Mɛlɛpi mɛ Njambiyɛ Jɔnja Mbon 2 TIMƆTE 1

Mɛkana Yiɓate

yi Pol kɛtima kɛnjɛ

Timɔte

Yo ndi sendi Pol, mɔ tomun Yesus Krist kɛtɛ mɛkana mɛte yɔkɔ, yite a kɛ jɔɓɔ kɛ Rom. Yo mɛkana yiɓate yi nyɛ kɛtima kɛnjɛ Timɔte kɛ́. Yo sendi njena mɛkana mɛnɛ.

Kɛ mɔy mɛkana mɛte Pol jéki lɛpɔ kasi ɗiyɔ nɛ ŋgbik kɛ mɔy gbakasi. A kɛ lɛpɔ sendi nde, ŋgimɔ kwaŋge nɛ sima wuta, yite nde, ŋgimɔ sɔŋ nɛ. A kɛ ɓɛŋɛ nde, sulɔ ɓenjɔŋ ɓenɛ sima li̧ nyɛ. A kɛ lɛpɔ sendi tɛri te yi ɓomɔ ta ɓɛ nɔ kɛ ŋgimɔ te yi mbokɔ ta ɓɛ kɛ kɛ̀ kɛ siynate kɛ́.

Wusɛ yakama ɓakɛ mɛkana maka kɛ nyaŋgwɛ mɛŋgaɓiyɛ yini:

1. Pol kɛ kitɛ Timɔte (kumte 1).

2. Kpasa mɔ te ɛ ɓeŋgwɛ Yesus Krist kɔ ɓɛ̂ki nan komɛ ɓomɔ tumɛ kɔŋ nɛ mɛyasi mɛ Njambiyɛ kɛ́? (kumte 2).

3. Mɛkana mɛ Njambiyɛ kɛ kamɛ kritɛn kɛ ŋgimɔ te yi ɓomɔ tumɛ kɔŋ nɛ mɛyasi mɛ Njambiyɛ kɛ́ (kumte 3).

4. Kpasa kritɛn tónjukwɛ mɛyasi mɛ Kumande Yesus Krist. Sendi, Nyaŋgwɛ Kumande tí leŋsa nyɛ na (kumte 4).

1 Yo mi Pol kɛtɛ mɛkana maka. Njambiyɛ tɔkuma mi nda yi nyɛ kwaɗya kɛ́ nde, mi ɓɛ̂ki mɔ tomun Krist Yesus, nɛ́ mi lɛpi kasi joŋgwɛ te yi nyɛ kpoma nde, a ta nyɛ ɓotu ɓete ɓe ɗiyɛ saŋgwate ɓenɛ ɓe Krist Yesus ɓaka. 2 Mi kɛ́ti kɛnjɛ wɛ mɔnmbɛ Timɔte, sɔŋ temɔ mbɛ. Da Njambiyɛ nɛ̀ Krist Yesus, Nyaŋgwɛ Kumande wusu kêl ŋgikwa nɛ wɛ. Ɓo gwâki ŋgwɛtɛ yɔ, nyɛ sendi wɛ tɛte.

