Bosa Mɛkana
mɛte yi
Jaŋ
kɛtima
Yo Jaŋ, mɔ tomun Yesus Krist kɛtɛ mɛkana mɛte yɔkɔ.
Mɛkana mɛte jéki lɛpɔ kasi ɗiyɔ saŋgwate sinɛ ɓe Njambiyɛ. Jaŋ kɛ́ti yo kɛnjɛ njɔŋ ɓekritɛn ɓete ɓe ŋgimɔ te yite, kɛto mɛnjaŋgwɛ mɛte yi ɓo saŋgwama nɔ kɛ́. Yo nde, ɓaŋa ɓomɔ nja̧ teɗye yiŋa kɔtu mɛyasi kɛ kasi Yesus, lɛpɔ nde, a tì jaɗyɛ gbate nda mumɔ na, nyɛ yeti *Krist na. Ɓo ka̧ sendi mbɔmbu lɛpɔ nde, mɛɓeyɔ yeti pɔkɛ yiŋa nyaŋgwɛ ɓeya yasi te yi mumɔ ta saŋgwa nɛ mɛbɔnɛ kɛte kɛ mbɔmbu Njambiyɛ na. Ɗete, Jaŋ kɛ kɛtɔ mɛkana maka yí nyɛ nɛ ɓekritɛn ɗeti kɛ tikina temɔ te yi ɓo tikɛ kɛ yi Krist kɛ́, yí lɛpɔ sendi nyɛ ɓo nde, ɓo ɓâkiɗya mɛlɛpi mɛte yi ɓotu ɓe tomun ɓe Yesus kandima teɗye ɓo kɛ́ nɛ koŋ koŋ. A kɛ jeɓa ɓo nde Ɓɔnɔ ɓenɛ.
Wusɛ yakama ɓakɛ mɛkana maka kɛ mɛŋgaɓiyɛ yitan jɔ wɛtɛ:
1. Ɓekritɛn ɓɛ̂ki saŋgwate ɓenɛ Njambiyɛ, joŋna sendi ɗete tandɛ yan (kumte 1-2).
2. Kasi ɓependɔ ɓe ɓekritɛn (kumte 2).
3. Ɓekritɛn nɛ̀ kasi njena Yesus Krist (kumte 2-3).
4. Ɓekritɛn yeti wɛtɛ ɓenɛ ɓɔnɔ ɓe *Satan na (kumte 3).
5. Ɓekritɛn nɛ̀ kasi ɓotu ɓe teɗya kɔtu mɛyasi (kumte 4).
6. Kasi mɛkwaɗya nɛ̀ kasi tikina temɔ nɛ ŋgbik kɛ yi Njambiyɛ (kumte 4-5).
1
Kasi Lɛpi te yi nyɛ ɓomɔ joŋgwɛ
1 Wusɛ lɛ́pi mɛyasi maka kɛnjɛ wunɛ kɛ kasi mɔ te yi ɓo jeɓa nde Lɛpi*f1* kɔ. Yo Lɛpi te nyɛ ɓomɔ kpasa joŋgwɛ. Wusɛ lɛ́pi kasi mɔ te ɛ kandima ɓɛ, yite Njambiyɛ tì pa kusɔ mbokɔ na. Wusɛ wokuma nyɛ kɛ lɛpina, ɓɛŋɛ nyɛ nɛ gba misi musu. Wusɛ seŋgila nyɛ, ɛ wusɛ kpokɛ sendi gba nyɛ nɛ mɛɓɔ musu. 2 Mɔ te ɛ nyɛ kpasa joŋgwɛ te kɔ nja̧ punjɛ yotu. Wusɛ ɓɛŋma nyɛ, ɗete wusɛ kɛ lɛpɔ yasi te yi wusɛ ɓɛŋma nɛ̀ yi wusɛ duwa̧ kɛ kasi nɛ. Wusɛ kɛ pelɛ kasi joŋgwɛ te yi kpo nɛ kpo nyɛ wunɛ. Joŋgwɛ te ɓa̧ mbɔmbu kɛ kɛki Da. Ma ndana, Da punja yo teɗye nyɛ wusɛ. 3 Yasi te yi wusɛ ɓɛŋma nɛ misi musu nɛ̀ yi wusɛ wokuma, wusɛ kɛ pelɛ sendi yo nyɛ wunɛ, nɛ́ wunɛ ɓɛ sendi saŋgwate nɛ wusɛ. Ma ɗiyɔ te yi wusɛ ɗiyɛ su saŋgwate kɛ́, yo sinɛ ɓe Da nɛ̀ Mɔnɔ wenɛ Yesus Krist. 4 Wusɛ kɛ́ti mɛyasi maka kɛnjɛ wunɛ, nɛ́ mɛtemɔ musu tondu nɛ mɛsosa.
Njambiyɛ, nyɛ mɛjasi
5 Ma tom te yi Mɔnɔ wenɛ nja̧ lɛpɔ nyɛ wusɛ kɛ́, yo nde, Njambiyɛ nɛ ŋguru wenɛ mɛjasi kinɛ mɔnɔ yitil nɛ mbɛt kɛ yenɛ na. Yo yite yi wusɛ pelɛ nyɛ wunɛ. 6 Ŋgɛ wusɛ lɛpɛ nde, sinɛ ɓe Njambiyɛ saŋgwate, kpalɔ nje joŋna kɛ mɔy yitil, yite wusɛ kɛ kelɔ ja̧. Sendi, wusɛ kɛ teɗye nde, wusɛ ti kél mɛyasi nɛ ŋgbeŋ kɛ joŋgwɛ ɗyusu nda yi Njambiyɛ teɗye wusɛ kɛ́ na. 7 Ma yasi wɛtɛ, ŋgɛ wusɛ nje joŋna kɛ mɔy mɛjasi nda yi Njambiyɛ nɛ ŋguru wenɛ kɛ mɔy mɛjasi kɛ́, yite wusɛ saŋgwate tandɛ su, ɔ ɓɛ́ŋa, mɛkiyɔ mɛ Mɔnɔ wenɛ Yesus ma pupuɗye wusɛ soŋɛ mɛɓeyɔ hɛnɛ te yi wusɛ kelma kɛ́. 8 Ŋgɛ wusɛ lɛpɛ nde, wusɛ kinɛ mɛɓeyɔ na, yite wusɛ kɛ seɓile yotu su nɛ ŋguru wusu, komɛte, gbakasi yeti kɛ temɔ su na. 9 Ma ŋgɛ wusɛ jayɛ kɔtu mɛkele mɛte yi wusɛ kelɛ kɛ́ kɛ mbɔmbu Njambiyɛ, yite a ta tikɔ wusɛ nɛ ŋgwɛtɛ, soŋɛ yo kɛ to su, pupuɗye wusɛ kɛ ɓeya mɛkele musu hɛnɛ, kɛto a tónjukwɛ mɛyasi mɛte yi nyɛ si kpo kɛ́, sendi nyɛ nɛ ŋgbeŋ. 10 Ma ŋgɛ wusɛ nje lɛpɔ nde, wusɛ tì kelɛ yiŋa ɓeya yasi wɛtɛ yesɔ na, yite wusɛ kɛ pɛsɔ nde, Njambiyɛ mɔ ja̧. Komɛte, mɛlɛpi mɛnɛ tì pa sɛkila kɛ temɔ su na.