PULU YEMONGA UNGU KONDEMO IPURU 8

8:1-13 Pulu Yemone Ungu Konde Te Nimbe Panjipe

1 Nane ‘⸤Pulu Yemone mako topa⸥ ‘Olionga popo tondoli yemo molopili.’ nirimu.’ nikiru akumunge ungu pulumu isipe: Ye nindu kanu-sili* te olionga popo tondoli ye awili olandopa molemo kanumu† ⸤melema pali nokombando⸥ mulu koleana Ye Nomi Kingi Awili Olandopamo kolea nokopa molemo polomonga ki umbukundu pupe molemo.‡ 2 Akune molopa yu mulu koleana angilimo ⸤sele-ulkemonga⸥ suluminia paa kake telimunge§ olionga nimbe Pulu Yemo popo tondopa molemo. ⸤Yu aku kongonomo tendepa molemo⸥ sele-ulke akumu Pulu Yemo molemo sele-ulke sikemo. Akumu ye tene naa takorumu, Awilimu yuyu takorumu.*

3 ⸤Yu akune telemomonga pulumu isipe:⸥† Pulu Yemo popo tondoli ye awili olandopamane ⸤Mosisini sirimu ungu-manemone nirimu mele pilkulie tengendo⸥ Pulu Yemo popo toko we melema kinie kongi mele kalolime kinie mengo ongo siringi, akumunge ye Pulu Yemo popo tondoli ye nomi awili olandopa ⸤pe orumu ye Yesusi⸥ nikiru akumuni Pulu Yemo popo topa ⸤meme peli⸥ melte naa silkenje kapola naa telka akumunge yuni kepe melte popo topa sirimula. 4 Nalo ma koleana Pulu Yemo popo tondoli ye‡ ungu manemone§ nilimo mele pilkulie Pulu Yemo popo toko kongi melema kalko silimele yema molemelemonga* kanu yemo yu ma koleana molkanje Pulu Yemo popo tondoli ye te naa molka. 5 Kanu yemane popo tondoli kongono telemele akumu Pulu Yemo molemo mulu koleana telemo kongonoma none tepa, mulu koleamonga minimu mele none teko molemele. Akumunge Pulu Yemo mana molomba sele-ulkemo Mosisini kokele takomba terimu kinie Pulu Yemone yu mane sipelie nimbendo:

“Nane mulú Sainai ola

Mosisi nu lipu ora sindu aku sipe mele

melema pali paa sumbi siku manda manjiku teani.”†

nirimu. 6 ⸤Aku sike nalo⸥ kanu yemanga Pulu Yemo popo tondoli kongonomo paa maniendopa. Pulu Yemone Yesusindu ‘Tei.’ nimbe sirimu popo tondoli kongonomo paa peanga olandopa. Yunge kongonomo olandopa telemomonga pulumu isipe: Pulu Yemone olio-kinie ungu konde nimbe panjipe mi lierimumu‡ Yesusi awi-suku-singine angilipe ‘Pulu Yemo-kinie olio-kinie kapola kapola molangi.’ nimbe lipe tapondolemo yemone ‘kamu wendo opili.’ nimbe tenderimu, aku ungu kondemo olandopala. Ungu kondemone ‘olio simbo.’ nimbe panjilimo aku melema olandopa, ungu-oumuni ‘simbo.’ nirimu aku melema maniendopa, akumunge ungu kondemo olandopa.§ Mi Lierimumunge Yesusi Mulu Koleana Popo Tondoli Ye Awili Olandopamo Molemomonga Ungu Te

8:7-13 Pulu Yemone Ungu Konde Nimbe Panjipe Mi Lierimu Ungumu Olandopa, Ungu Ou Nimbe Panjipe Mi Lierimu Ungumu Maniendopamonga Ungu Te (8:1-13 pali kanani.)

7 Pilieme! Pulu Yemone nimbe panjipe mi lierimu ungu oumunge tondolomo pelkanje* Pulu Yemone altopa ungu te naa nimbe panjilke. 8 ⸤Ungu-oumunge tondolomo pelkanje Pulu Yemone yemboma teringi mele kanopa keri naa kanolka.⸥ Nalo yembomane teringi mele Pulu Yemone kanopa keri kanopalie nimbendo:

“Na Awili ⸤Yawe⸥ ne ⸤enondo⸥ nimbondo:

“⸤Pilieyo!⸥ Nane Isirele yemboma-kinie

Juda yemboma-kinie† ungu konde te

nimbu panjipu mi lembo walemo wendo ombá.

9 Iungu konde nikiru akumu

ou enonga anda-kolepalime kolea Isipi wendo lipu

ulsu membo orundu walemonga kanu yemboma-kinie

nimbu panjipu mi lierindu mele‡ telu sipe molo.

Nane eno-kinie ungu nimbu panjipu

mi lierindu ungumu naa pilieringimunge

nane ‘Eno molko kenjengi!’ nimbu lipu bulu sirindu.

