, nune amboda sari mema dadabari, ne namonde dabade dubo jama barera. Nu amingarira ainda Sifo aminda, Bajari Iesu nunda aneya fakina kakato ainde dabade isagha edo, utuda ghe vose fururoro garera. 8 Nu avaraka buburaghae budo vose fuama, evetu genembo namondeda Bajari Iesu da Bino Eveva jo ningido ae eraera, a God kasama ari dae jo uju ae eraera aikena, mino eko mutarira. 9 Ne evovodae ari ekoko da mino mutari vasada irise, Bajari de dabade jo irae arera, a nunda fakina durode ava ne jo gae arera. 10 Nu Sifo aminda furarira amo, nunda natofo nundae sakai saoro dae sedo, a tumondari embo nunda duro gosuse, nunda javo jighoro erare dae sedo, furarira. Sifo aminda, nembarago nunda natofo jokáda irareva. Ainda beká mo: ne namanenda vironu ava ningido tumondusevu.
11 Avori, namane eindae sedo banungeraera. God ne jebuga baovo dae sedo aghi usira. Ava sedo, nu nange sonembari, ne inono edo nunda jebuga baeteva aindae, namane banunguse irera. A kotugo, ne tumonduse, saramana rejo ava eraeva, a ne ari eveva ningiava ari koteraeva ava, sonembururari beká aetira aindae barago, namane banunguse irera. 12 Avavaga siroruse irarira aimi, ne Bajari Iesu da javo jighovo eroruse irarira. A nu kau daba aminga ava, duro nemokena futuse irarira. Kotugo, amo jo nenda ari da kaugo iraeri. Amo, God a Bajari Iesu Keriso da sonembaimi sirorarira.