Pol kɛ nyɛ Timɔte ɗeti kɛ temɔ

3 Mi kɛ nyɛ Njambiyɛ te yi mi kelɛ nyɛ mɛsay kɔ wosoko nɛ pupuna temɔ nda yi ɓesaŋmbambɔ ɓembɛ ɗikima kelɔ kɛ́. Tu nɛ̀ yesɔ mi kɛ takɛ wɛ mɛŋgimɔ hɛnɛ komɛ mi ŋgwɛta nɛ nyɛ kɛ́. 4 Mi kɛ takɛ nda yi wɛ punja nɛ misiɗyɛ kɛ misi kɛ́. Mi nɛ nyaŋgwɛ hɛl te yi ɓɛŋɛ wɛ nɛ kɔkɔ, nɛ́ temɔ mbɛ tondu nɛ mɛsosa. 5 Mi kɛ takɛ tikina temɔ te yi wɛ nɔ kɛ yi Njambiyɛ kinɛ likisi kɛ́. Nyɔŋmbambɔ Lowis nɛ̀ nyɔŋgwɛ Enis kandima ɓɛ nɛ njɛl tikina temɔ te yite. Mi kɛ duwɛ gbate nde, wɛ kɛ tikɔ sendi temɔ ɗete. 6 Ɗete, mi kɛ ɓasiɗye lɛpɔ nyɛ wɛ nde: Kelɔ nde, jɛŋ te yi Njambiyɛ nya wɛ kɛ ŋgimɔ te yi mi kasa nɛ mɛɓɔ kɛ yotu yɔ kɛ́ ŋgbâɓikwɛ. 7 Kɛto Sisiŋ te yi Njambiyɛ nya kɛ yotu su kɛ́ yeti sisiŋ te yi kelɛ nde, wusɛ ɓɛ̂ki nɛ wɔ̧ na. Yo Sisiŋ te yi nyɛ wusɛ ŋguŋguɗyɛ yi kelɛ nde, wusɛ kwâɗyikwɛ ɓɛsɔ, ɓɛ sendi nɛ ɗyanɔ te yi ɓiye temɔ su kɛ mɛyasi. 8 Ɗete, wɛ tî gwaki njɔn te yi lɛpɔ kasi Nyaŋgwɛ Kumande wusu nyɛ ɓomɔ na. Wɛ tî gwaki sendi njɔn te yi lɛpɔ kasi mbɛ, ko ɓɛkɔ nde, mi ndana kɛ jɔɓɔ kɛto nɛ na. Ma ndi nde, sinɛ wɛ sâŋgwaŋgwɛ nɛ mɛbɔnɛ kɛto Kimɔ Tom. Kelɔ ɗete nɛ ɗeti te yi Njambiyɛ nyɛ wɛ kɛ́. 9 Yo Njambiyɛ te joŋgwɛ wusɛ kwey jeɓa wusɛ, nɛ́ wusɛ ɓɛ ɓotu ɓenɛ. A tì kelɛ ɗete, kɛto yiŋa kimɔ mɛkele musu na, yasi wɛtɛ, yo kɛto nyɛ nɛ ŋguru wenɛ sima si kombile ɗete. Sendi, kɛto a nɛ ŋgikwa. A kpoma nde, a ta kwa̧ nɛ nje Krist Yesus yí teɗye nɛ wusɛ ŋgikwa nɛ. A kpoma ɗete njombu yaŋa mɛsew mɛsew. 10 Ma a punja ŋgikwa te ndana, kɛto Krist Yesus, mɔ te ɛ joŋgwɛ wusɛ kɔ nja̧ nje. A soŋma ɗeti te yi sɔŋ ɓa̧ nɔ kɛ́. A kwaŋma nɛ nje lɛpina Kimɔ Tom yí punjɛ nɛ kasi kpasa joŋgwɛ nɛ̀ kasi joŋgwɛ te yi tí ɓeyɔ wɛtɛ yesɔ kɛ́. 11 Njambiyɛ tɛmbiɗya mi nde, mi ɓɛ̂ki mɔ pelna Kimɔ Tom, mi ɓɛ̂ki mɔ tomun wenɛ nɛ̀ mɔ teɗya ɓomɔ Kimɔ Tom te kɛ̀ nɔ. 12 Yo kɛto te yite yi mi saŋgwa nɛ mɛbɔnɛ mɛte yikɛ ndana kɛ́. Ko ɗete, mi yeti kɛ gwe njɔn yaŋa na, kɛto mi kɛ duwɛ mɔ te yi mi tikima temɔ kɛ yenɛ kɔ. Mi kɛ duwɛ gbate nde, a nɛ ɗeti te yi ɓakiɗye yasi te yi nyɛ kaŋma nyɛ mi kɛ́ kumɔ kɛ nyaŋgwɛ yesɔ te. 13 Wɛ wokuma kpasa mɛlɛpi mɛte yi punduma kɛ numbu mbɛ kɛ́. Kelɔ ndi nda yi yo lɛpɛ kɛ́. Ɓeŋgwɛ yo nɛ kwɛt kwɛt yí teɗye nde, wɛ kɛ tikɔ temɔ kɛ yi Njambiyɛ, sendi, wɛ nɛ mɛkwaɗya, kɛto wúnɛ Krist Yesus saŋgwate. 14 Ɓakiɗya kimɔ yasi kɛ yi Njambiyɛ nya wɛ kɛ́ nɛ ɗeti Kimɔ Sisiŋ te yi ɗiyɛ kɛ yotu su kɛ́. 15 Wɛ kɛ duwɛ nde, ɓotu ɓe Njambiyɛ hɛnɛ ɓe ɗiyɛ kɛ Asi ɓaka tumma kɔŋ nɛ mi. Figɛl ɓenɛ Hɛrmogɛn kɛ njoka ɓotu ɓete. 16 Nyaŋgwɛ Kumande kêl ŋgikwa nɛ Onesifɔr ɓenɛ ɓotu ɓe tu̧ ɗyenɛ, kɛto mɛŋgimɔ ɓuɗyate a ɗikima nyɛ mi ɗeti kɛ temɔ. Sendi, ko ɓɛkɔ nde, mi ɓa̧ kɛ jɔɓɔ, a tì gwe njɔn te kɛ mbɔmbu ɓomɔ na. 17 Yasi wɛtɛ, kɛ yi nyɛ nja̧ nɔ kɛ Rom kɛ́, a kpalma sa̧ mi ɓekɛ ɓekɛ ɗe dolɔ. 18 Nyaŋgwɛ Kumande kêl ŋgikwa nɛ nyɛ kɛ kɛki nɛ, Nyaŋgwɛ Kumande kɛ nyaŋgwɛ yesɔ te. Kɛ njoka ɓomɔ hɛnɛ, yo ndi wɛ nyɛpɔ kɛ kombile duwɛ ɓuɗya mɛkamna mɛte yi nyɛ kelma nɛ mi kɛ Efɛs kɛ́.