1 Iau o Jud, a tultul anun o Iesu Karisito ma a tisin o Jems. A tumus a pas ri torom mot ra o God a Tamandat i sa kabo pas mot, ma i maris mot, ma mot kis una tamtamabat anun o Iesu Karisito.

2 O God in pitar a warut, a malmal ma a marmaris, ra detul labo sakit, torom mot.

3 A kum wakak na paspasang, a nem doko i sur an tumtumus torom mot una pinapam anun o God ra i ulaun pas dat. Ikut uniri, a nuki lena an tumtumus sur an udekdek mot, sur mot in dekdek sur mot in tamtamabat wakak a Wakak na Wasiso gusun a kum ebar. A Wakak na Wasiso ra di sa pitar tari torom a taro anun o God, ra kataio in pukus lar pasi. 4 A tumtumus una utna ri, uni ara taro det sa ruk eno taru torom mot. Ka det mur a nemnem anun o God, ma det in iru una warkurai anun o God, elar nami ra di sa tumus tari numugu utmakai una Buk Tabu. Det pukus laulau pas a marmaris anun o God, ra det watungi lena, “I wakak kut ra dat in pam a kum petutna na pamuk.” Ma det ipul ru i kut anundat a Mugumugu ma anundat a Labino o Iesu Karisito, i ara sot kut.

5 Mot sa tasman tar a kum utna ri, ikut a nemi sur an inanos melet mot lena: A Labino i ulaun pas a taro Israel tagitong o Ijip, ikut numur, i um doko ru det ra ka det nurnur. 6 Ma a kum ensel kai, ra ka det gas una kum pinapam ra o God i sa tibo tar det nami, det wan gisen gusun a kinkinis anundet. Ra o God i sa ker ukai tar det nama kum sen, ra in kis tukum. Ma det sa kis una dumirum ra det kis langlang pas a labino bung ra din warkurai det. 7 Lenkutkai ra torom o Sodom ma o Gomora, ma a kum tamon milau der. A taro tagitiro iai det pam a petutna na pamuk, ma det pam a laulau ino melet torom det ut a kum musano. Ra a kum tamon ra, det iru rop una sungun. Ma anundet a iniru i utumarong dat sur dat in tasmani lena a labino sungun ra ken mat, i kis sur a kum tene sakino sur din tun det uni.

8 A taro ra det sa ruk taru torom mot, det kai det sakino elar nam det ra. Det nurnur un asau ra det tama i una kum ririon. Una nurnur ra, det udur a pinindet melet ut nama kum sakino petutna, ka det nemi sur det in kis utuntudu ina warkurai anun o God, ma det watung laulau a kum ensel tagisapat netes. 9 Ikut o Maikel, a mugumugu anun a kum ensel, ra der engaras nam o Satan una minatin o Moses, ke watung tar tu laulau na wasiso un o Satan. I watungi kut lena, “A Labino ut in balu i torom ui.” 10 Ikut a taro ri det wasiso laulau una kum utna ra ka det talapor uni. Ma anundet a mananos i elar kut nama mananos anun a kum wewegua, ra det muri kut a nemnem ina pinindet. A utna ra, det in iru uni.

11 In laulau doko torom det! Det mur a petutna anun o Kain* Tama Stat 4:3-8 . Ma det raro elar nam o Balam† Tama Namba 22-24, uni det pam a kum laulau na utna sur det in los a mani uni. Det in iru elar nam o Kora‡ Tama Namba 16, ra i mugu pas a taro ra det rosumur gusun o God, ra det iru rop.

12 Ra a taro ri det wangon tomo nam mot una anumot a kum inangon na marmaris, det elar kut nama dur na utna. Det tabor masmasur pas det ut, ma ka det urur sur a taro gisen. Det elar nama bakut ra a wuwu i wup tuptupukusi, ra katu utna i ubatbati. Det elar kai nama kum duwai ra ka det wu una kalang ra det ser wu uni, det sa mat. Ra di sa gat ru det, anundet a manru na minat mo ra. 13 Det elar nama labino top ra i tapak, ma nundet a kum sakino petutna na maimai ra ka det maimai uni, i wanpat talapor elar nama busu na top. Ma det elar kai nama kum nangnang ra ka det kis una kinandet, det wan tuptupukus kut, ra o God i sa waninar tar a labino dumirum sur det, ma ken rop.

14 Ma o Enok kai, a wonom mawit na kabo taro tagun o Adam, i sa watung tar a wasiso na poropet un det lena, “Tama i, a Labino in nanpat nam anun a ariparip na tokodos na ensel, 15 sur in warkurai a taro rop. Ma det rop ra ka det mur a nemnem anun o God det in iru una warkurai, una nundet a kum sakino pinapam ra det sa pam tari, ma una kum laulau na wasiso ra a sakino taro det sa watung tatari una Labino.”

16 A taro ri, det a kum tene ururai ma a kum tene pukpukus. Det mur a kum laulau na nemnem anundet, ra det ulabo pas det ut. Det ugasgas pasi kut a taro nam anundet a kum namnamin na wasiso, sur det in los tu utna gusun det.

17 Ikut mot, a kum wakak na paspasang, mot in nuk pas a kum wasiso anun a kum aposel anun a Labino anundat o Iesu Karisito, ra det sa inanos mugu tar mot uni. 18 Det sa inanos tar mot lena, “Una kum tintinip na bung, lako taro det in watung laulau o God, ra det in mur anundet a kum nemnem, ra ke elar nama nemnem anun o God.” 19 A taro ri, det a kibino ra mot a kum tene nurnur mot tapagol. Det mur a nemnem kut anun a rakrakon bual, ma a Tokodos na Nion ke kis un det.

20 Ikut mot, a kum wakak na paspasang, in wakak ra mot in udekdek mot una numot a tokodos na nurnur sur in lubung, ma mot in wararing nama dekdek ina Tokodos na Nion. 21 Mot in kis epotor una marmaris anun o God, ra mot kiskis langlang sur anundat a Labino o Iesu Karisito in tabor mot nama nilaun tukum. In tabor mot nami, uni i maris mot.

22 Mot in ese a marmaris torom det ra i talara anundet a nurnur. 23 Ma mot in dat ulaun lakit pas ara taro ra kura mo una sungun. Ma torom ara taro kai, mot in ese a marmaris, ikut mot in ngara utkai, sako mot in mur a ngasino anundet. Ma mot in ngaran anundet a kum malu ra i dur nama nundet a kum sakino petutna.

24 Dat in watung ulabo pas o God, ra i pet lar pasi sur in tamtamabat mot sur gong mot puku, ma in utur mot umatan anun a minamar, nama labino gasgas ma katu etakun torom mot. 25 I ara sot kut anundat o God, ra i ulaun pas dat una minatin o Iesu Karisito anundat a Labino. Anunu ut a minamar, a kinkinis na king, a dekdek ma a warkurai, tagun numnumugu utmakai, uniri, ma ken rop. Amen.