10 Isirelene kalopa lsimu yemboma-kinie

kelepo tembo mele pe ungu konde te

nimbu panjipu mi lembo, akumu isipe:

⸤‘Eno teko molonge kinie

nane eno kanopo peanga kanombo.’ nirindu mele

‘konopuni pilku kondangi.’ nimbu⸥

nanga ungu manema

enonga konopune pepili panjindipu,

‘Nanga ungu manema konopu mondoko ‘Pilipu teamili.’

ningu molangi.’ nimbu nane kanu ungu manema

boku mele enonga konopune imbi tombo.

Na mindi eno pilku popo tonge Pulu Yemo molombo,

eno nane nokombo yemboma molonge.

11 Aku walema wendo ombá kinie

yembo kamako imbi molombama kepe,

koropa imbi naa molombama kepe, akumene pali

⸤‘Na Awilimu.’ ningu⸥ kanoko imbi singemonga

yembomane enonga kandi pulu lemo yemboma kepe

ulke kere-pongolo penge yemboma kepe

‘Awilimu molemo mele piliengi!’ naa nimolo.

Eno pali na pilku pora singemonga

altoko ningu naa singe.

12 Nane eno kondo kolopo

enone teko kenjinge ulume mundupu siye kolondopo

enonga ulu pulu kerime

altopo paa naa pilimbo.”§ nimbu

na Pulu Ye Awilimuni nikiru.”*

nirimu.

13 Pulu Yemone pe olio-kinie nimbe panjipe mi lierimu ungu akumu “Ungu kondemo” nirimu ungu akumuni ou Isirele yemboma-kinie nimbe panjipe mi lierimu ungu ou akumu yuni ‘Kamu nondopa manie pumbe tekemo.’ nimbe nirimu. Pe kinié olio pilimolo, mele ou te kamu nondopa manie pumbe tekemo mele, akumu sike nondopa kamu pora nimbé.†

IPURU
<
8
>

*8:1: inie yakondo 7:23-28 nimbe molemo mele yemo.

†8:1: 3 bokumunge alsena anjokondo “34. pris- 34.3. hetpris”.

‡8:1: ungu pulu pokore yakondo 1:3,8, Konana 110:1.

§8:2: ‘Mulu koleana sele-ulke sikemo angilimo.’ nirimu akumu sike ulke te angilimomondo nirimu molo sele-ulkemonga pulumu pilipelie Pulu Yemo molemo mulu koleamo nimbendo ungu iko topa aku sipe nirimunje.

*8:2: Mosisini takorumu sele-ulkemo imulu koleana angilierimu sele-ulkemo mele manda manjipe takorumumunge temanemo Wendo Oringi 24-30, 35-40.

†8:3: inie yakondo 5:1 mele.

‡8:4: bokumunge alsena anjokondo “34. pris”.

§8:4: 10 bokumunge alsena anjokondo “26. Lo”.

*8:4: Akume LLipai ye kanume; inie yakondo 7:13 kanani.

†8:5: Wendo Oringi 25:40(,9); Lipe Mundorumu Yema 7:44 kananila.

‡8:6: bokumunge alsena anjokondo “22. kontrak”.

§8:6: inie yakondo 7:22.

*8:7: inie yakondo 7:11 mele.

†8:8: Juda yemboma lupe nimbe Isirele yemboma lupe nirimu akumunge pulumu isipe: Eno pali Isirelene kalopa lsimu yemboma. Pe kolea Kenane moloringi kinie ou pulu pulu ye nomi kingi Sollo-kinie Depisi kinie Sollomono-kinie enone kolea pali nokoringi. Nalo pe umbune te wendo orumu kinie wikindu peringi yembomane “Olio oliolio nokomolo.” niringi, akumunge pe enondo ‘Isirele yemboma’ niringi. Depisi kinie Sollomono-kinie Sollomononga malo-kinie Juda yema moloringimunge merekendo yembomando ‘Juda yemboma.’ niringi. Nalo eno pali Pulu Yemone nokorumu. Ou-Kingime 12 kanani.

‡8:9: LLipai 26:12.

§8:12: Romo 11:27. 8:10,12selo molemo mele inie anjokondo 10:16,17selo molemola.

*8:12: Jeremaya 31:31-34.

†8:13: Yemone ipep mo topa sirimu kinie pe ponie kise molo pakera mele mindi omba purumu kinie Juda yemboma nokorumu Romo gapomanomone Juda yemboma-kinie mumindili kolopalie kolea awili Jerusalleme kinie akune sukundu angilierimu Pulu Yemo popo toko kongi kera melema kaloringi ulke tembelemo kinie kamu toko tepe mundoringi. Akumunge pe yandopa kinié kepe Isirele yembomane altoko Pulu Yemo popo tongendo melema naa kaloringi, naa kalemele. Enone ou Pulu Yemo popo toringi mele aulkemo kamu manie purumu nalo eno awisilini ‘Yesusi yu sike Pulu Yemonga Malo, yu sike olionga nimbe kolondorumu.’ ningu naa pilimelela.